1 ABANYA KORĨNTO 8

1Neryo busana n'omwatsi w'ebyalya ebikaherawa oko sanamu. Tũnasĩ ĩtwe bosĩ tuti tuwite eriminya, nĩkwa eriminya likaleta eriyiheka, nĩkwa olwanzo lũkahĩmba. 2Omundu amaganĩrya ati anasĩ ndeke, isialitaminya nga litolere akaminya. 3Nĩkwa omundu oyo wanzĩre Nyamuhanga, Nyamuhanga abirimuminya ndeke. 4Neryo busana n'omwatsi w'akalyo akakahererawa oko syosanamu, tũnasĩ ngoko esanamu si kindu muna-kihugo, kandi tũnasĩ ko hali Nyamuhanga muguma musa. 5Nomo hangabya esikahulawa mo nyamuhanga omo lubula kutse omo kihugo, kandi ngoko abandu bawite esyonyamuhanga nyingi, n'abakama bangi, 6nĩkwa busana netu hali Nyamuhanga muguma, ye Tata. Kandi emyatsi yosĩ, ĩkalũa ukw'iye, netu tuliho busana naye. Kandi hali Omukama muguma ye Yesu Kristo, oyo wahangika emyatsi yosĩ, kandi akaleka itwabyaho. 7Kandi abandu bosĩ sibaliminya ebĩ. Abandi ababiribegera esyosanamu omugulu bakalya akalyo akabirihererwa oko sanamu bakalyako ng'obuhere bw'esyosanamu. N'obunya-mutima bwabo bolo bukatsanda. 8Nĩkwa akalyo sikalituleta hakũhĩ na Nyamuhanga. Sĩtwendĩherya twamatendiryako, kandi sitwendibana endũndĩ twamalyako. 9Nĩkwa mũyĩtegaye, simuleke ehamũlĩ yenyũ y'erirya ebyosĩ, ĩkatwĩkalya abandu bolo-bolo omw'ĩkĩrĩrya lyabo. 10Kusangwa omundu oyuwite obunyamutima bolo-bolo amakulolako uwe mundu w'eriminya ndeke inukalira omo hekalũ y'esyosanamu; iye siendisyasonda erirya ebyalya ebikaherawa oko sanamu kwehĩ? 11Neryo omundu mũlĩkyenyũ molo-molo, oyo Kristo aholera, asyahera busana n'eriminya lyawe. 12Neryo mukakola Kristo yo nabi, kundi mukakola balĩkyenyũ bo nabi, n'erĩhũtalya obunyamutima bolo-bolo bwabo. 13Neryo ebyalya byamaleka mũlĩkyetu akakola ebibi, sindiendisyaswalya esĩswĩ na kera, ngasyakolesya mũlĩkyetu y'ebibi.

will be added

X\