1 ABANYA TESALONĨKA 4

1Neryo balĩkyetu, momwiga ũkw'ĩtwe ngoko mutolere erirendera n'erĩtsemesya Nyamuhanga. Nenyũ mukanakola mutya. Nĩkwa lino tũkababũlaya, n'eribalemba-lemba busana n'Omukama Yesu, tuti mukole kwilaba aho. 2Kusangwa mũnasĩ amahano ayo, twabahago omo hamũlĩ y'Omukama Yesu. 3Erĩ ni 'sonda lya Nyamuhanga, ati anzĩre mubye bandu babũyĩrĩre, n'eriyihigula oko luteto. 4Obuli mundu angaminya erĩhĩkya omũkalĩ omo nzira ĩbũyĩrĩre n'ey'erĩsĩkĩbwa. 5Siakole omo ngumbu nyibi ng'Ebihanda ko bikakola, ebĩtasĩ Nyamuhanga. 6Neryo omundu sĩahalaye uku mũlĩkyabo kutse erĩmũtĩmbako omo myatsi eyĩ. Twabiribabwira erĩmbere n'eribahana kutsibu tuti, Nyamuhanga akasuyira abandu abakakola emyatsi yosĩ ng'eyĩ. 7Kusangwa Nyamuhanga mwatatubirikira busana n'erikwama oluteto, nĩkwa mwatubirikira erikwama ebĩbũyĩrĩre. 8Neryo oyukagana erĩkangĩrĩrya erĩ, sialigana bandu, nĩkwa akagana Nyamuhanga oyukabaha Omũlĩmũ Abũyĩrĩre. 9Sihali bwaga bw'eribasakira ebarua busana n'erianza abalĩkyetu abĩkĩrĩrye, kusangwa Nyamuhanga akabakangĩrĩraya ngoko mwanganzana. 10Kusangwa mukakola mutya oko balĩkyetu bosĩ omo kihugo kyosĩ ky'eMakedonĩa. Nĩkwa tukabalemba-lemba, balĩkyetu, tuti mukole mutya kwilaba aho. 11Kandi musonde erĩyĩkalira bolo, n'erĩyĩhĩra oko mũbĩrĩ wenyũ wowene, n'eriyikolera omo byala byenyũ, ngoko twabahana. 12Neryo imwatoka erĩsĩmwa n'abatĩkĩrĩrye, kandi simwendisyabya n'obwaga bw'ekindu. 13Balĩkyetu, twanzĩre imwaminya ndeke omwatsi w'abandu ababirihola, mũkasyakwa obũlĩge ng'abandi bandu abatawite maha. 14Kusangwa twamĩkĩrĩrya ko Yesu mwahola, kandi mwalũbũka. Litya tũkĩkĩrĩraya ko Nyamuhanga asyaleta haguma na Yesu ababirihola ĩbabĩrĩkĩrĩrya Yesu. 15Kusangwa tukababwira ekĩnywa ky'Omukama tuti ĩtwe, tukiriho, oko kiro ky'erĩhĩka ly'Omukama, sitwendisyatanga ababirihola. 16Nĩkwa hasyabya omulenge munene w'eribirikira, n'omulenge, w'omũlaĩka mukulu, n'omulenge w'engubi ya Nyamuhanga. N'Omukama asyandagala akalũa elubula; n'abahola ĩbabĩrĩkĩrĩrya Kristo basyatsũka erĩlũbũka. 17Neryo netu ĩtwe tuliho, twasyabakulwa haguma nabo omo bĩtũ erĩhĩndana n'Omukama omo kyanya. Neryo twasyabya haguma n'Omukama kera na kera. 18Neryo mũyĩkĩranaye omo bĩnywa ebĩ.

will be added

X\