1 ABANYA KORĨNTO 2

1Balĩkyetu, omugulu nabahĩkako erĩbatũlĩra omwatsi w'ekwenene wa Nyamuhanga, mondasa omo bĩnywa by'amenge n'eby'ekĩsehya. 2Kusangwa monayĩsũnza nyiti sĩnangaganĩrya ogundi mwatsi omo katĩkatĩ kenyũ, nina Yesu Kristo, n'oluholo luwe oko musalaba. 3Nage nabya haguma nenyũ, inyiri molo-molo, kandi nabya n'eriubaha, n'erititimana lĩnene. 4Neryo ekĩnywa kyage n'erĩtũlago lyage, sibyabya by'ekĩsehya ky'ebĩnywa by'amenge w'abandu, nĩkwa byabya ĩbakakangaya obũtokĩ bw'Omũlĩmũ wa Nyamuhanga. 5Neryo erĩkĩrĩrya lyenyũ sirihangane omo menge w'abandu, nĩkwa lihangane omo bũtokĩ bwa Nyamuhanga. 6Nĩkwa tũkabũga amenge oko bandu bahĩkene. Nĩkwa si menge w'ekihugo kino, kutse amenge w'abatabalĩ b'ekihugo kino, abakahwaho. 7Nĩkwa tũkabũga amenge wa Nyamuhanga mo lĩkũmbo, awabĩsamĩre oko bandu ago Nyamuhanga ayisoga busana n'olukengerwa lwetu, ekihugo kite kyahangikwa. 8Abatabalĩ b'ekihugo kino mobataminya amenge aya. Kusangwa nga balibya basĩ amenge ayo, kumbe sibetabamba Omukama w'olukengerwa oko musalaba. 9Nĩkwa Amasako akabũga ati, Emyatsi eyo ameso ate alangira, n'amatwĩ atĩowa, N'emyatsi eyo mutima ate aganĩrya, Eyo ni myatsi eyo Nyamuhanga abiritegeka busana n'abandu abamwanzĩre. 10Nĩkwa Nyamuhanga abĩrĩtũbĩsũlĩrayo omo Mũlĩmũ wuwe. Nĩ Mũlĩmũ akasonda emyatsi yosĩ, akasonda erĩyĩsũnza lya Nyamuhanga. 11Ko ni mundu wahi oyo wasĩ emyatsi y'omundu kite ekĩrĩmũ ky'omundu oyo ekiri omwisi wuwe kwehĩ? Litya sihali oyo wasĩ emyatsi ya Nyamuhanga ate Omũlĩmũ wa Nyamuhanga. 12Nĩkwa ĩtwe sitwetangirira ekĩrĩmũ ky'ekihugo, nĩkwa twabiriangirira Omũlĩmũ ogo Nyamuhanga atuma, itwatoka eriminya emyatsi eyo Nyamuhanga abirituha mo lũsũnzo. 13Ebĩnywa ebyo tũkabũga, sĩ bĩnywa byakangĩrĩrĩbawa omo menge w'abandu, nĩkwa ebyakangĩrĩrĩbawa n'Omũlĩmũ, neryo tũkakũmbũla emyatsi y'Omũlĩmũ wa Nyamuhanga oko bawite Omũlĩmũ oyo. 14Nĩkwa omundu oyutawite Omũlĩmũ sialitoka eribana olũsũnzo olũkalũa oko Mũlĩmũ. Kandi sialiminyalo kusangwa ni myatsi y'obũkĩrũ busana naye. Kusangwa endũndĩ yalo ikasohawa omo menge w'Omũlĩmũ. 15Nĩkwa omundu oyuwite Omũlĩmũ akatoka erisoha endũndĩ y'emyatsi yosĩ, nĩkwa iye sialisohawa n'omundu. 16Ngoko Amasako akabũga ati, Nindi yo wasĩ obũlengekanĩa bw'Omukama kwehĩ? Nindi yo wangatoka erimuhana kwehĩ? Nĩkwa ĩtwe tuwite obũlengekanĩa bwa Kristo.

will be added

X\