1 ABANYA KORĨNTO 3

1Nĩkwa balĩkyetu, ĩngye mondatoka erĩbũga nenyũ nga muli bandu bakwamĩre Omũlĩmũ, nĩkwa nabũga nenyũ nga muli bandu abakwamĩre omubiri, nga muli Bakristo balere-balere. 2Monabalĩsya amasabũ, butsira akalyo akakala-kalĩre, kusangwa simwabya mukatoka eriryako. Na lino simulimwatokako. 3Kusangwa lino mukine bandu abakwamĩre omubiri. Kusangwa omugulu hakine eritsuro n'amanegeno omo katĩkatĩ kenyũ, sĩmũkwamĩre omubiri kwehĩ? Kandi simwelendera ng'abandu b'ekihugo kwehĩ? 4Kusangwa omugulu omundu akabũga ati, Ĩngye indi wa Paũlo; n'ogundi ati, Ĩngye indi wa Apolo; isimuli bandu b'ekihugo kwehĩ? 5Ko Apolo nindi kwehĩ? Kandi Paũlo nindi kwehĩ? Tuli bagombe abaleka ĩmwĩkĩrĩrya. Obuli muguma w'ũkw'ĩtwe tukakola omũbĩrĩ ogo Mukama akatuha erikolago. 6Ĩngye nahera embuto, Apolo mũtũlĩra kuyo kw'amagetsi, nĩkwa Nyamuhanga yo waleka embuto iyalasa. 7Neryo omũherĩ w'embuto, n'oyũkũtũlĩra kuyo kw'amagetsi sibegasakĩ. Ni Nyamuhanga yũkalasayayo. 8Neryo omũherĩ w'embuto, n'oyũkũtũlĩra kuyo kw'amagetsi balingene, kandi obuli mundu asyahembwa na Nyamuhanga ngoko mũbĩrĩ wuwe ali. 9Kusangwa Nyamuhanga yo tukakola haguma naye, kandi ĩnywe muli irima lya Nyamuhanga. Kandi muli nyũmba ya Nyamuhanga. 10Neryo Nyamuhanga mwamba olũsũnzo luwe, lw'omũbĩrĩ. Neryo ng'omũhĩmbĩ munyima-nyima w'amenge monahira ekibanza, nĩkwa ogundi akahĩmba kukyo. Neryo obuli mundu ayĩtegaye ng'akahĩmba ati. 11Kusangwa Nyamuhanga abĩrĩhira Yesu Kristo mo kibanza ĩkyokyene, neryo sihali ekindi kibanza ekyangahĩrwaho. 12Neryo omundu akahĩmba oko kibanza omo syamagetsi, kutse esy'ebĩtsĩpa, kutse amabwe w'obũgũlĩ bunene, kutse miti, kutse biti, kutse esyombuba. 13Kandi omũbĩrĩ w'obuli mundu asyaminyikala, kusangwa ekiro kya Kristo kyasyakanganĩago. Kandi omuliro asyabĩsũlago, ni muliro asyalenga omũbĩrĩ w'obuli mundu nga nĩ wa mũsĩndo wahi. 14Obũhĩmbe bw'omundu bwamabyaho enyũma w'omuliro, asyahembwa obũhĩngĩ. 15Nĩkwa obũhĩmbe bw'omundu bwamahĩsĩbwa omo muliro asyaherya; nĩkwa iye asyalamĩbwa ng'oyo wabala omo muliro. 16Sĩmwasĩ ko muli hekalũ ya Nyamuhanga kwehĩ, kandi k'Omũlĩmũ wa Nyamuhanga ĩkere omwisi wenyũ kwehĩ? 17Neryo omundu amaherya ehekalũ ya Nyamuhanga, Nyamuhanga asyamũherya. Kusangwa ehekalũ ya Nyamuhanga ĩbũyĩrĩre, nenyũ muli ehekalũ eyo. 18Sihabye mundu oyũkayĩtebaya. Omundu omo katĩkatĩ kenyũ amaganĩrya nga ni w'amenge w'ekihugo kino, abye mũkĩrũ, iniatoka eribya w'amenge kũndũ. 19Kusangwa amenge w'ekihugo kino nĩ bũkĩrũ embere sya Nyamuhanga. Ngoko kĩsakĩre kiti, Nyamuhanga akahamba ab'amenge omo menge wabo mabi. 20N'awandi Masako ati, Omukama anasĩ kw'amalengekanĩa w'ab'amenge kw'ategasakĩ. 21Neryo sihabye mundu oyukayihalamba busana n'abandu. Kusangwa emyatsi yosĩ nĩ yenyũ. 22Amabya ini Paũlo, kutse Apolo, kutse Petero, kutse ekihugo, kutse engebe, kutse oluholo, kutse emyatsi ya lino, kutse emyatsi ikandisyasa, emyatsi yosĩ nĩ yenyũ. 23Nenyũ muli aba Kristo, kandi Kristo ni wa Nyamuhanga.

will be added

X\