1 PETERO 2

1Neryo mũyĩlũsaye kw'ebibi byosĩ, n'eribiha lyosĩ, n'erĩyĩtendererya, n'eritsura, n'erirega abandi ryosĩ. 2Mubye ng'esyomekeke, imukasonda kutsibu amasabũ agowene busana n'omutima, imwatoka eriusuka busana n'erilama. 3Ngoko kĩsakĩre kiti, Mwabĩrĩgerya oko bubuya bw'Omukama. 4Neryo mwase oko Mukama oyuli erĩbwe eriwite engebe, eryaganawa n'abandu, nĩkwa eryayisogawa na Nyamuhanga, ng'erĩbwe ery'obũgũlĩ bunene. 5Mwase ng'amabwe awawite engebe, mũhĩmbawe mo hekalũ y'ekĩrĩmũ, mubye abahererĩ babũyĩrĩre, abakaherera esyohongo sy'ekĩrĩmũ busana na Yesu Kristo, esĩkatsemesaya Nyamuhanga. 6Kusangwa Amasako akabũga ati, Lebaya ngahĩmba eSĩonĩ, erĩbwe nayisoga, Erĩbwe ry'enũnga, ery'obũgũlĩ bunene, N'oyũkamwĩkĩrĩraya sĩendĩsyakwa esĩsonĩ. 7Erĩbwe erĩ, nĩ ry'obũgũlĩ bunene busana nenyũ abakĩkĩrĩraya. Nĩkwa busana n'abatĩkĩrĩraya, ati, Erĩbwe eryo bahĩmbĩ babana nga ni buyira, Lyabiribya erĩbwe erĩkatũngananaya enũnga y'enyũmba. 8Kandi Amasako ati, Nĩ rĩbwe ly'erĩtwĩkalya abandu, Nĩ rĩbwe ly'erĩtoya abandu. Bakatwĩkala kusangwa mobatĩkĩrĩrya ekĩnywa; kandi lyabya erisonda lya Nyamuhanga. 9Nĩkwa ĩnywe muli kihanda ekyayisogawa, abahererĩ b'obwami, ekihanda kĩbũyĩrĩre, abandu ba Nyamuhanga, imwatoka erĩkangya emĩbĩrĩ mibuya ya Nyamuhanga, oyo wababirikira erĩlũa omo mwĩrĩmya n'eriingira omo kyakakala kiwe ky'eriswekera. 10Kusangwa simwabya bandu, nĩkwa lino muli bandu ba Nyamuhanga; mwabya isimwetabana eriganyira lya Nyamuhanga, nĩkwa lino mwabiribana eriganyira liwe. 11Abanze betu, ngabalemba-lemba ng'ababunga n'abagendĩ, mugane erikwama esyongumbu sy'omubiri esikalwa n'omutima. 12Muyire emigendere mibuya omo katĩkatĩ k'Ebihanda, neryo nomo bangabatsuma ng'abakola-nabi, nĩkwa omugulu bakalangira emĩbĩrĩ yenyũ mibuya, ibapipa Nyamuhanga oko kiro ky'eritswerwa. 13Mowe abatabalĩ ba muna-kihugo busana n'Omukama, kutse ni mwami oyuwite ehamũlĩ yosĩ, 14kutse abatabalĩ bakulu buwe abakatumawa erisuyira abakola-nabi n'eripipa abakakola ndeke. 15Kusangwa erisonda lya Nyamuhanga liti omw'ikola ndeke mũsĩnge ebĩnywa bitya-bitya by'abandu bakĩrũ. 16Mukole ng'abandu b'obwĩranda nĩkwa simuyire obwĩranda bwenyũ ng'ekindu ky'erĩbĩsa ekibi, mubye bakobe ba Nyamuhanga. 17Mũsĩkaye abandu bosĩ. Mwanze abalĩkyetu Abakristo, mukenge Nyamuhanga, kandi mũsĩkaye omwami. 18Abagombe, mubye mũkowa abakama benyũ n'erikengabo ndeke, butsira abakama babuya n'ab'omutima molo basa, nĩkwa abakama bakalĩre. 19Omundu akasĩmawa na Nyamuhanga amayĩyĩnĩa omo bulĩge ate ko lubanza, kusangwa akakola erisonda lya Nyamuhanga. 20Nĩkwa endũndĩ ni yahi mwamayĩyinĩa omugulu bakabahũnza busana n'ebibi mukakola kwehĩ? Nĩkwa mwamakola ndeke, neryo mũkayĩyĩnĩa omugulu mukagalawa, Nyamuhanga asyabatsumula busana n'ekyo. 21Kusangwa Nyamuhanga ababirikira busana n'omwatsi oyũ. Kusangwa Kristo nibya mwagalwa busana nenyũ, neryo mwabasĩgĩra olugobe olo mwangakwama. 22Ngoko kĩsakĩre kiti, Mwatakola ekibi, kutse amatebo mwatabanika omo mĩnywa yiwe. 23Kandi omugulu atsumawa, mwataswatsumabo, omugulu agalawa mwatũbahya, nĩkwa mwayĩhĩra omo byala by'oyukatswera ebitunganene, ye Nyamuhanga. 24Kristo ĩyowene-wene mwaheka ebibi byetu omo mubiri wuwe oko musalaba, itwatoka erihola oko bibi, n'eribyaho busana n'ekitunganene; kusangwa mwalamĩbawa omo mĩbĩbũ yiwe. 25Kusangwa mwabya ng'esyombũlĩ esyatala, nĩkwa lino mwabirisuba oko Mũlĩsya n'Omũteya w'emitima yenyũ.

will be added

X\