1 ABANYA KORĨNTO 14

1Neryo mũsondekanaya olwanzo kandi mũhĩre emitima yenyũ oko lũsũnzo lw'Omũlĩmũ. Nĩkwa ekĩlabĩre mukwamirire olũsũnzo lw'erĩtũla omwatsi wa Nyamuhanga. 2Kusangwa omundu amabũga omo mũsindo-mũsĩndo w'ebĩnywa sĩalĩbũga n'abandu, nĩkwa akabũga na Nyamuhanga, kusangwa sihali mundu oyukaminya. Nĩkwa akabũga erĩkũmbo omo bũtokĩ bw'Omũlĩmũ. 3Nĩkwa oyũkatũla omwatsi wa Nyamuhanga akatũlago oko bandu busana n'erĩhĩmbabo, n'erihanabo, n'erĩkĩranĩabo. 4Oyũkabũga omũsĩndo-mũsĩndo w'ebĩnywa akayĩhĩmba ĩyowene; nĩkwa oyũkatũla omwatsi wa Nyamuhanga akahĩmba ekanĩsa. 5Nĩkwa nyiti kumbe ĩnywe bosĩ mũkabũga omo mũsĩndo-mũsĩndo w'ebĩnywa, nĩkwa kumbe kwilaba aho mũkatũla omwatsi wa Nyamuhanga; kusangwa oyũkatũla omwatsi wa Nyamuhanga akaleta endũndĩ kwilaba oyũkabũga ebĩnywa by'omũsĩndo-mũsĩndo, omundu amatindakũmbũlabyo, ekanĩsa siyangabana erĩhĩmbwa mubyo. 6Nĩkwa balĩkyetu, namabahĩkako ngabũga ebĩnywa by'emĩsĩndo-mĩsĩndo nasyabagasirakĩ kwehĩ? Sihali namatindabũga nenyũ ekĩnywa Nyamuhanga akabĩsũla, kutse ekĩnywa ky'eriminya, kutse ekĩnywa ky'eriminyerera, kutse ekĩnywa Nyamuhanga akakangĩrĩraya. 7Nĩkwa ebindu ebikimba ebitawite engebe ng'enyamulera, kutse enanga, byamatendimba ndeke, tukandiminya ebyo bikimba byo tuti kwehĩ? 8Kandi engubi yamatindabũga n'omulenge ndeke, nindi wasyayĩtegekanĩa busana n'amalwa kwehĩ? 9Nawe nibya wamabũga omo mĩsĩndo-mĩsĩndo y'ebĩnywa ebitaminyikere ndeke, abandu basyaminya bati ebyo ũkabũga kwehĩ? Kusangwa wasyabya ũkabũga omo kyanya mo buyira. 10Hali emĩsĩndo mingi y'emĩbũge munakihugo, sihali omuguma owatawite emisobolere yago. 11Nĩkwa namatendiminya omũbũge owakabũga, asyanyiganza ng'omũlũa-hali, nage nasyamuganza ng'omũlũa-hali. 12Neryo kusangwa mwanzĩre eribana olũsũnzo lw'Omũlĩmũ, mwangasonda-sonda olũkahĩmba ekanĩsa, imwatoka erĩkanya mulo. 13Neryo omundu oyũkabũga ebĩnywa by'emĩsĩndo-mĩsĩndo, litolere iniasabira olũsũnzo lw'erĩkũmbũlabyo. 14Kusangwa nomo nangasaba ebĩnywa by'emĩsĩndo-mĩsĩndo, ekĩrĩmũ kyage kikasaba, nĩkwa obũlengekanĩa bwage sibuliminya kindu. 15Neryo ngandikolakĩ kwehĩ? Ngandisaba omo kĩrĩmũ kyage kandi ngandisaba omo bũlengekanĩa bwage nibya. Ngandisyimba omo kĩrĩmũ kyage, kandi ngandisyimba omo bũlengekanĩa bwage nibya. 16Neryo wamaha ewasĩngya uku Nyamuhanga omo kĩrĩmũ kisa, nĩkwa omundu oyuli haguma nawe, asyabũga ati, Amina, busana n'ewasĩngya yawe kwehĩ? kusangwa sĩasĩ ebyo ũkabũga. 17Kusangwa uwe ukaha ewasĩngya yo ndeke uku Nyamuhanga, nĩkwa ogundi mundu oyo sĩalĩwatĩkĩbawa. 18Ngaha Nyamuhanga yo wasĩngya, ngabũga ebĩnywa by'emĩsĩndo-mĩsĩndo kwilaba ĩnywe bosĩ. 19Nĩkwa omo kanĩsa nyanzĩre erĩbũga ebĩnywa bitanu ebĩkogũbawa inatoka erĩmĩnyĩsya abandi, kwilaba erĩbũga ebĩnywa elfu eby'emĩsĩndo-mĩsĩndo. 20Balĩkyetu, omo malengekanĩa wenyũ, simubye ng'abana. Nĩkwa busana n'ebibi mubye ng'abana, kandi mubye bakulu abahĩkene omo malengekanĩa wenyũ. 21Omo Masako kĩsakĩre kiti, Omukama ati, Nasyabũga n'abandu aba; Nasyalayirabo omo bandu b'emĩbũge y'ehali, N'omo mĩnywa y'abandu abakalũa ehali, Nĩkwa abandu bage sibendisyanyihulikirira. 22Neryo olũsũnzo lw'emĩbũge mĩsĩndo-mĩsĩndo sĩ kĩmĩnyĩsyo busana n'abandi ababĩrĩkĩrĩrya, nĩkwa busana n'abatĩkĩrĩraya. Kandi erĩtũla omwatsi wa Nyamuhanga nĩ kĩmĩnyĩsyo busana n'abandu abĩkĩrĩraya, si busana n'abatĩkĩrĩraya. 23Neryo ekanĩsa yosĩ yamahĩndana haguma, n'abosĩ bakabũga emĩbũge y'omũsĩndo-mũsĩndo, neryo abandu abatasĩ, kutse abatĩkĩrĩrye, bamahĩkamo sĩbendĩsyabũga bati muli basĩre kwehĩ? 24Nĩkwa abosĩ bamatũla omwatsi wa Nyamuhanga, neryo oyũtĩkĩrĩrye kutse oyũtasĩ amahĩkamo, akandĩsĩngwa busana n'ebĩnywa by'abosĩ, kandi asyatswerwa busana n'ebĩnywa byosĩ ebyo akowa. 25Kandi emyatsi eyĩbĩsamĩre y'omutima wuwe ĩkamĩnyĩkalĩbawa, neryo asyawa ahisi n'erĩramya Nyamuhanga, ĩnĩakabũga ati, Kwenene Nyamuhanga ali omo katĩkatĩ kenyũ. 26Balĩkyetu, omwatsi abere ati kwehĩ? Omugulu mũkahĩndana haguma, omundu muguma awite olwimbo, n'ogundi awite ekĩnywa ky'erĩkangĩrĩrya, n'ogundi awite erĩbĩsũlĩrwa lya Nyamuhanga, n'ogundi awite ekĩnywa ky'omũsĩndo-mũsĩndo, n'ogundi awite erĩkũmbũlakyo. Emyatsi yosĩ ikolawe busana n'erĩhĩmba ekanĩsa. 27Omundu amabũga ebĩnywa by'omũsĩndo-mũsĩndo, babye babiri, kutse basatu basa, babye bakakwamirirana, neryo omuguma akũmbũle ebĩnywa byabo. 28Kandi hamabya isihali omundu w'erĩkũmbũlabyo, omundu oyo w'ebĩnywa mĩsĩndo-mĩsĩndo abye bũkũtũ omo kanĩsa; akanaye na Nyamuhanga kandi ayibwire omo mutima wuwe. 29Kandi habye bandu babiri kutse basatu abakatũla omwatsi wa Nyamuhanga, n'abandi balenge ebyo bakabũga. 30Nĩkwa omundu muguma oyo wĩkere, amahabwa erĩbĩsũlĩrwa erĩkalũa uku Nyamuhanga, oyũkabũga ahune. 31Kusangwa ĩnywe bosĩ mukatoka erĩtũla omwatsi wa Nyamuhanga muguma muguma, neryo abosĩ batoke eriiga n'erĩsĩkya emitima. 32Kusangwa abakatũla omwatsi wa Nyamuhanga bakatoka erĩyĩkakĩrya. 33Kusangwa Nyamuhanga si Nyamuhanga w'olukanda, nĩkwa ni w'obuholo. Ngoko biri omo syokanĩsa syosĩ sy'abandu ba Nyamuhanga, 34Abakalĩ bangahuna omo syokanĩsa; kusangwa sibali n'ehamũlĩ y'erĩbũga, nĩkwa bayibombeke ngoko Emigambo ĩkabũga. 35Kandi bamasonda eriminya omwatsi, babũlaye abĩbabo b'eka. Kusangwa siritolere omũkalĩ akabũgĩra omo kanĩsa. 36Kw'ekĩnywa kya Nyamuhanga kyalũa ũkw'ĩnywe kwehĩ? Kutse kyabahĩkako ĩnywebene kwehĩ? 37Omundu amaganĩrya kw'ali mũtũlĩ w'omwatsi wa Nyamuhanga, kutse kw'awite olũsũnzo olũkalũa oko Mũlĩmũ, aminye ngoko emyatsi eyo ngabasakira ni kihano ky'Omukama. 38Nĩkwa omundu amatendĩrĩga ekĩ, nenyũ sĩmũmũlĩge. 39Neryo balĩkyetu, mũsondaye n'omũhwa erĩtũla omwatsi wa Nyamuhanga, kandi sĩmũganaye erĩbũga ebĩnywa by'omũsĩndo-mũsĩndo. 40Nĩkwa mukole emyatsi yosĩ omw'ĩtegekama n'erĩtondekanĩayo.

will be added

X\