1 PETERO 5

1Neryo, ngalemba-lemba abakulu omo katĩkatĩ kenyũ nga mũlĩkyenyũ mukulu. Kandi indi mũlangĩrĩ w'amagalĩ wa Kristo. Neryo nasyasangira olukengerwa olũkandĩsyabĩsũlwa. 2Mũlĩsaye esyombũlĩ sya Nyamuhanga esiri omo katĩkatĩ kenyũ. Mulemberesyo kusangwa mwanzĩre erikola mutya busana na Nyamuhanga, butsira erihatikanwa. Kandi simukole mutya busana n'erihembwa lisa, nĩkwa omo mũhwa w'erikola. 3Kandi simuyiyire nga mukatabala oko bandu abo mwahabawa erĩteya, nĩkwa mubye ebĩsosekanĩo busana n'ekihangulo. 4Neryo mugulu Omũlĩsya mukulu asyamĩnyĩkalĩbwa, mwasyabana embĩta y'olukengerwa olutekula. 5Nenyũ nibya ĩnywe balwana, mukenge abakulu benyũ. Kandi ĩnywe bosĩ mũyĩkehaye embere sy'abalĩkyenyũ, kusangwa kĩsakĩre kiti, Nyamuhanga akalwa n'abakayiheka, Nĩkwa akakanyaya olukogo oko bakayĩkehaya. 6Neryo mũyĩkehaye omo byala bya Nyamuhanga by'obũtokĩ, neryo ĩnĩabahamya oko mugulu atolere. 7Mũhĩre erĩhanga-hangya lyenyũ lyosĩ uku Nyamuhanga, kusangwa akabategaya. 8Mũlebaye, mũyĩtegaye! Kusangwa enzĩgũ yenyũ Satanĩ, ikagenda-genda ng'endale, eyikaruruma n'erisonda-sonda oyo yangalya. 9Mulwe nayo ĩmũnasĩkĩre omw'ĩkĩrĩrya lyenyũ, kusangwa mũnasĩ abalĩkyenyũ abali muna-kihugo ko bakagalawa batya. 10Neryo mwamabiagalwa akatambĩ, Nyamuhanga ow'olukogo losĩ oyo wababirikira erisangira olukengerwa luwe lw'erikota haguma na Kristo, asyabahĩkanĩa, n'erĩbasĩkya, n'eribaha amaka, n'erĩbahanganĩa ndeke. 11Obũtokĩ bubye buwe kera na kera. Amina. 12Nabiribasakira ebĩnywa bike ebĩ. Sĩlvano oyo ngahula ng'omũlĩkyetu oyuteregula abĩrĩnyĩwatĩkya erisakabyo. Kandi ngasonda erihanda emitima yenyũ n'erĩtũlago nyiti omwatsi oyũ ni lukogo lw'ekwenene lwa Nyamuhanga. Mũsĩke mulo. 13Ekanĩsa eyiri eBabelĩ, eyayisogawa haguma nenyũ, ĩkabakeraya. Kandi omwana wage ye Marĩko akabakeraya. 14Mũkeranaye n'eriwanako ly'olwanzo. Obuholo bubye nenyũ inywe bosĩ-bosĩ ko muwatene na Kristo.

will be added

X\