1 ABANYA KORĨNTO 7

1Busana n'emyatsi eyo mwahula omo barua yenyũ, Lyowene kumbe omundu sĩangatũla oko mũkalĩ. 2Nĩkwa kusangwa hali obũsĩngĩrĩ bungi, obuli mundu abye n'omũkalĩ wuwe, n'obuli mũkalĩ abye n'ĩba wuwe. 3Omulume ahe mũkalĩwe ebimutolere, kandi nibya omũkalĩ ahe ĩba wuwe ebimutolere. 4Omũkalĩ siawite hamũlĩ oko mubiri wuwe, nĩkwa ĩba wuwe yuli n'ehamũlĩ eyo. Kandi omulume siawite ehamũlĩ oko mubiri wuwe, nĩkwa omũkalĩwe yuwite ehamũlĩ eyo. 5Sĩmwĩmane mutalialagana erikola mutya, imwatoka erĩyĩhĩra okw'isaba, neryo ĩmwaswahĩndana haguma, Satanĩ akasyabalengako busana n'eritindatũlera lyenyũ. 6Nĩkwa ngababwira ebĩ, sindibahamula. 7Neryo nyiti kumbe abandu bosĩ babye nga ngye. Nĩkwa obuli mundu awite olũsũnzo luwe olũkalũa uku Nyamuhanga omuguma awite olũsũnzo l'omũsĩndo oyũ, n'ogundi omũsĩndo olya. 8Nĩkwa ngabwira abatahĩkenĩe, n'abakwakalĩ nyiti, lyowene kumbe bali nga ngye. 9Kandi bamataluka erĩyĩtũlerya, ĩbahĩkanĩa; kusangwa lyowene erĩhĩkanĩa kwilaba eriaka omo ngumbu. 10Nĩkwa ngategeka abahĩkenĩe, nĩkwa yo Mukama, sĩ ĩngye, ati, Omũkalĩ sĩalũe ũkw'ĩba wuwe. 11Nĩkwa omũkalĩ amalũamo, ĩsĩaswahĩkĩbawa, kutse aswesangana n'ĩba wuwe. Kandi omulume siahige omũkalĩ wuwe. 12Nĩkwa oko bandi ĩngye ngabwirabo, nĩkwa si yo Mukama, nyiti, omũlĩkyetu amabya awite omũkalĩ oyũtĩkĩrĩrye, n'omũkalĩ oyo akalĩga erĩĩkala naye, omulume oyo siamuhige. 13Kandi omũkalĩ oyuwite ĩba oyũtĩkĩrĩrye, n'ĩba akalĩga erĩĩkala naye omũkalĩ oyo sĩalũemo. 14Kusangwa ĩba oyũtĩkĩrĩrye akalĩgawa na Nyamuhanga busana n'omũkalĩ wuwe, kandi omũkalĩ oyũtĩkĩrĩrye, akalĩgawa na Nyamuhanga busana n'ĩba wuwe. Bite bitya, abana benyũ bangabya hali uku Nyamuhanga, nĩkwa lino bali hakũhĩ na Nyamuhanga. 15Nĩkwa oyũtĩkĩrĩrye amanza erigenda, agende. Omo mwatsi oyũ, omulume kutse omũkalĩ abali Bakristo bayisoge ekyo bakandikola, kusangwa Nyamuhanga abiritubirikira erĩĩkala omo buholo. 16Nĩkwa uwe mũkalĩ, wasĩ uti nga sĩwendĩsyalamya ĩbawe kwehĩ? Nawe uwe mulume, wasĩ uti nga sĩwendĩsyalamya omũkalĩ wawe kwehĩ? 17Nĩkwa obuli mundu alendere ngoko Mukama amutegeka, kandi alendere umw'ebyo Nyamuhanga amubirikiramo. Ko ngategeka nyitya omo syokanĩsa syosĩ. 18Kandi omundu amabirikirwa na Nyamuhanga iniabwene, sialenge eribya ng'oyutabwene. Omundu amabirikirwa na Nyamuhanga isiabwene, sialenge erĩbanĩbwa. 19Eribana si mwatsi, kandi eritendibana si mwatsi. Nĩkwa enzumwa nene nĩ 'teya ebihano bya Nyamuhanga. 20Obuli mundu akwame umw'ebyo Nyamuhanga amubirikiramo. 21Wabya mukobe omugulu Nyamuhanga akubirikira kwehĩ? Oyo si mwatsi, nĩkwa wamatoka eribya bwĩranda, ukole utya. 22Kusangwa omukobe oyo wabirikirawa n'Omukama nĩ mwĩranda w'Omukama. Nibya, omwĩranda oyo wabirikirawa na Nyamuhanga, ni mukobe w'Omukama. 23Nyamuhanga mwabagula n'obũgũlĩ; neryo simubye bakobe b'abandu. 24Balĩkyetu, obuli mundu akwame Nyamuhanga omo mwatsi ogo abyamo ekiro Nyamuhanga amubirikira. 25Neryo busana n'omwatsi w'abatahĩkenĩe, singwite kihano ky'Omukama, nĩkwa ngabũga ekyage ng'oyuteregula busana n'eribana eriganyira ly'Omukama. 26Ngaganĩraya busana n'amalĩge wa sesene, nyiti lyowene omundu ĩkale ngoko ane lino. 27Ũhĩkĩrye omũkalĩ kwehĩ? Susonde erimuhiga. Sũhĩkĩrye kwehĩ? Susonde erĩhĩkya omũkalĩ. 28Nĩkwa wamahĩkya omũkalĩ, sulitakola ekibi. Kandi omumbesa amaheruka isiatakola kibi. Nĩkwa abakaherũkanaya basyabana amalĩge omo mubiri, neryo nyanzĩre erĩbabalya oko malĩge ayo. 29Nĩkwa balĩkyetu, ngababwira nyiti, omugulu amabya muke, neryo erĩtsũka lino, abawite abakalĩ bangabya nga sibawitebo. 30Kandi abakalira babye nga siberira, n'abakatsema, babye nga sibetsema, n'abakagula, babye ng'abatawite bindu. 31Abakatunda ebindu by'ekihugo babye nga sibetunda ndeke; kusangwa ekihugo kyetu sikyendisyabyaho ebiro binene. 32Nĩkwa sĩnyanzĩre mukagalwa n'amaganĩryo. Oyũtahĩkĩrye akatsomana omũbĩrĩ w'Omukama, kusangwa anzĩre erĩtsemesya Omukama. 33Nĩkwa oyũhĩkĩrye akatsomana emyatsi y'ekihugo, kusangwa anzĩre erĩtsemesya omũkalĩ wuwe. 34Neryo erisonda liwe ligabene, omutima wuwe ali ko myatsi ĩbĩrĩ. Kandi omũkalĩ oyũtahĩkĩbwe, kutse omumbesa, bakatsomana omũbĩrĩ w'Omukama, iniatoka eribya mũbũyĩrĩre omo mubiri n'omo kĩrĩmũ; nĩkwa omũkalĩ oyũhĩkĩbwe akatsomana emyatsi y'ekihugo, kusangwa anzĩre erĩtsemesya ĩba wuwe. 35Ngabũga ebĩ kusangwa nyanzĩre erĩbawatĩkya. Sĩnyanzĩre erĩbakakĩrya, nĩkwa nyanzĩre imwakola, ebitolere. Kandi nyanzĩre imwayiha oko mũbĩrĩ w'Omukama, butsira awandi maganĩrya. 36Nĩkwa omundu amaganĩrya ati syĩkere ndeke busana n'oyo asĩmolaya, amabya ane kigungutsya. Kandi amabya akaganĩraya ati litolere ĩbahĩkanĩa, amabya anzĩre, sihali kibi, bahĩkanaye. 37Nĩkwa oyũsĩkĩre omo mutima wuwe, isialihatikanawa, kandi inĩasĩ ekyo anzĩre ndeke, amasoha kwenene omo mutima wuwe ati sĩendĩsyahĩkya omumbesa oyo, akakola ndeke. 38Neryo oyũkaherũkaya oyo asĩmolaya akakola ndeke, kandi oyũtemũherũkaya akakola ndeke kwilaba. 39Omũkalĩ oyũhĩkĩbwe siali n'ehamũlĩ y'erĩlũamo, omugulu ĩba wuwe akineho. Nĩkwa ĩba wuwe amahola, ali n'obwĩranda bw'eriherukira okw'oyo anzĩre, omulume amabya ini Mukristo kwenene. 40Nĩkwa ĩngye nyiti, asyabana obutseme ndeke amatendiheruka. Nage ngaganĩraya nyiti Omũlĩmũ wa Nyamuhanga akanyisondola.

will be added

X\