1 ABANYA TESALONĨKA 2

1Nenyũ, balĩkyetu, mũnasĩ ndeke, ngoko erĩhĩka lyetu ewenyũ molitabya busa. 2Neryo kandi mũnasĩ, nomo twanagalawa n'eritsumwa eFĩlĩpĩ, erĩmbere, Nyamuhanga mwatuha obulume-lume eribabwira Engulu Yowene ya Nyamuhanga, nomo bandu banatulwira kutsibu. 3Kusangwa erĩkangĩrĩrya lyetu si ry'amabehĩ, kutse busana n'endũndĩ eyitatolere, kutse si busana n'eriteba bandu. 4Nĩkwa, tũkakangĩrĩraya ngoko Nyamuhanga anzĩre ĩtwabũga, ng'abandu abakasĩmawa na Nyamuhanga erĩtũla Engulu Yowene. Sĩtwetsemesaya bandu, nĩkwa tũkatsemesaya Nyamuhanga oyũkalebaya emitima yetu. 5Kusangwa mũnasĩ ndeke, motũtabahĩkako omo bĩnywa by'ekĩsehya, kutse omo bĩnywa by'erĩyĩtendererya erĩbĩsa obururu. Nyamuhanga nĩ mũlangĩrĩ wetu! 6Motutasonda eripipwa n'abandu, kutse ĩnywe, kutse abandi, nomo twanabya n'ehamũlĩ ng'abakwenda ba Kristo. 7Nĩkwa motwayibombeka omo katĩkatĩ kenyũ n'erĩkangya obolo obo nyĩnya akakangaya omugulu akalembera abana buwe. 8Neryo kusangwa twabya tũbanzĩre kutsibu twabya twanzĩre erisangira nenyũ butsira Engulu Yowene ĩyoyene, nĩkwa n'esyongebe syetu nibya. Mwabya banze betu kutsibu! 9Balĩkyetu, nenyũ mukibuka erikola lyetu n'endũhĩ yetu, ngoko twakola omo kiro n'omo musibo tuti, sĩtũbalũhaye omugulu twabakangĩrĩraya Engulu Yowene ya Nyamuhanga. 10Inywe muli balangĩrĩ betu, na Nyamuhanga nibya, ngoko emikolere yetu omo katĩkatĩ kenyũ ĩnywe mũkĩkĩrĩraya, ngoko yabya ĩbũyĩrĩre, n'eyitunganene, n'eyite mo kahinira. 11Mũnasĩ ngoko twabakolera, obuli mundu omo katĩkatĩ kenyũ ng'ĩse kw'akakolera abana buwe. 12Motwabahana, motwabahamĩrya, motwabalemba-lemba, tuti imwalendera ngoko litolere embere sya Nyamuhanga, oyukababirikira erisangira obwami buwe n'olukengerwa luwe. 13Kandi busana n'omwatsi oyũ, tukaha Nyamuhanga y'ewasĩngya emigulu yosĩ. Tuti, omugulu twabaletera ekĩnywa kya Nyamuhanga, momũtowakyo n'eriangirirakyo ng'ekĩnywa ky'abandu, nĩkwa ngoko kiri kwenene, ekĩnywa kya Nyamuhanga. Kusangwa ni Nyamuhanga oyukakola omo katĩkatĩ kenyũ ĩnywe mũkĩkĩrĩraya. 14Kusangwa balĩkyetu, emyatsi eyo yahĩka omo makanĩsa wa Nyamuhanga eYũdea, n'oko bandu ba Kristo Yesu eyo; emyatsi eyo yamabahĩkako nenyũ. Momwalola oko malĩge omo byala by'abandu b'ekihugo kyenyũ, ngoko nabo mobagalwa omo byala by'Abayũda. 15Abayũda mobĩta Omukama Yesu, n'abamĩnyererĩ, kandi mobatwendererya. Sĩbetsemesaya Nyamuhanga, kandi bali n'obũyĩgũ oko bandu bosĩ. 16Bakalenga erĩtũkakĩrya erĩkangĩrĩrya abandu b'Ebihanda omwatsi owangaleterabo erilama. Neryo bakaberereraya olulengo lw'ebibi byabo. Nĩkwa erihitana lya Nyamuhanga lyamasala lyahĩka kubo ko kutsibu. 17Nĩkwa ĩtwe, balĩkyetu, omugulu twalũsĩbawa ũkw'ĩnywe omo katambĩ kake omo mubiri nĩkwa butsira omo mutima, twabya n'olukando lunene eribalolako. 18Motwanza kutsibu erĩbahĩkako. Ĩngye Paũlo, monalenga kandi n'akandi, nĩkwa Satanĩ moyatũkakĩrya. 19Kusangwa amaha wetu nindi, n'obutseme bwetu nindi, kutse akakĩra ak'eriyihalambira nindi kwehĩ? Sĩ nĩna nywe omugulu tuli embere sy'Omukama wetu Yesu okw'ĩhĩka liwe kwehĩ? 20Kwenene ĩnywe muli lukengerwa n'obutseme bwetu.

will be added

X\