1 ABANYA KORĨNTO 15

1Neryo balĩkyetu, ngabamĩnyĩsaya Engulu Yowene eyo nabatũlĩra. Nenyũ momwangirirayo, kandi muhangane muyo mo ndeke. 2Kandi mũkalamĩbawa omo Ngulu Yowene eyo nabakangĩrĩraya, mwamasĩka muyo mo ndeke, mwamabya mũtalĩkĩrĩraya busa. 3Kusangwa natsũka eribaha erĩmbere omwatsi munene ogo nangirira nibya, nyiti Kristo mwahola busana n'ebibi byetu ngoko kĩsakĩre omo Masako, 4kandi Yesu mwatabwa, neryo mwalũbũkĩbwa enyũma w'ebiro bisatu ngoko kĩsakĩre omo Masako. 5Kandi mwahulukira Petero, n'enyũma w'aho mwahulukira erĩkũmĩ n'ababiri. 6Enyũma w'aho mwahulukira abalĩkyetu bangi kwilaba magana atanu oko ndambĩ nguma. Hakũhĩ n'abosĩ ba kubo bakineho na lino, nĩkwa abandi babirihola. 7Neryo mwahulukira Yakobo, n'enyũma w'aho mwahulukira abakwenda bosĩ; 8n'enyũma w'abandi bosĩ mwanyihulukira nibya, ng'oyukabutawa omw'ĩbũlĩkĩrwa. 9Kusangwa ĩngye indi muke oko bakwenda bosĩ, kandi sinyitolere eriahulwa mo mukwenda, kusangwa monendererya ekanĩsa ya Nyamuhanga. 10Nĩkwa nyiri ngoko nyine busana n'olukogo lwa Nyamuhanga, kandi olukogo luwe busana nage molutabya busa. Nĩkwa monakola kwilaba abandi bakwenda bosĩ, nĩkwa sĩ ĩngye nakola, lo n'olukogo lwa Nyamuhanga olwabya nage. 11Neryo nomo nagabya ĩnĩ ĩngye kutse ini ibo, si mwatsi, ebĩ byo tũkatũla, ĩtwe bosĩ nenyũ momwĩkĩrĩryabyo . 12Neryo twamakangĩrĩrya tuti, Kristo abĩrĩlũbũkĩbwa oko baholĩ, busana nakĩ abandi omo katĩkatĩ kenyũ bakabũga bati, sihali erĩlũbũka oko baholĩ kwehĩ? 13Nĩkwa hamabya hate erĩlũbũka oko baholĩ, neryo Kristo naye ĩsĩalĩtalũbũkĩbwa oko baholĩ. 14Kandi Kristo amabya ĩsĩalĩtalũbũkĩbwa oko baholĩ, neryo erĩtũlago lyetu ini busa, kandi erĩkĩrĩrya lyenyũ ini busa. 15Kandi ĩtwe itwamabanika ng'ababehĩ omo mwatsi wa Nyamuhanga, kusangwa twabĩrĩtũlago busana na Nyamuhanga tuti, Mwalũbũkya Kristo oko baholĩ kwesĩ ĩmwatamũlũbũkya oko baholĩ, abaholĩ bamabya ĩsĩbalĩlũbũkĩbawa. 16Kusangwa abaholĩ bamabya ĩsĩbalĩlũbũkĩbawa, neryo Kristo naye ĩsĩalĩtalũbũkĩbwa. 17Kandi Kristo amabya ĩsĩalĩtalũbũkibwa neryo erĩkĩrĩrya lyenyũ ni buyira, kandi mukine omo bibi byenyũ. 18Neryo ababirihola ĩbabĩrĩkĩrĩrya Kristo, babirihera. 19Kandi amaha wetu uku Kristo amabya ali busana n'engebe y'eno nyisa, neryo tuli bandu abangakwĩrwa obũlĩge kwilaba abandi bandu bosĩ. 20Nĩkwa kwenene Kristo abĩrĩlũbũkĩbwa oko baholĩ, kandi amabya ow'erĩmbere erĩlũbũka omo katĩkatĩ k'abandu bahola. 21Kusangwa ngoko luholo lwahĩka busana n'omundu muguma, litya erĩlũbũka oko baholĩ molyahĩka busana n'omundu muguma. 22Kandi ngoko abandu bosĩ ba Adamu bakahola, litya abosĩ ababirimatikana na Kristo basyalũbũkĩbwa omo ngebe. 23Nĩkwa obuli mundu omw'iyitondeka liwe. Kristo nĩ w'erĩmbere, neryo abali uku Kristo basyalũbũka okw'ĩhĩka liwe. 24Neryo endũlĩ ĩyahĩka; Kristo amabĩhwerekererya eritabala lyosĩ, n'ehamũlĩ yosĩ, n'obũtokĩ bosĩ, asyaha obwami uku Nyamuhanga Tata. 25Kusangwa litolere Kristo iniatabala erĩhĩka aho Nyamuhanga asyalyatangirira esyonzĩgũ syosĩ sy'ahisi. 26Neryo oluholo nĩ nzĩgũ y'enyũma-nyũma eyikandisyahwerekererĩbwa . 27Kusangwa Amasako akabũga ati, Nyamuhanga asyatabala erĩhĩra emyatsi yosĩ omwisi w'ebisando biwe. Nĩkwa omugulu akabũga ati asyatabala oko myatsi yosĩ, sialiahula Nyamuhanga oyo wahĩra Kristo eritabala oko myatsi yosĩ. 28Nĩkwa omugulu Kristo amabitabala oko myatsi yosĩ, ye Mugala asyalĩga obutabale bwa Nyamuhanga Tata, oyo wamuha eritabala oko myatsi yosĩ. Litya Nyamuhanga asyatabala ndeke oko byosĩ. 29Neryo abakabatĩsĩbawa busana n'abaholĩ basyabya bati kwehĩ? Abaholĩ bamabya ĩsĩbelũbũkĩbawa n'ahake, busana nakĩ abandu bakabatĩsĩbawa busana n'abaholĩ kwehĩ? 30Kandi busana nakĩ ĩtwe tuli omo bwĩko emigulu yosĩ kwehĩ? 31Balĩkyetu, obwĩko bw'erihola bũkanyĩta ebiro byosĩ. Ngabũga ebĩ kusangwa ngayihalamba busana nenyũ omo ngebe yetu omwisi wa Kristo Yesu Omukama wetu. 32Kumbe nakwama amalengekanĩa w'abandu omugulu nabya nga ngalwa n'esyonyama sy'omolĩ eEfeso, lyamanyigasirakĩ kwehĩ? Abaholĩ bamatendĩlũbũkĩbwa n'ahake, ngoko kĩsakĩre kiti, Tulye, tũpũlaye, kusangwa omo ngyakya twasyahola. 33Sĩmũtebĩbawe, kundi abĩra babi bakatsandaya omutima mubuya. 34Mubuke omo litunganene, muleke erikola ebibi. Kusangwa abandi ba kwĩnywe sĩbasĩ Nyamuhanga. Nyiti, mwangakwa esĩsonĩ. 35Nĩkwa ogundi anganabũga ati, Kw'abaholĩ bakalũbũkĩbawa bati kwehĩ? Kandi basyabya n'omubiri w'omuhanda wahi kwehĩ? 36Uwe mũkĩrũ! Ekyo ukabiba sikirilasa eribyaho kyamatindatsũka erihola. 37Kandi ekyo ukabiba si mubiri w'omwaka owakandisyalasa, nĩkwa ni mbuto buyira, kwamũhwa ye ngano, kutse embuto y'ogundi mũsĩndo. 38Nĩkwa Nyamuhanga akahayo omubiri ngoko anzĩre, n'oko buli mbuto akahayo omubiri wayo ĩyoyene. 39Emĩnyokũ y'emibiri sĩ y'omũsĩndo muguma, nĩkwa hali emĩnyokũ y'abandu, kandi hali eyindi mĩnyokũ y'esyonyama, kandi hali eyindi mĩnyokũ y'esyonyonyũ, kandi hali eyindi mĩnyokũ y'amahere. 40Kandi hali emibiri ey'elubula, n'emibiri y'ekihugo, nĩkwa ekibuya ky'omubiri w'elubula ni kiguma, n'ekibuya ky'omubiri w'ekihugo ni kindi. 41Eryuba liwite obubuya bwalyo, n'omukera awite obubuya bwago, n'esyongũnũnũ nasyo siwite obubuya bwasyo. Kandi esyongũnũnũ siwite obubuya mũsĩndo-mũsĩndo. 42Neryo erĩlũbũka oko baholĩ ko liri ritya. Omubiri owakatabawa ni w'erihonda, nĩkwa omubiri owakalũbũkĩbawa sialihonda. 43Omubiri owakatabawa ni mubiri molo ĩsĩowene, nĩkwa omubiri owakalũbũkĩbawa asyabya w'obũtokĩ, n'amaka n'ow'obubuya. 44Omubiri owakatabawa ni mubiri w'omũsĩndo w'omũnyokũ; nĩkwa omugulu akalũbũkĩbawa ni mubiri w'omũsĩndo w'ekĩrĩmũ. Nĩkwa hali mubiri w'omũnyokũ, kandi hali mubiri w'omũsĩndo w'ekĩrĩmũ. 45Kusangwa Amasako akabũga ati, Omundu w'erĩmbere ye Adamu, mwabya mundu oyuliho. Nĩkwa Adamu w'enyũma nĩ Mũlĩmũ owakaha engebe. 46Nĩkwa ow'ekĩrĩmũ mwatabya w'erĩmbere, nĩkwa ow'omubiri mwatsũka, n'enyũma w'aho ow'ekĩrĩmũ. 47Adamu w'erĩmbere mwalũa omo lũtũtũ, ni w'ekihugo. Adamu w'akabiri alũa elubula. 48Ab'ekihugo bali ng'oyo wabumbawa omo lũtũtũ; kandi ab'elubula bali ng'oyo walũa elubula. 49Kandi ngoko eno tukasosa omundu w'olũtũtũ, litya twasyasosa oyo walũa elubula. 50Balĩkyetu, ngabũga nyiti, ab'emĩnyokũ n'omusasi sibalitoka erisangira Obwami bwa Nyamuhanga; kandi oyukahonda siangatoka erisangira n'oyutehonda. 51Hulikirira, ngandibabwira erĩkũmbo; ĩtwe bosĩ sitwendisyahola, nĩkwa ĩtwe bosĩ twasyahĩndũkĩbwa, 52oko ndambĩ nguma ng'erĩkohya ly'erĩso, omugulu engubi y'enyũma-nyũma yasyabũga. Kusangwa engubi yasyabũga, neryo abaholĩ basyalũbũkĩbwa omo mũsĩndo owatehonda, netu twasyahindũkĩbwa. 53Kusangwa owakahonda atolere eriambala owatehonda, kandi owakahola atolere iniambala owatehola. 54Neryo omugulu owakahonda oyũ, amabiambala owatehonda, n'owakahola amabiambala owatendisyahola, neryo ekĩnywa ekiri omo Masako kyasyabererera kiti, Oluholo lwabĩrĩherĩbwa, Erĩkĩnda lyamabererera! 55Uwe luholo, erĩkĩnda lyawe liri hahi kwehĩ? Uwe luholo, eritsimita lyawe lirihi kwehĩ? 56Oluholo lukatsimita busana n'ebibi, n'ebibi bikabana obũtokĩ bwabyo omo Migambo 57Nĩkwa tuhe Nyamuhanga y'ewasĩngya, kusangwa akatuha erĩkĩnda omwisi w'Omukama wetu Yesu Kristo. 58Neryo balĩkyetu banze, mũsĩke, simusega-segane, mukanyirire omo mũbĩrĩ w'Omukama, ĩmũnasĩ ebyo mukakolera Omukama si bya busa.

will be added

X\