1 ABANYA KORĨNTO 6

1Hamabya omundu omo katĩkatĩ kenyũ oyuli n'omwatsi uku mũlĩkyabo, oyukalenga erimutsongera embere sy'abatswerĩ abatatunganene, sialireka abandu ba Nyamuhanga bakasohabo kwehĩ? 2Sĩmwasĩ kw'abandu ba Nyamuhanga basyatswera ekihugo kwehĩ? Mwamabya ĩnĩ ĩnywe mukasyatswera ekihugo, simutolere eritswera esyombanza nge-nge-nge kwehĩ? 3Sĩmwasĩ ko twasyatswera abamalaĩka kwehĩ? Kwilaba aho simutolere eritswera emyatsi y'eribyaho lyetu kwehĩ? 4Neryo mwamabya n'emyatsi eyitolere eritswerwa, mukatwalayo oko batswerĩ abatasĩbwe omo kanĩsa kwehĩ? 5Sĩmwekwa esĩsonĩ kwehĩ? Simuli k'omundu muguma w'amenge omo katĩkatĩ kenyũ oyo wangatoka erisoha omo katĩkatĩ k'abalĩkyabo kwehĩ? 6Nĩkwa mũlĩkyetu muguma akayatsongera ogundi mũlĩkyabo embere sy'abatĩkĩrĩrye. 7Neryo omugulu mukatsongerana; mũkakangaya ngoko mwabĩrĩũtwa. Simwangayisoga erikolwa nabi kwehĩ? Kandi simwangayisoga erĩhũngwa kwehi? 8Nĩkwa ĩnywe mukakolana nabi n'erĩhũngana omo katĩkatĩ k'abalĩkyenyũ. 9Kandi sĩmwasĩ kw'abatatunganene ko batendisyasangira oko bwami bwa Nyamuhanga kwehĩ? Sĩmũtebĩbawe; ab'amaragane, kutse abakasaba esyosanamu, kutse abatetĩ, kutse abalume abakatetana, 10kutse abĩbĩ, kutse abakũndĩrya, kutse abakatsuma, kutse abanyeyĩ, aba sibendisyasangira oko bwami bwa Nyamuhanga. 11Neryo abandi omo katĩkatĩ kenyũ ko mwanabya mutya; nĩkwa lino ĩnywe mwabĩrĩerĩbwa kw'ebibi, kandi mwabirihigulwa, kandi mwabiriyirwa mo batunganene busana n'erĩna ly'Omukama Yesu Kristo, n'omo Mũlĩmũ wa Nyamuhanga wetu. 12Nyiri bwĩranda erikola emyatsi yosĩ, nĩkwa emyatsi yosĩ, sirigasakĩ. Nyiri bwĩranda erikola emyatsi yosĩ, nĩkwa sindiendĩsyalĩga omwatsi n'omuguma erinyiyira mo mukobe wago. 13Akalyo ni k'enda, n'enda iri busana n'akalyo; nĩkwa Nyamuhanga asyaherya ebibiri byosĩ. Kandi omubiri sĩahĩrawa busana n'amaragane, nĩkwa ahĩrawa busana n'Omukama; n'Omukama busana n'omubiri. 14Nyamuhanga mwalũbũkya Omukama oko baholĩ, netu asyatũlũbũkya oko baholĩ omo bũtokĩ buwe. 15Mũnasĩ kw'emibiri yenyũ nĩ bĩtsũko by'omubiri wa Kristo. Nyiyire ebĩtsũko bya Kristo mo bĩtsũko by'omũtetĩ kwehĩ? Iyihi n'ahake! 16Kutse sĩmwasĩ oyũkĩmaya omũtetĩ kw'akabya mubiri muguma naye kwehĩ? Kusangwa kĩsakĩre kiti, Ababiri basyabya mubiri muguma. 17Nĩkwa oyukamatikana n'Omukama akabya kĩrĩmũ kiguma naye. 18Musage obũsĩngĩrĩ. Ebindi bibi omundu akakola biri eyĩhya oko mubiri wuwe, nĩkwa omundu oyukateta akahalaya omubiri wuwe. 19Sĩmwasĩ k'omubiri wenyũ nĩ hekalũ y'Omũlĩmũ Abũyĩrĩre, oyuli omwisi wenyũ n'oyo Nyamuhanga abaha kwehĩ? Ĩnywe simuli benyũ, muli ba Nyamuhanga. 20Abiribagula omo bũgũlĩ. Neryo omo mibiri yenyũ, muletere Nyamuhanga y'olukengerwa.

will be added

X\