1 TĨMOTEO 4

1Nĩkwa Omũlĩmũ akabũga ndeke ati, Oko migulu y'enyũma-nyũma abandi basyatswa okw'ĩkĩrĩrya lyabo, ibakakwama ebĩrĩmũ by'erĩtebya n'erĩkangĩrĩrya ly'esyombĩnga. 2Amatebo aya ni w'abandu abakatũla amabehĩ. Obunya-mutima bwabo bwabĩrĩhĩsĩbwa n'ekyuma kĩhũhĩre kutsibu. 3Abandu aba bakaganaya erĩhĩkanĩa, kandi bakaganaya erirya ebindi byalya, ebyo Nyamuhanga ahangika busana n'eriribwa n'ewasĩngya busana n'abandu ababĩrĩkĩrĩrya n'eriminya omwatsi wa kwenene. 4Kusangwa ebyosĩ ebyo Nyamuhanga ahangika byowene, sibyangaganwa. Nĩkwa byangangirirwa n'ewasĩngya. 5Kusangwa bikahigulawa omo kĩnywa kya Nyamuhanga, n'erisaba ly'ewasĩngya. 6Wamahana abalĩkyetu emyatsi eyĩ, wasyabya mugombe mubuya wa Yesu Kristo, ĩnũnasĩkĩre ndeke omo bĩnywa by'omwatsi w'erĩkĩrĩrya n'erĩkangĩrĩrya ly'ekwenene ebyo wamakwama. 7Nĩkwa usage ebihaniriro bitya-bitya eby'ekihugo ebitawite mugaso. Nĩkwa ũyĩkala-kalaye busana n'erikenga Nyamuhanga. 8Erĩyĩkala-kalya ly'omubiri liwite omugaso muke, nĩkwa erĩyĩkala-kalya ly'omutima omw'ikenga lya Nyamuhanga, liwite omugaso busana n'emyatsi yosĩ, kusangwa likalaga engebe busana na lino, kandi busana n'engebe eyikandisyasa. 9Erĩbũga erĩ ni ry'ekwenene, kandi ryangalĩgwa ndeke. 10Ekyo kikaleka itwakola kutsibu n'erinuba, kusangwa twabĩrĩhĩra amaha wetu uku Nyamuhanga oyuliho, kandi oyuli Mũlamya w'abandu bosĩ, nĩkwa nĩ Mũlamya kutsibu ukw'aho busana n'abĩkĩrĩrye. 11Uhane n'erĩkangĩrĩrya emyatsi eyĩ. 12Suleke mundu akakupona busana n'obũlwana bwawe, nĩkwa ũyĩkangaye embere sy'abĩkĩrĩrye ng'olulengo lubuya lw'ebĩnywa, n'emikolere, n'omo lwanzo, n'omw'ĩkĩrĩrya, n'omo mutima ate kw'ebibi. 13Neryo erĩhĩka aho nasyasira, uyihe oko mũbĩrĩ w'erisomera abandu ekitabu kya Nyamuhanga, kandi uyihe okw'ihana, n'erĩkangĩrĩrya. 14Subye ukapona olũsũnzo lw'Omũlĩmũ, oluli omo mutima wawe. Wahabawa olũsũnzo olo omw'ĩbũga ly'abamĩnyererĩ, omugulu abakulu bakũhĩra kw'ebyala. 15Ukole emyatsi eyĩ, ukwamirireyo, erĩlolya embere ryawe liminyikale oko bosĩ. 16Ũyĩtegaye, kandi ũtegaye erĩkangĩrĩrya lyawe. Kandi uyitsinge omo myatsi eyĩ, kusangwa wamakola utya wasyayĩlamya haguma n'abakakuhulikirira.

will be added

X\