1 ABANYA TESALONĨKA 3

1Neryo omugulu twataluka eriswayibombeka, motwaganĩrya nga lyowene erĩsĩgala ĩtwebene eAtene; 2n'erituma mũlĩkyetu Tĩmoteo, oyukakola haguma netu busana na Nyamuhanga omo mũbĩrĩ w'Engulu Yowene ya Kristo. Motwamutuma erĩbasĩkya n'erĩbahamĩrya omw'ĩkĩrĩrya lyenyũ, 3sihabya mundu oyukasuba enyũma busana n'amalĩge aya. Kusangwa ĩnywe mũnasĩ emyatsi eyĩ kw'ĩkatũhĩkako omw'isonda lya Nyamuhanga. 4Kandi omugulu twabya nenyũ twanabya tukababwira tuti twasyendererĩbwa; neryo ekyo mokyabererera, ngoko mũnasĩ. 5Busana n'omwatsi oyũ, omugulu nataluka eriswayibombeka, monabatumira Tĩmoteo, inatoka eriminya erĩkĩrĩrya lyenyũ, iningubaha nyiti mbino omũtebya abĩrĩbatebya, n'omũbĩrĩ wetu ĩnĩakwa busa. 6Nĩkwa lino Tĩmoteo abiriswasa akalũa ewenyũ, naye abirituletera engulu nyibuya y'erĩkĩrĩrya lyenyũ n'olwanzo lwenyũ, kandi ati mukatwibuka ndeke-ndeke emigulu yosĩ, kandi mũtũkwĩre olukando lw'eritulolako ngoko netu tũbakwĩre olukando lw'eribalolako. 7Busana n'omwatsi oyũ, balĩkyetu, twabĩrĩsĩbĩkĩbwa omo malĩge wetu n'erĩendererĩbwa lyetu. N'erĩkĩrĩrya lyenyũ lĩkatũhamĩraya. 8Neryo lino tukabyaho, mwamahangana ndeke n'erimatikana n'Omukama. 9Kusangwa lino tukatoka eriha Nyamuhanga ewasĩngya busana nenyũ. Tukamuha ewasĩngya busana n'obutseme bosĩ obo tũkayĩsyandiramo embere sya Nyamuhanga busana nenyũ. 10Tukasaba kutsibu omo kiro n'omw'itungi tuti tubaloleko n'erĩberererya ebyo bikabula omw'ĩkĩrĩrya lyenyũ. 11Nyamuhanga wetu ye Tata ĩyowene, n'Omukama wetu Yesu basondole enzira yetu erĩbahĩkako. 12Kandi Omukama aleke olwanzo lwenyũ lukanye n'eribwaga busana n'erianzana, na busana n'erianza bandu bosĩ, ngoko lwanzo lwetu luli busana nenyũ. 13Kandi Omukama asĩkaye emitima yenyũ imwabya abahĩkene n'ababũyĩrĩre embere sya Nyamuhanga wetu ye Tata, omugulu Omukama wetu Yesu asyasa haguma n'abandu buwe bosĩ.

will be added

X\