1 PETERO 3

1Litya nenyũ ĩnywe bakalĩ, mowe abĩba nywe, neryo abatĩowa ekĩnywa kya Nyamuhanga batoke erĩsĩngwa n'erĩkĩrĩrya busana n'emigendere y'abakalĩ babo, isibetabwirwa ekĩnywa n'ekiguma. 2Kusangwa bakalebaya emigendere yenyũ mibuya eyikakenga. 3N'obubuya bwenyũ sibubye obw'eyĩhya, ng'eriluka esyonzwiri, n'eriambala emisege y'esyamagetsi, n'eriambala emyambalire yowene. 4Nĩkwa obubuya bwenyũ bubye bw'omutima owali omwisi w'omundu. Bubye obubuya bw'ekĩrĩmũ ekihehere n'eky'obũkũtũ, ekitetsanda. Obubuya obo ni bw'obũgũlĩ bunene embere sya Nyamuhanga. 5Kusangwa litya kera abakalĩ babũyĩrĩre, abahĩra amaha uku Nyamuhanga, babya bakayĩsũga, n'erĩowa abĩba wabo. 6Sara naye mwowa Abrahamũ, n'erimwahula mo mukama. Nenyũ muli bana buwe mwamakola n'eritendiubaha kindu. 7Nenyũ abĩba wabo nibya, mwĩkale n'abakalĩ benyũ omo menge, ĩmũnasĩ abakalĩ ko bali bolo. Kandi mũsĩkayebo, kusangwa basyabana haguma nenyũ olũsũnzo lwa Nyamuhanga lw'engebe, neryo mukole mutya erisaba lyenyũ sĩrĩkakĩrĩbawe. 8Omo myatsi yosĩ eyĩ tuti, Ĩnywe bosĩ mubye n'obũlengekanĩa buguma, n'omutima muguma, mwanzane ng'abasubeneko, mubye n'omutima mubuya, kandi mũyĩkehaye. 9Sĩmũtũhũlaye ekibi busana n'ekibi, kutse eritsuma busana n'eritsuma, nĩkwa kumbe mutsumulebo. Kusangwa Nyamuhanga mwababirikira busana n'omwatsi oyũ, imwabana eritsumula eryo alaga. 10Ngoko Amasako ati, Oyo wanzĩre eritsemera engebe, n'eribana ebiro byowene, Olulimi luwe lũmbaye erĩbũga ekibi, n'emĩnywa yiwe yũmbaye eriteba. 11Ahũtatire ekibi, akole ebibuya; Asonda-sondaye obuholo, n'erikwamirirabo. 12Kusangwa ameso w'Omwami Mukulu akatungerera abatunganene, Kandi amatwĩ wuwe akowa erisaba lyabo. Nĩkwa Omwami Mukulu akalola abakola-nabi b'ebitsule. 13Nindi asyabakola nabi mwamabya n'omũhwa w'erikola ebibuya kwehĩ? 14Kandi nomo mwangagalwa busana n'erikola ekitunganene, muli bandu b'obutseme. Simubahe erĩũbahya lyabo, kandi sĩmũhahũkaye emitima. 15Nĩkwa omo mitima yenyũ mukenge Kristo ng'Omukama wenyũ. Ĩmũnasĩkĩre endambĩ yosĩ erĩsũbĩrya obuli mundu oyũkababũlaya busana n'amaha ago muli nago. 16Nĩkwa mũmũsũbĩraye bolo-bolo, n'erimukenga. Kandi mubye n'obunya-mutima bowene, neryo omugulu bakabanegulira, n'eritsuma emigendere yenyũ y'obuKristo, bĩtawe esĩsonĩ. 17Kusangwa lyowene ndeke imwagalwa busana n'erikola ebibuya omw'isonda lya Nyamuhanga, kwilaba erikola nabi. 18Kusangwa Kristo mwahola busana nenyũ engendo nguma nyisa busana n'ebibi. Omundu mutunganene mwahola busana n'abandu batatunganene, iniatoka erituleta uku Nyamuhanga. Kandi mwĩtwa oko mubiri nĩkwa mwabana engebe omo kĩrĩmũ. 19Kandi mwagenda omo mũlĩmũ, mwayatũlago oko bĩrĩmũ ebiri omo mũlĩkĩ. 20Ebĩrĩmũ ebĩ byabya ĩsĩbĩrĩowa Nyamuhanga, omugulu abya akalindabo omo butaluha oko biro ebyo Noa abya akahĩmba obwato. N'omo bwato obo abandu bake, omunani musa, mobalamĩbwa omo magetsi ayo. 21Omwatsi oyo nĩ kĩsosekanĩo ky'olũbatĩso busana n'erilama lyenyũ. Erĩbatĩsya sĩ 'lũsya ly'emĩtĩndũ y'omubiri, nĩkwa ni 'laga Nyamuhanga omo bunya-mutima bowene, erĩlamĩbwa busana n'erĩlũbũka lya Yesu Kristo. 22Yesu Kristo abiriya elubula, kandi ali oko byala by'amali bya Nyamuhanga; iniabiritabala oko bamalaĩka, n'ab'ehamũlĩ b'elubula n'ab'amaka.

will be added

X\