1 TĨMOTEO 3

1Ekĩnywa ekĩ ni ky'ekwenene, kiti, Omundu amanza eribya oko mũbĩrĩ w'obukulu bw'ekanĩsa, ĩnĩakayĩtsũtsa omũbĩrĩ mubuya. 2Neryo omukulu, atolere iniabya butsira kahinira, atolere miabya n'omũkalĩ muguma musa, kandi sĩakũnde, ayĩtegaye, ayitondeke, abye oyũkakokaya abagenĩ, kandi atoke erĩkangĩrĩrya. 3Kandi siabye mũtamĩrĩ, kutse ow'omururu, nĩkwa abye mugenge, abye mundu w'obuholo, siabye oyo wanzĩre ebindu. 4Abye mundu oyukategeka ndeke ab'omuwe, n'abana buwe ibakayolobeka n'erimukenga. 5Kusangwa omundu amataluka eritegeka ab'omuwe bo ndeke, angateya ekanĩsa ya Nyamuhanga ati kwehĩ? 6Kandi syabye Mukristo muhya-muhya, akasyayiheka n'eritoga, n'erĩsĩngwa ng'eSatanĩ ko yasĩngawa. 7Kandi abye mundu oyũkasĩmawa n'abandu abate omo kanĩsa, akasyahulwa mo mundu mubi, n'eritogera omo kitego ky'eSatanĩ. 8Abawatĩkya b'omo kanĩsa batolere babye abasĩkĩbwe, abate b'otulimi tubiri, kutse sibabye abakakũnda, kutse ab'omururu. 9Nĩkwa babye b'obunya-mutima bowene, abandu abakakwama eky'ekwenene eky'erĩkĩrĩrya, ekyabĩrĩbĩsũlwa. 10Kandi batsũke erirengwa, neryo bamatendibanika oko mwatsi, bakole omũbĩrĩ w'omũwatĩkya. 11Abakalĩ nabo bangabya abasĩkĩbwe, sibabye abakatonga abandi, nĩkwa babye abatekũnda, abateregula omo myatsi yosĩ. 12Abawatĩkya b'omo kanĩsa babye abandu b'omũkalĩ muguma musa, kandi abakategeka ndeke abana babo, n'abali omo manyũmba wabo. 13Neryo abawatĩkya b'omo kanĩsa abakakola ndeke bakabana erĩsĩkĩbwa ndeke, kandi bakatoka eritondeka embere sy'abandu bosĩ omwatsi w'erĩkĩrĩrya eryo tuwite busana n'erimatikana na Kristo Yesu. 14Ngakusakira emyatsi eyĩ, inyine n 'amaha w'eriyakulolako lũba. 15Nĩkwa namamala ndambĩ, ngakusakira iwatoka eriminya ngoko abandu bangayĩtondekanĩa omo kĩtũnga kya Nyamuhanga, ekiri ekanĩsa ya Nyamuhanga oyuliho. Ekanĩsa eyo nĩ ndũyĩ n'eyĩkasĩkaya omwatsi w'ekwenene. 16Sihali oyo wangagana obukulu bw'erĩkũmbo ly'ekisomo kyetu tuti, Mwabutuka omo mubiri w'abandu, Mwasĩngana ng'omutunganene omo Mũlĩmũ, Kandi mwalolwako n'abamalaĩka, Mwatũlaganĩbwa omo katĩkatĩ k'ebihanda, Mwĩkĩrĩrĩbwa omo kihugo, Mwatwalwa omo lukengerwa lw'elubula.

will be added

X\