1 ABANYA KORĨNTO 9

1Sindi bwĩranda kwehĩ? Sindi mukwenda kwehĩ? Sinditalangira Yesu Omukama wetu kwehĩ? Ĩnywe simuli kiminyikalo ky'omũbĩrĩ wage busana n'Omukama wage kwehĩ? 2Nomo nyitane mukwenda oko bandi, nĩkwa ũkw'ĩnywe nyiri mukwenda; kusangwa ĩnywe muli kĩmĩnyĩsyo ky'obukwenda bwage busana n'Omukama. 3Omugulu abandu bakanyĩbũlĩrĩraya, ngabasũbĩraya nyiti, 4Situwite ehamũlĩ y'erirya n'erĩpũlya kwehĩ? 5Situwite ehamũlĩ y'eritwala haguma netu omũkalĩ oyuli Mukristo, ng'abandi bakwenda ko bakakola, n'abagala babo Mukama, na Petero kwehĩ? 6Kutse ye Barnaba nage, ĩtwebene, tutolere eriyikumbirira kwehĩ? 7Ko mũsĩrĩkanĩ ni wahi oyukayalwa n'eriyiriha kwehĩ? Nindi yukahera eririma ly'ebĩnyũ iniatalya oko bĩgũma byalyo kwehĩ? Kutse nindi yũkalĩsaya esyombũlĩ isiendirya oko masabũ wasyo kwehĩ? 8Ngabũga emyatsi eyĩ ng'eyage kwehĩ? Emigambo yo y'ĩkabũga emyatsi eyĩ. 9Kusangwa ĩsakĩre omo migambo ya Musa iti, Susyeboha obuno bw'enume y'ende omugulu ĩkahũmba engano. Ni mwatsi w'esyonde go Nyamuhanga akahula kwehĩ? 10Kutse sĩalĩbũga ebĩ busana netu kwehĩ? Inga, byasakawa busana netu, kusangwa omũlĩmĩ akalima n'omũgesĩ akagesa, ababiri bosĩ bali n'amaha w'erisangira embuto eyo. 11Ĩtwe twamahera emyatsi y'ekĩrĩmũ omo katĩkatĩ kenyũ, siritolere tukagesa omo katĩkatĩ kenyũ ebĩkatũwatĩkaya oko mubiri kwehĩ? 12Abandi bamabya n'ehamũlĩ y'erĩwatĩkĩbwa batya, netu situwite ehamũlĩ eyo kwilababo kwehĩ? Nĩkwa ĩtwe motutakola omo hamũlĩ eyĩ, kandi tũkayĩyĩnaya omo myatsi yosĩ, tũkasyakakĩrya Engulu Yowene ya Kristo. 13Mũnasĩ ngoko abakakola omũbĩrĩ omo hekalũ bakalya oko byalya by'omo hekalũ, n'abakahera amahere oko kiherero bakahabawa ukw'ebyo ebikaherawa. 14Ko biri bitya. Omukama abiritegeka ati, Abakatũla Engulu Yowene bangabana ebyangawatĩkyabo omo Ngulu Yowene. 15Nĩkwa sinditakola omo hamũlĩ yage omo myatsi eyĩ. Kandi sinditasaka emyatsi eyĩ nyiti nyibane erĩwatĩkĩbwa. Kitsiga inahola kwilaba eriyira eriyipipa lyage mo buyira. 16Kusangwa namatũla Engulu Yowene, singwite eky'eriyihalambira. Kusangwa ngwite ekĩkanyĩkũna. Kusangwa obũlĩge kwĩngye namatindatũla Engulu Yowene. 17Namakola omũbĩrĩ oyũ busana n'eriyisogago neryo nangahembwa; nĩkwa namakola n'erĩkũnwa, nĩ mũbĩrĩ ngahabawa. 18Neryo oluhembo lwage ni lwahi kwehĩ? Oluhembo lwage nĩ ndũndĩ y'erĩtũla Engulu Yowene butsira eririhwa, isindikola omo hamũlĩ yage y'eriyikumbirira omo Ngulu Yowene. 19Ĩngye indi bwĩranda, sindi mukobe w'omundu; nabiriyiyira mo mukobe w'abandu bosĩ, inatoka eribana abandu bangi busana na Kristo. 20Neryo oko Bayũda ngabya ng'Omũyũda, inatoka erisunga Abayũda. Ukw'abo bakakwama Emigambo ngabya nga ngakwama Emigambo haguma nabo, nomo nyite omo mũlĩkĩ w'Emigambo, inatoka erisunga abakakwama Emigambo. 21Neryo oko bandu b'Ebihanda abatekwama Emigambo, ngabya ng'omundu w'Ebihanda inatoka erisunga ab'Ebihanda. Nĩkwa sindigana Emigambo ya Nyamuhanga, kusangwa ngakwama Emigambo ya Kristo. 22Oko bandu bolo-bolo, monabya molo-molo. Omo myatsi yosĩ, nabirirenga eribya hakũhĩ n'abandu b'emĩsĩndo yosĩ, inatoka omo syonzira syosĩ erisunga abandu ba kubo. 23Kandi ngakola emyatsi yosĩ busana n'Engulu Yowene, inatoka erisangira omo mũyĩsa wayo. 24Mũnasĩ ngoko abandu bosĩ bakatibita omo matangwa, nĩkwa omuguma musa akahabawa oluhembo. Neryo mutibite imwatoka eritangirira, n'eribana oluhembo. 25Neryo obuli mundu oyukakwama amatangwa, akayĩtegaya kutsibu omo myatsi yosĩ. Bakakola batya bati babane embĩta y'ebiti ebikalagala, nĩkwa ĩtwe tũkayĩtegaya busana n'embĩta eyitelagala na kera. 26Neryo ngatibita ng'oyo wasĩ eyo akaya; sĩndĩlabaya esyongũmbe sy'omo kyanya mo buyira. 27Nĩkwa ngagalaya omubiri wage, n'erĩgondyago, neryo namabĩtũlago oko bandi, sinyibye ng'oyukaganawa.

will be added

X\