1 ABANYA KORĨNTO 5

1Abandu balĩmũbũga bati, hali erĩsĩngĩra omo katĩkatĩ kenyũ, eryo mũsĩndo owakalĩre kwilaba oluteto losĩ lw'abandu b'Ebihanda. Bati, omundu abĩrĩmya me-mulere wuwe! 2Neryo mukayihagata muti kwehĩ? Litolere imwabya n'obũlĩge bunene, n'erĩlũsya omundu oyukakola omwatsi oyũ omo ndeko yenyũ. 3Kusangwa ĩngye nomo nyite haguma nenyũ omo mubiri, nyineyo omo kĩrĩmũ, nabiritswera oyo wakola ekyo, omo lĩna ly'Omukama wetu Yesu nga nyineho haguma nenyũ. 4Neryo omugulu mũhĩndene haguma, nage indi haguma nenyũ omo kĩrĩmũ kyage, ituli n'obũtokĩ bw'Omukama wetu Yesu, 5tuhe omundu oyo uku Satanĩ, omubiri wuwe aherĩbawe, nĩkwa ekĩrĩmũ kiwe kĩlamĩbawe omo Kiro ky'Omukama. 6Eriyihagata lyenyũ sĩryowene! Sĩmwasĩ kw'ekĩhamya kike kĩkahamaya obundu bosĩ kwehĩ? 7Mũlũsaye ekĩhamya kya kera, ky'ebibi, imwatoka eribya bundu buhya-buhya obute mo kĩhamya n'ekike, ngoko kwenene muli rino. Kusangwa Kristo ekyana ky'embũlĩ kyetu ky'Erikiruka, abiriherwa. 8Neryo tusangire okw'irya eryo, butsira omo bundu obuli mw'ekĩhamya kya kera, eky'ebibi n'eky'erĩhalya, nĩkwa omo bundu obute mw'ekĩhamya, obw'obubuya n'obw'ekwenene. 9Omo barua nabasakira monababwira nyiti, simutambe n'abandu basĩngĩrĩ. 10Nĩkwa mondahula bandu basĩngĩrĩ b'ekihugo kino, kutse abakatsura abakahũnga, kutse abakasaba esyosanamu, Kusangwa bite bitya ĩnywe ĩmwangalũa omo kihugo. 11Nĩkwa lino ngabasakira nyiti, simutambe n'omundu oyukayahula mo Mukristo, oyuli mũsĩngĩrĩ, kutse omũtsũrĩ, kutse oyukasaba esyosanamu, kutse omũtsũmĩ, kutse oyuli mũkũndĩrya, kutse oyũkahũnga. Kwenene simwangalya n'omundu ng'oyo. 12Kusangwa si mwatsi wage w'eritswera ab'eyĩhya. Nenyũ simwangatswera abali omo kanĩsa kwehĩ? 13Nĩkwa Nyamuhanga asyatswera abali eyĩhya. Ngoko kĩsakĩre kiti, Omundu mubi oyo, mumuhige omo ndeko yenyũ.

will be added

X\