1 ABANYA TESALONĨKA 5

1Balĩkyetu, sihali bwaga bw'eribasakira ebarua erĩbowĩsya omwatsi w'emigulu kutse esyondambĩ sy'emyatsi eyĩ. 2Kusangwa nenyũ mũnasĩ ndeke-ndeke kw'ekiro ky'Omukama kyasyasa ng'omũrahĩ oyukasa omo kiro. 3Omugulu abandu bakabũga bati, Hali obuholo n'erĩyĩsyandira, neryo-neryo eritogota lyasyĩtabo! Nabo sibendisyabala n'ahake, lyasyahĩka ng'erikunda erĩkahĩka oko mũkalĩ. 4Nĩkwa ĩnywe balĩkyetu, simuli omo mwĩrĩmya, n'ekiro ekyo sĩkyangabahĩkako ng'omũrahĩ. 5Kusangwa ĩnywe bosĩ muli bana b'ekyakakala, kandi muli bana b'eritungi. Situli b'ekiro kutse ab'omwĩrĩmya. 6Neryo situbye tukagotsera ng'abandi ko bakakola; nĩkwa tubye ĩtũnalolĩre ĩtũnemũteya. 7Abakayato bakayato omo kiro, kandi abakakũnda bakakũnda omo kiro. 8Nĩkwa tuli bandu b'eritungi, tubye tũkateya. Twambale erĩkĩrĩrya n'olwanzo ng'obupa bw'ekĩkũba, kandi mwambale akakĩra k'amaha w'omulamo. 9Kusangwa Nyamuhanga mwatatũhĩra busana n'erihitana liwe, nĩkwa tubane omulamo busana n'Omukama wetu Yesu Kristo, 10Oyo watuholera itwatoka eribyaho haguma naye, kutse twamabya tũnalolĩre kutse twamabya twabirihola. 11Neryo mũsĩbĩkanaye, n'erĩhĩmbana, ngoko mukanakola. 12Tukabasaba, balĩkyetu, tuti mũsĩme abakakola kutsibu omo katĩkatĩ kenyũ, abo Mukama abiriyisoga eribasondola n'eribahana. 13Mukengebo kutsibu-tsibu omo lwanzo busana n'omũbĩrĩ wabo, Mubye n'obuholo omo katĩkatĩ kenyũ. 14Kandi tukabalemba-lemba, balĩkyetu, tuti muhane abakagalaganda, mũhamĩraye ab'omutima owasĩkerere, mũwatĩkaye abandu bosĩ, mubye n'omutima w'eriyibombeka busana n'abandu bosĩ. 15Mũlebaye ndeke sihabye mundu oyũkatũhũlaya ekibi oko kibi, nĩkwa mulenge erikolerana ebibuya, kandi mukole ebibuya oko bandu bosĩ. 16Mutseme emigulu yosĩ. 17Musabe butsira erĩũmbya. 18Muhe ewasĩngya omo myatsi yosĩ; kusangwa ni 'sonda lya Nyamuhanga busana nenyũ, ĩnywe mumatikene na Kristo Yesu. 19Sĩmũkũbakũbanaye Omũlĩmũ Abũyĩrĩre. 20Simupone erĩtũlago erĩkalũa uku Nyamuhanga. 21Nĩkwa mulenge emyatsi yosĩ; muhambane n'ebibuya, 22n'erisaga obuli mũsĩndo w'ekibi. 23Neryo Nyamuhanga oyukaha obuholo, iye abahigule ĩmwahĩkana. Kandi abategaye omo kĩrĩmũ kyenyũ, n'omutima wenyũ, n'omubiri wenyũ, imwabya butsira kahinira okw'ĩhĩka ly'Omukama wetu Yesu Kristo. 24Oyukababirikira sialiregula, neryo akandisyakola atya. 25Balĩkyetu, mutusabire netu. 26Mũkeraye abalĩkyetu bosĩ, n'eriwanako lĩbũyĩrĩre. 27Ngababwira omo hamũlĩ y'Omukama, nyiti, ebarua eyĩ isomawe oko balĩkyetu bosĩ. 28Olukogo lw'Omukama wetu Yesu Kristo lubye nenyũ.

will be added

X\