1 PETERO 4

1Neryo kusangwa Kristo abiriagalwa omo mubiri, nenyũ nibya mũyĩsũnze obũlengekanĩa obo, kusangwa oyukagalawa omo mubiri abĩrĩũmbya oko bibi. 2Nĩkwa lino omugulu mukineho omo mubiri, mukwame erisonda lya Nyamuhanga butsira esyongumbu sy'abandu. 3Kusangwa oko mugulu owalaba mwabirikwama endambĩ yingaho amalengekanĩa w'abatĩkĩrĩrye. Mwabya mukakwama erĩsĩngĩra, n'esyongumbu, n'erĩkũnda, n'eritamira, n'erĩyalũmba, n'esyonye sy'esyosanamu. 4Kandi ab'ebihanda bakasweka omugulu mutesangira nabo omo syonye syabo sy'eritamira, neryo bakabatsuma. 5Nĩkwa basyakanganĩa Nyamuhanga ebyo bakola, naye asĩkĩre erĩtwa esyombanza sy'abaliho n'esy'abaholĩre. 6Kusangwa Engulu Yowene yabĩrĩtũlwa ukw'abo babirihola, nomo babiritswerwa omo mubiri ng'abandu bosĩ ko bakatswerawa. Nĩkwa mwatũlayo kubo batoke eribyaho omo kĩrĩmũ ng'erisonda lya Nyamuhanga. 7Endũlĩ y'emyatsi yosĩ iri hakũhĩ. Neryo mubye n'obũlengekanĩa bw'amenge, n'obw'erĩyĩteya, imwatoka erisaba. 8Kwilaba emyatsi yosĩ, mũkwe omũhwa w'erianzana kutsibu, kusangwa olwanzo lũkakũnĩngĩra ebibi bingi. 9Mũkokanaye omo manyũmba wenyũ butsira eriyitonga-tonga. 10Obuli mundu abirihabwa olũsũnzo lw'omũsĩndo olũkalũa uku Nyamuhanga. Mukolerane omo lũsũnzo olo, ng'abateya b'olũsũnzo mĩsĩndo-mĩsĩndo Nyamuhanga akatuha. 11Oyũkatũlago, atũle ebĩnywa bya Nyamuhanga. Oyukakola omũbĩrĩ, akolego omo maka ago Nyamuhanga akamuha. Neryo omo myatsi yosĩ Nyamuhanga apipawe busana na Yesu Kristo. Olukengerwa n'obũtokĩ ni biwe kera na kera. Amina. 12Abanze, simusweke busana n'erirengwako erĩkalĩre erĩkabahĩkako nga ni kindu ky'ehandi busana nenyũ. 13Nĩkwa mutseme kusangwa mukasangira amalĩge wa Kristo. Neryo omugulu olukengerwa luwe lwasyabĩsũlwa, imwatoka eritsema n'eritsanga. 14Mwamatsumwa kusangwa mukakwama Kristo, muli n'omũyĩsa, kusangwa Omũlĩmũ w'olukengerwa, w'Omũlĩmũ wa Nyamuhanga ĩkere nenyũ. 15Nĩkwa sihabye mundu omo katĩkatĩ kenyũ oyukagalawa ng'omwĩtĩ, kutse ng'omũrahĩ, kutse ng'omũkolĩ w'ebibi, kutse oyũkayĩhĩra omo myatsi ya bene. 16Nĩkwa omundu amagalwa kusangwa ni Mukristo, sĩakwe esĩsonĩ, nĩkwa apipe Nyamuhanga busana n'eribya Mukristo. 17Kusangwa omugulu w'eritswera abandu ba Nyamuhanga abĩrĩhĩka. Neryo eritswera eryo lyamatsũka ũkw'ĩtwe, endũlĩ y'abandu abatetsomana Engulu Yowene ya Nyamuhanga yasyabya yiti kwehĩ? 18Ngoko Amasako akabũga ati, Lyamakala busana n'omundu utunganene erĩlamĩbwa, Oyutekenga Nyamuhanga, n'omukola-nabi, basyabya bati kwehĩ? 19Neryo abakagalawa busana n'erisonda lya Nyamuhanga, bahĩre emitima yabo omo byala by'Omũhangĩkĩ oyuteregula, babye bakakola ekitunganene.

will be added

X\