1 YOANE 2

1Ĩnywe, abana bage balere, ngabasakira emyatsi eyĩ, isimwakola ebibi. Nĩkwa omundu amakola ekibi, tuwite Embũyĩ uku Tata, ye Kristo oyutunganene. 2Kandi Kristo ni mbanulo busana n'ebibi byetu, kandi si busana n'ebibi byetu bisa, nĩkwa busana n'ebibi by'ekihugo kyosĩ. 3Twamateya ebihano bya Nyamuhanga, tukaminya ko tũmwasĩ. 4Omundu amabũga ati, Nymamwasĩ, isialikenga ebihano biwe, oyo nĩ mũbehĩ, kandi sialikwama omwatsi w'ekwenene. 5Nĩkwa omundu oyukakenga ekĩnywa kiwe, kwenene olwanzo luwe busana na Nyamuhanga lwabĩrĩhĩkana. Busana n'ekĩ tũnasĩ ndeke ko tuwatene na Nyamuhanga. 6N'oyũkabũga ati awatene na Nyamuhanga, litolere naye inialendera ngoko Kristo alendera. 7Abanze betu, sindibasakira ekihano kihya-kihya, nĩkwa ni kihano kya kera, ekyo mutula nakyo okw'ĩtsũka. Ekihano kya kera nĩ kĩnywa ekyo mwowa. 8Nĩkwa kandi ekihano ekyo ngabasakira ni kihya-kihya, n'ekwenene yakyo ikalolawako omwisi wa Kristo n'omwisi wenyũ nibya. Kusangwa omwĩrĩmya akalenga, n'ekyakakala ky'ekwenene kĩnemũkolerya. 9Oyũkabũga ati akalendera omo kyakakala, nĩkwa akakwa mũlĩkyabo y'obusu anemulendera omo mwĩrĩmya erĩhĩka lino. 10Nĩkwa oyo wanzĩre mũlĩkyabo akasiba omo kyakakala, kandi siawite omwatsi owakaleka ogundi mundu miakola ebibi. 11Nĩkwa oyũkakwa mũlĩkyabo y'obusu, ali omo mwĩrĩmya, kandi akalendera omo mwĩrĩmya, ĩsĩasĩ eyo akaya, kusangwa omwĩrĩmya abirimuyira mo ndĩmatĩme. 12Ngabasakira ĩnywe bana balere, kusangwa ebibi byenyũ byabiribuyirwa busana n'erĩna lya Kristo. 13Ngabasakira ĩnywe, abotata, kusangwa mũnasĩ oyutula okw'ĩtsũka. Ngabasakira ĩnywe balwana, kusangwa mwabĩrĩkĩnda Omubi Oyo. 14Ngabasakira, ĩnywe bana, kusangwa mũnasĩ Tata. Nabiribasakira ĩnywe abotata, kusangwa mũnasĩ oyutula okw'ĩtsũka. Nabiribasakira, ĩnywe balwana, kusangwa muli b'amaka, n'ekĩnywa kya Nyamuhanga kikasiba omwisi wenyũ. Kandi mwabĩrĩkĩnda Omubi Oyo. 15Simwanze ekihugo, kutse emyatsi ey'ekihugo. Omundu amanza ekihugo siawite olwanzo lwa Tata. 16Kusangwa ebyosĩ bya muna-kihugo, esyongumbu sy'omubiri, kandi esyongumbu sy'ameso, kandi emiyiheko y'abandu, ebyosĩ ebĩ ni by'ekihugo, sĩbyelũa uku Tata. 17N'ekihugo, n'esyongumbu syakyo, byasyahwa. Nĩkwa oyukakola erisonda lya Nyamuhanga asyakota kera na kera. 18Bana bage, ni mugulu w'endũlĩ. Mwabĩrĩowa ngoko enzĩgũ ya Kristo yasyasa. Na lino esyonzĩgũ nyingi sya Kristo syabĩrĩhĩka; busana n'ekĩ tũnasĩ kw'ali mugulu w'endũlĩ. 19Abandu aba sibabya b'ũkw'ĩtwe, kyaleka ĩbatũlũako. Kusangwa kumbe babya b'ũkw'ĩtwe, nga babĩrĩsĩgala netu. Nĩkwa mobagenda ikyaminyikala ndeke abosĩ abo ko bate b'ũkw'ĩtwe. 20Nĩkwa Kristo abĩrĩbũtũlĩra Omũlĩmũ Abũyĩrĩre, neryo mũnasĩ ndeke omwatsi w'ekwenene. 21Sinditabasakira kusangwa sĩmwasĩ omwatsi w'ekwenene, nĩkwa kusangwa mũnasĩgo. N'akandi kusangwa mũnasĩ ko hate eribiha erĩkalũa oko mwatsi w'ekwenene. 22Omũbehĩ nindi kwehĩ? Yo n'oyukagana Yesu kw'ali Kristo. Enzĩgũ ya Kristo yeyĩ, yo yukagana Tata n'Omugala. 23Kusangwa oyukagana Omugala siawite Tata nibya, n'oyũkalĩga Omugala awite Tata nibya. 24Neryo ĩnywe, mubike omo mitima yenyũ omwatsi ogo mwowa erĩmbere. Neryo omwatsi ogo mwowa erĩmbere amabya abĩkĩre omo mitima yenyũ, nenyũ mwasyamatikana n'Omugala na Tata. 25Kandi erilaga eryo Kristo abirituha lyerĩ, ye ngebe y'erikota. 26Nabiribasakira emyatsi eyĩ busana n'abo abakalenga erĩbatalya. 27Nĩkwa Kristo abĩrĩbũtũlĩra Omũlĩmũ wuwe, naye ĩkere omwisi wenyũ; isimuli n'obwaga bw'erĩkangĩrĩrĩbwa n'omundu. Kusangwa Omũlĩmũ wuwe akabakangĩrĩraya emyatsi yosĩ, n'emyatsi eyĩ ni kwenene, sĩ y'amabehĩ. Neryo ngoko abiribakangĩrĩrya erikola, mubye mukamatikana na Kristo. 28Neryo lino, abana bage balere, mubye mukamatikana na Kristo, neryo itwabya ĩtũnasĩkĩre omugulu asyahuluka, n'erĩtĩndakwa esĩsonĩ embere siwe oko kiro ekyo asyasa. 29Mwamabya mũnasĩ Kristo kw'atunganene, muminye kw'abosĩ abakakola ebitunganene, babiribya bana ba Nyamuhanga.

will be added

X\