1 ABANYA KORĨNTO 16

1Neryo busana n'omwatsi w'erĩwatĩkya balĩkyetu abandu ba Nyamuhanga. Mukole ngoko nategeka esyokanĩsa sy'eGalatĩa. 2Oko buli kiro ky'eyenga, obuli mundu abike ekihande ky'endũndĩ akabana, butsira erĩlabya ekĩbo ekiro nasyahĩka. 3Neryo omugulu nasyahĩka, nasyatuma abandu abo mũkasĩma n'ebarua busana n'eriheka olũsũnzo lwenyũ eYerũsalema. 4Kandi lyamabya lyowene busana nage eriyayo, ibagenda haguma nage. 5Nasyabya nabilaba eMakedonĩa nasyabahĩkako, kusangwa ngalabira eMakedonĩa. 6Kandi mbino nasyĩkala nenyũ ndambĩ, kutse erisiba nenyũ oko mugulu w'eritsuku, imwatoka erĩnyĩtsĩndĩkĩsya omo nzira eyo nasyaya. 7Kusangwa sĩnyanzĩre eribalolako n'eritwangana buyira. Nyiri n'amaha w'erisiba nenyũ ebiro binene, Omukama amanza. 8Nĩkwa nasyabya eno eEfeso erĩhĩka oko Pentekote. 9Kandi hano hali omwanya w'erikola omũbĩrĩ munene, nomo hane esyonzĩgũ nyingi. 10Neryo Tĩmoteo asyabya ahĩka, mũlebaye mũmũkokaye ndeke siabane eky'erĩmũbahya. Kusangwa akakola haguma nage omũbĩrĩ w'Omukama. 11Sihabye omundu oyukamupona. Nĩkwa mumutsindike omo buholo, atoke erĩhĩka aho nyiri, kusangwa ngamulindirira haguma n'abandi balĩkyetu. 12Nĩkwa busana n'omũlĩkyetu Apolo, monamuhatikana nyiti, abahĩkeko haguma n'abandi balĩkyetu; nĩkwa siabya anzĩre eriyayo lino, nĩkwa asyahĩka ekiro asyabana omugulu owene. 13Mũyĩtegaye, mũsĩke omw'ĩkĩrĩrya, mukole ng'abalume, mubye n'amaka. 14Mukole emyatsi yosĩ omo lwanzo. 15Balĩkyetu, mũnasĩ, ekĩtũnga kya Setefano, ngoko babya Abakristo b'erĩmbere omo kihugo ky'eAkaya, kandi mũnasĩ ngoko babya bakayiha oko mũbĩrĩ w'erĩwatĩkya abandu ba Nyamuhanga. Neryo ngabalemba-lemba nyiti, 16Mowe abandu ng'aba, kandi mowe obuli mundu oyukakola n'erĩwatĩkya haguma nabo. 17Kandi ngatsema busana n'erĩhĩka lya Setefano na Fortũnato, na Akaĩko; kusangwa bamabya omo mwanya wenyũ w'erĩnyĩwatĩkya. 18Babĩrĩsĩkya omutima wage n'owenyũ nibya. Neryo mubye mũkasĩma abandu ng'aba. 19Amakanĩsa awali eAsĩa bakababũkaya. Kandi Akwĩla na Pĩrĩsĩla n'ekanĩsa eyĩkahĩndana omo nyũmba yabo bakababũkaya ndeke, omwisi w'Omukama, 20N'abalĩkyetu bosĩ eno bakababũkaya. Mũkeranaye n'eriwanako erĩbũyĩrĩre. 21Ĩngye Paũlo ngasaka, omo byala byage erĩbabũkya. 22Omundu amatindanza Omukama, abye mutakirwa. Maranatha, liti, Omukama ase! 23Olukogo lw'Omukama Yesu lubye haguma nenyũ. 24Kandi olwanzo lwage lubye n'ĩnywe bosĩ omwisi wa Kristo Yesu. Amina.

will be added

X\