1 PETERO 1

1Ĩngye Petero, omukwenda wa Yesu Kristo, ngabasakira ĩnywe bandu abo Nyamuhanga ayisoga, abĩkere ng'abasayĩ, abapanza-panzirawa omo bihugo by'ePonto, n'eGalatĩa, n'eKapadokĩa, n'eAsĩa, n'eBetanĩa. 2Nyamuhanga Tata, mwabaminya kera n'eriyisoga nywe. Omũlĩmũ Abũyĩrĩre iniabiribahigula, imwatoka erĩowa Yesu Kristo n'erĩerĩbwa omo musasi wuwe. Olukogo n'obuholo bibye nenyũ kutsibu. 3Tupipe Nyamuhanga ye Tata w'Omukama wetu Yesu Kristo! Busana n'eriganyira liwe lĩnene, abiriswatubuta kandi n'erituha engebe eyiri n'amaha busana n'erĩlũbũka lya Yesu Kristo oko baholĩ. 4Neryo tukalindirira eribana emĩyĩsa mibuya eyo Nyamuhanga akabikira abandu buwe. Abiribabikira emĩyĩsa eyo elubula, aho itehonda kutse eritsanda kutse erikeha. 5Emĩyĩsa eyo ni busana nenyũ abakateyĩbawa omo maka wa Nyamuhanga busana n'erĩkĩrĩrya lyenyũ, imukalindirira erilama eryo likandisyabĩsũlwa oko mugulu w'enyũma-nyũma. 6Ekĩ kikaleka imwatsema kutsibu, na lino litolere ĩmwakwa obũlĩge omw'irengwako mĩsĩndo-mĩsĩndo. 7Neryo erirengwako eryo lĩkamĩnyĩsaya erĩkĩrĩrya lyenyũ. Esyamagetsi sikanahera, nasyo sikalengawako omo muliro. Neryo erĩkĩrĩrya lyenyũ eriwite enzwere nene kwilaba esyamagetsi, litolere iryalengwako. Neryo mwasyabana eripipa n'olukengerwa, n'erĩsĩkĩbwa oko kiro ekyo Yesu Kristo asyabĩsũlwa. 8Neryo mukanza Yesu Kristo nomo mutetamulolako, kandi mũkamwĩkĩrĩraya nomo mutetamulangira lino, kandi mukatsema kutsibu n'obutseme obutetoka eriahulwa, obuwite olukengerwa. 9Kusangwa mukabana endũlĩ y'erĩkĩrĩrya lyenyũ, omulamo w'emitima yenyũ. 10Abamĩnyererĩ mobasonda-sonda n'erĩbũlĩrĩrya omwatsi w'erilama erĩ. Neryo mobaminyerera omwatsi w'olũsũnzo lw'olukogo olo Nyamuhanga angabaha. 11Kandi mobalenga eriminya ng'Omũlĩmũ wa Kristo, omwisi wabo, abya akahula emyatsi yahi kutse mugulu wahi. Kusangwa Omũlĩmũ abya akaminyerera amalĩge wa Kristo, n'olukengerwa olwasyakwama amalĩge ayo. 12Nyamuhanga mwabĩsũlĩra abamĩnyererĩ aba ngoko mũbĩrĩ wabo siabya busana nabo ĩbobene, nĩkwa busana nenyũ, omugulu babũga emyatsi eyo mwabĩrĩowa. Kandi abakwenda b'Engulu Yowene, ababũga omo maka w'Omũlĩmũ Abũyĩrĩre owatumawa erĩlũa elubula, mobababwira eby'ekwenene ebĩ. Kandi emyatsi eyĩ abamalaĩka banzĩre eriminyayo. 13Neryo mubye n'amalengekanĩa w'erikola omũbĩrĩ. Mũyĩtegaye, mũhĩre amaha wenyũ ndeke oko lukogo olo Yesu Kristo asyabaletera ekiro asyabĩsũlwa. 14Mubye bana abakowa Nyamuhanga. Simusyekwama esyongumbu esyo mwabya mukakwama erĩmbere omo butaminya bwenyũ. 15Nĩkwa mubye babũyĩrĩre omo migendere yenyũ, nga Nyamuhanga oyo wababirikira abũyĩrĩre. 16Kusangwa Amasako ati, Mwasyabya babũyĩrĩre, ngoko nage nyĩbũyĩrĩre. 17Omugulu mukasaba Nyamuhanga, mukamwahula mo Tata, oyukatswera obuli mundu, butsira obutaga, ng'emĩbĩrĩ yiwe kw'iri; mulendere n'erikenga Nyamuhanga omugulu mukine omo kihugo kino. 18Kusangwa mũnasĩ momũtatongolĩbwa oko mitsye mitya-mitya n'emigendere y'abotata-kulu wenyũ, omo bindu ebikahera, ng'ebĩtsĩpa kutse esyamagetsi. 19Nĩkwa mwatongolĩbawa omo musasi wa Kristo, ow'obũgũlĩ bunene, naye abya ng'ekyana ky'embũlĩ ekite kw'ekĩtĩngũ kutse bulema. 20Kusangwa Nyamuhanga ayisoga Kristo ekihugo kite kyahangikwa. Nĩkwa abirihuluka omo biro ebĩ by'enyũma-nyũma busana nenyũ. 21Neryo busana na Kristo mwabĩrĩkĩrĩrya Nyamuhanga oyo wamũlũbũkaya oko baholĩ n'erimuha olukengerwa. Neryo erĩkĩrĩrya lyenyũ n'amaha wenyũ ibyabya uku Nyamuhanga. 22Neryo kusangwa mwabĩrĩerya emitima yenyũ, busana n'erĩowa omwatsi w'ekwenene, kandi mwabiribya n'olwanzo olute n'eriteba busana n'abalĩkyetu, lino litolere imwanzana n'emitima yenyũ yosĩ n'omũhwa. 23Kusangwa mwabiributwa buhya-buhya, butsira omo mbuto eyikahonda, nĩkwa omo mbuto eyitehonda, kye kĩnywa kya Nyamuhanga, ekiri mw'engebe, kandi ekikakota. 24Ngoko kĩsakĩre kiti, Abandu bosĩ bali ng'ebiti by'omolĩ, N'obubuya bwabo buli ng'omusanga w'ebiti. Ebiti bikuma n'omusanga wabyo akalagala. 25Nĩkwa ekĩnywa ky'Omukama kikakota, Ekĩ kyo kĩnywa ky'Engulu Yowene ekyatũlawa ũkw'ĩnywe.

will be added

X\