1 ABANYA KORĨNTO 4

1Abandu bangatuganza ng'abagombe ba Kristo, kandi ng'abateya b'amakũmbo wa Nyamuhanga. 2Nĩkwa omwatsi muguma atolere omũteya, ambu abanike ng'oyuteregula oko mukama wuwe. 3Nĩkwa ĩngye sinditsomana nga mukanzwera kutse eritswerwa n'abandu ba muna-kihugo. Kutse sindiyitswera. 4Kandi sinditabana omwatsi w'eriyihandikirira. Nĩkwa ekyo sikirinyiyira mo mundu ute ko lubanza. Omukama yukanyitswera. 5Neryo simubye mukatswera omundu embere w'omugulu owatolere, omugulu Omukama asyasa, iye asyahũlũkya omo kyakakala emyatsi eyĩbĩsamĩre omo mwĩrĩmya, kandi asyamĩnyĩkalya erĩyĩsũnza ly'emitima y'abandu. Neryo obuli mundu asyabana eripipwa na Nyamuhanga. 6Balĩkyetu, nabĩrĩbũga emyatsi eyĩ mo mũsyo busana nage na busana na Apolo, imwatoka eriiga eritendisoha nabi. Sihabye mundu oyukayiheka, ati akimira omukwenda muguma, n'eripona ogundi. 7Nindi wakũhĩra mo mukulu oko bandu kwehĩ? Ebyosĩ ebyo uwite, Nyamuhanga mwatakuhabyo kwehĩ? Neryo byamabya ĩnĩ lũsũnzo, busana nakĩ ukayihalamba nga sulitahabwalo kwehĩ? 8Mwabiribana ebyosĩ; kandi mwabiribya bateke, kandi muli bami, ĩtwe nomo tutane bami; kumbe muli bami, netu itwatoka eribya bami haguma nenyũ. 9Kusangwa ngaganĩraya nyiti, Nyamuhanga abĩrĩtũhĩra ĩtwe bakwenda, omo mwanya w'endũlĩ, ng'abandu ababiritswerwa okw'ihola, kusangwa twabiribya eky'erisamalirwa busana n'ekihugo kyosĩ, oko bamalaĩka, n'oko bandu. 10Ĩtwe tuli bakĩrũ busana na Kristo, nĩkwa ĩnywe muli b'amenge omwisi wa Kristo; ĩtwe tuli bolo-bolo, nĩkwa ĩnywe muli b'amaka; ĩnywe mũkasĩkĩbawa, nĩkwa ĩtwe tukaponawa. 11Kandi erĩhĩka na lino-lino tukawira n'erĩkwa enyota, situwite esyongimba syowene, kandi tũkahũnzawa, isituwite enyũmba. 12Kandi tukaluha, itunemukola omũbĩrĩ omo byala byetu. Omugulu tukatsumawa, tukatsumula; omugulu abandu bakatwendereraya, tũkayĩyĩnaya. 13Omugulu bakatulega, tukalenga erisangana nabo. Twabiribya ng'abaleretĩre oko kihugo, tuli ng'ekyabũ ky'ebindu byosĩ, erĩhĩka na lino. 14Sindisaka emyatsi eyĩ busana n'eribahemula, nĩkwa ngasaka busana n'eribahana ng'abana bage banze. 15Kusangwa nomo mwangabya n'abakangĩrĩrya b'olũhũnda-hũnda umu Kristo, nĩkwa simwangabya n'abotata bangi. Kusangwa ĩngye omo Ngulu Yowene nabiribya tata wenyũ omwisi wa Kristo Yesu. 16Neryo ngabalemba-lemba nyiti mubye mukanyĩgerererya. 17Busana n'omwatsi oyũ, nabiribatumira Tĩmoteo. Iye ni mwana wage mwanze omwisi w'Omukama oyuteregula. Asyabĩbũkya emigendere yage eyo ngakwama omwisi wa Kristo, kandi eyo ngakangĩrĩraya ehosĩ omo makanĩsa gosĩ. 18Nĩkwa abandi omo katĩkatĩ kenyũ bakayihagata, bati sindiendisyaya ewenyũ eKorĩnto. 19Nĩkwa nyinemwendĩsyabahĩkako lũba, Omukama amanza atya, neryo nasyaminya ndeke obũtokĩ bw'abakayiheka, butsira ebĩnywa byabo bisa. 20Kusangwa obwami bwa Nyamuhanga buliho omo bũtokĩ butsira omo bĩnywa bisa. 21Mwanzĩre kyahi kwehĩ? Nyĩbahĩkeko omo lũnyambĩ, kutse omo lwanzo n'omutima owahehere kwehĩ?

will be added

X\