1 YOANE 3

1Mulangire ngoko Tata abiritwanza kutsibu, kusangwa tukahulawa mo bana ba Nyamuhanga; ko tune tutya. Busana n'omwatsi oyũ; ekihugo sĩkĩtwasĩ, kusangwa mokitetaminya Nyamuhanga. 2Abanze betu, lino tuli bana ba Nyamuhanga, nĩkwa sikyetaminyikala ngoko twasyabya. Nĩkwa tũnasĩ ekiro Kristo asyabutuka, twasyamusosa, kusangwa twasyamulolako ngoko ali. 3N'obuli mundu oyuli n'amaha aya uku Kristo, akayihigula oko bibi, ngoko Kristo abũyĩrĩre. 4Oyukakola ebibi akaketa Emigambo ya Nyamuhanga. Kusangwa ekibi ni 'keta Emigambo. 5Kandi mũnasĩ ngoko Kristo kw'aminyikala erĩlũsya ebibi by'abandu; kandi Kristo siali kw'ekibi. 6Sihali mundu oyumatikene na Kristo oyukakola ebibi. N'oyukakola ebibi, isialitamulolako n'ahake, kutse erimuminya. 7Bana bage balere, simuleke omundu akabateba. Omundu oyukakola ebitunganene, atunganene ngoko Kristo naye atunganene. 8Nĩkwa oyukakola ebibi ni w'eSatanĩ, kusangwa Satanĩ atula akakola ebibi erĩtsũka erĩmbere. Omugala wa Nyamuhanga mwaminyikala busana n'omwatsi oyũ w'erĩherya emĩbĩrĩ y'eSatanĩ. 9Obuli mundu oyukabutawa na Nyamuhanga sialikola ebibi, kusangwa awite obuNyamuhanga omwisi wuwe; neryo sialitoka erikola ebibi, kusangwa Nyamuhanga ni Tata wuwe. 10Ũmw'ekĩ abana ba Nyamuhanga n'abana b'eSatanĩ baminyikere. Oyutekola ebitunganene, kutse omundu oyũtanzĩre mũlĩkyabo, abo si bana ba Nyamuhanga! 11Kusangwa omwatsi ogo mwowa erĩtsũka erĩmbere goyũ: Twanganzana. 12Situbye nga Kaĩna, oyo wabya w'Omubi Oyo, neryo mwĩta mulumuna wuwe. Neryo mwamwĩta busana nakĩ kwehĩ? Kusangwa emĩbĩrĩ ya Kaĩna yabya mibi, nĩkwa eya mulumuna wuwe yabya itunganene. 13Neryo balĩkyetu, simusweke abandu b'ekihugo bamabakwa obusu. 14Ĩtwe tũnasĩ ko twabĩrĩlũa oko luholo, n'eribana engebe, twasĩ tutya kusangwa tukanza abalĩkyetu. Oyutianza ĩkere omo luholo. 15Obuli mundu oyũkakwa mũlĩkyabo y'obusu nĩ mwĩtĩ, kandi mũnasĩ ko hate mwĩtĩ oyuwite engebe y'erikota omwisi wuwe. 16Tukaminya olwanzo ko luli lutya, tuti Kristo mwaha engebe yiwe busana netu. Netu litolere itwaha esyongebe syetu busana n'abalĩkyetu. 17Omundu oyuwite ebindu by'ekihugo kino, neryo akalangira mũlĩkyabo ali n'obwaga, ĩnĩakakalaya omutima wuwe n'erĩmwĩma, awite olwanzo lwa Nyamuhanga omo mutima wuwe mo ati kwehĩ? 18Bana bage, simwanze omo bĩnywa kutse omo lulimi lusa, nĩkwa twanze omo mĩbĩrĩ n'ekwenene. 19Busana n'ekĩ twasyaminya ko tuli b'omwatsi w'ekwenene, n'emitima yetu yasyasĩka embere sya Nyamuhanga. 20Kusangwa omutima wetu amatuhandikirira, Nyamuhanga ni mukulu, alengĩre emitima yetu, kandi asĩ emyatsi yosĩ. 21Abanze, omutima wetu amatindatũsĩnga, tuwite erĩsĩka embere sya Nyamuhanga. 22Kandi tukabana ebyosĩ ebyo tũkamũbũlaya, kusangwa tukakwama ebihano biwe, kandi tukakola emyatsi eyo eyĩkamũtsemesaya. 23Neryo ekihano kiwe kiti twĩkĩrĩraye erĩna ly'Omugala wuwe Yesu Kristo, n'erianzana, ngoko Kristo atuhana. 24Kandi oyukakwama ebihano biwe, amatikene na Kristo, na Kristo amatikene naye. N'Omũlĩmũ ogo atuha akaleka itwaminya kw'amatikene netu.

will be added

X\