1 YOANE 4

1Abanze betu, sĩmwĩkĩrĩraye obuli kĩrĩmũ, nĩkwa mulenge oko bĩrĩmũ by'abandu erĩrebya nga bĩkalũa uku Nyamuhanga; kusangwa abamĩnyererĩ bangi b'amabehĩ babiriyitsatsanga omo kihugo. 2Busana n'ekĩ mwasyaminya nga nĩ Mũlĩmũ wa Nyamuhanga: obuli mundu oyũkalĩgago ati, Yesu Kristo abĩrĩhĩka omo mubiri w'abandu, awite Omũlĩmũ owakalũa ewa Nyamuhanga. 3Nĩkwa obuli mundu oyũterĩga Yesu siawite Omũlĩmũ owakalũa uku Nyamuhanga. Ekĩrĩmũ ekĩ nĩ nzĩgũ ya Kristo. Nenyũ mwabĩrĩowa enzĩgũ eyo kw'ikasa, na lino ine omo kihugo. 4Bana bage balere, ĩnywe muli ba Nyamuhanga, kandi mwabĩrĩkĩnda abamĩnyererĩ b'amabehĩ abo. Kusangwa Omũlĩmũ owali omwisi wenyũ ni mukulu, alengĩre ekĩrĩmũ ekiri omo bandu b'ekihugo. 5Aba ni bandu b'ekihugo, bo bakabũga emyatsi y'ekihugo, n'ekihugo kĩkowabo. 6Ĩtwe tuli ba Nyamuhanga, n'oyo wasĩ Nyamuhanga akatowa. Kandi oyute wa Nyamuhanga sĩalĩtowa. Ũmw'ekĩ tukaminya Omũlĩmũ w'ekwenene, n'ekĩrĩmũ ky'eriteba. 7Abanze betu, twanzane, kusangwa olwanzo lũkalũa uku Nyamuhanga. Obuli mundu oyukanza, Nyamuhanga abirimubuta, kandi asĩ Nyamuhanga. 8Oyutianza sialitaminya Nyamuhanga. kusangwa Nyamuhanga ni Lwanzo. 9Olwanzo lwa Nyamuhanga lwabiriminyikala ũkw'ĩtwe omo mwatsi ono, ati, Nyamuhanga mwatuma Mugala mubutwa muguma wuwe omo kihugo, itwatoka eribana engebe busana naye. 10Olwanzo lolũ; butsira ambu ĩtwe twanza Nyamuhanga, nĩkwa iye mwatwanza, mwatuma Omugala wuwe eribya mbanulo busana n'ebibi byetu. 11Abanze betu, Nyamuhanga amatwanza atya, netu litolere itwanzana. 12Sihali mundu oyo walola uku Nyamuhanga na kera, nĩkwa twamanzana, Nyamuhanga amatikene netu, kandi olwanzo luwe lwabĩrĩhĩkana omwisi wetu. 13Nyamuhanga abirituha Omũlĩmũ wuwe, kikaleka itwaminya ko tumatikene na Nyamuhanga, kandi ko Nyamuhanga amatikene netu. 14Netu twabirilangira, kandi tũkatũlago ko Tata abirituma Mugala wuwe eribya Mũlamya w'ekihugo. 15Kandi oyũkalĩga ati, Yesu ni Mugala wa Nyamuhanga, neryo Nyamuhanga amatikene naye, kandi naye amatikene na Nyamuhanga. 16Netu twabiriminya, kandi twĩkĩrĩrye olwanzo olo Nyamuhanga abiritwanzamo. Nyamuhanga ni lwanzo, n'oyuli n'olwanzo amatikene na Nyamuhanga, kandi Nyamuhanga amatikene naye. 17Neryo olwanzo lũkahĩkana omwisi syetu, itwatoka erĩsĩka oko Kiro ky'eritswerwa. Kusangwa ngoko Kristo ali, netu ko tuli tutya omo kihugo kino. 18Sihali eriubaha omo lwanzo; nĩkwa olwanzo olũhĩkene lukahiga eriubaha lyosĩ. Oyukubaha syalĩtahĩkana omo lwanzo, kusangwa eriubaha lĩkahĩka busana n'erisuyirwa. 19Tukanza, kusangwa Nyamuhanga mwatsũka eritwanza. 20Omundu amabũga ati, Nyanzĩre Nyamuhanga, ĩnĩakakwa mũlĩkyabo y'obusu ini mũbehĩ. Kusangwa oyũtanzĩre mũlĩkyabo oyo abirilolako, siangatoka erianza Nyamuhanga oyo ate atalolako. 21Kandi Kristo mwatuha ekihano ekĩ ati, Oyo wanzĩre Nyamuhanga, anze n'omũlĩkyabo nibya.

will be added

X\