1 TĨMOTEO 1

1Ingye Paũlo, omukwenda wa Kristo Yesu busana n'erihana lya Nyamuhanga Omũlamya wetu, n'erya Kristo Yesu, oyuli maha wetu. 2Ngakusakira uwe Tĩmoteo, omugala wage kwenene omw'ĩkĩrĩrya ly'Engulu Yowene. Olukogo, n'eriganyira, n'obuholo, bibye uk'uwe, bĩkalũa uku Nyamuhanga Tata, na Kristo Omukama wetu. 3Nyanzĩre iwabya eEfeso, ngoko nanakuhatikana omugulu nabya ngaya eMakedonia. Iwatoka eritegeka abandu balebe baleke erĩkangĩrĩrya eyindi myatsi ey'amabehĩ. 4Ubwirebo uti, baleke eriahula emitsye ya kera n'amena w'aboso-kulu, ebikaleta obuhaka. Ebĩ sĩbyewatĩkaya omũbĩrĩ wa Nyamuhanga, owakahangana omw'ĩkĩrĩrya. 5Nĩkwa enzumwa y'erihana lyetu ni lwanzo olũkalũa omo mutima owerĩre, n'obunya-mutima bubuya, n'erĩkĩrĩrya ly'ekwenene. 6Abandi bandu babĩrĩsĩga emyatsi eyĩ, babirikitira ehandi n'erikwama omũkanĩa mutya-mutya. 7Aba bakasonda eribya bakangĩrĩrya b'Emigambo ya Nyamuhanga, nĩkwa sibeminya ebyo bakabũga, kutse emyatsi eyo bakahula, n'erihatikanayo. 8Nĩkwa ĩtwe tũnasĩ Emigambo ko yowene, omundu amakwamayo ngoko litolere. 9Kusangwa tũnasĩ Emigambo moyĩtahĩrwa busana n'omundu utunganene, nĩkwa busana n'abakagana erihanwa, n'abakapona, kandi busana n'abatekenga Nyamuhanga, n'abakola-nabi, kandi busana n'abatesoma, n'abakaseka ekisomo; kandi busana n'abakĩta tata wabo kutse koyo wabo; kandi abĩtĩ b'abandu, 10kandi busana n'abasĩngĩrĩ, kutse busana n'abalume abakatetana, kutse abĩbĩ b'abandu, n'ababehĩ, n'abandu abakalega bandi, n'eyindi myatsi yosĩ eyikagana erĩkangĩrĩrya ly'ekwenene. 11Erĩkangĩrĩrya erĩ likabanika omo Ngulu Yowene eyo Nyamuhanga amba erĩtũlayo, kandi ĩkalũa uku Nyamuhanga w'olukengerwa n'ow'omũyĩsa. 12Ngaha Kristo Yesu Omukama wetu y'ewasĩngya, oyo wabirinyiha amaka busana n'omũbĩrĩ wage. Kusangwa mwanyiganza ng'oyuteregula, n'erĩnyĩhĩra oko mũbĩrĩ wuwe. 13Kera nabya nga mũtsũmĩ, n'oyũkamwendereraya, n'erimuletera omwaga. Nĩkwa Nyamuhanga mwanyiganyira kusangwa nakola omo butaminya, ĩsĩndĩnĩkĩrĩrya. 14Neryo Omukama mwanyĩkangya olukogo lunene kutsibu, kandi mwamba erĩkĩrĩrya, n'olwanzo, ebikabanĩka ukw'abo bakamatikana na Kristo Yesu. 15Ekĩ nĩ kĩnywa ky'ekwenene ekitolere erĩrĩgwa kiti, Kristo Yesu mwasa omo kihugo busana n'erĩlamya abakola-nabi. Nage mdi mukola-nabi kwilaba bosĩ. 16Nĩkwa busana n'omwatsi oyũ Nyamuhanga mwanyiganyira, neryo Yesu Kristo atoke erĩkangya eriyibombeka liwe busana nage, ĩngye mukola-nabi kwilaba abosĩ. Nyibye ekĩmĩnyĩsyo busana n'abosĩ abasyĩkĩrĩrya Kristo n'eribana engebe y'erikota. 17Neryo erĩsĩkya n'olukengerwa bya kera na kera bibye oko Mwami w'erikota, oyutehola, kandi oyutelolawako, ye Nyamuhanga ĩyowene-wene. Amina. 18Uwe Tĩmoteo, mwana wage, ngakũhĩrako erihana erĩ. Nalyo likakwama ebĩnywa by'obũmĩnyererĩ ebyo byakwahula erĩmbere. Ebyo byasyaleka iwalwa amalwa owene. 19Ũtegaye erĩkĩrĩrya lyawe n'obunya-mutima bubuya. Kusangwa abandi babirigana erihulikirira obunya-mutima bwabo, neryo babĩrĩtsandya erĩkĩrĩrya lyabo. 20Hĩmeneo na Alesandũro bali batya, neryo nage nabirihabo uku Satanĩ, ibatoka erĩkangĩrĩrĩbwa n'erireka eritsuma emyatsi ya Nyamuhanga.

will be added

X\