1 ABANYA KORĨNTO 12

1Neryo busana n'olũsũnzo lw'Omũlĩmũ Abũyĩrĩre, balĩkyetu, nyanzĩre imwaminya ndeke emyatsi yalo. 2Mũnasĩ ngoko mugulu mwabya mukine ab'Ebihanda momwakwama esyosanamu esĩtebũga, esyabatalaya ebiro byosĩ. 3Neryo ngabamĩnyĩsaya nyiti, sihali mundu oyuli n'Omũlĩmũ wa Nyamuhanga, oyũkabũga ati, Yesu atakirawe; kandi sihali mundu oyukatoka erĩbũga ati, Yesu ni Mukama, atesondolawa n'Omũlĩmũ Abũyĩrĩre. 4Nĩkwa hali mĩsĩndo-mĩsĩndo y'olũsũnzo, nĩkwa nĩ Mũlĩmũ muguma oyukahalo. 5Kandi hali mĩsĩndo-mĩsĩndo y'emĩbĩrĩ, nĩkwa bakakolera Omukama muguma. 6Neryo hali mĩsĩndo-mĩsĩndo y'amenge w'erikola, nĩkwa ni Nyamuhanga muguma oyukaha oko bandu bosĩ amenge w'erikola emĩbĩrĩ yosĩ. 7Nĩkwa Omũlĩmũ Abũyĩrĩre akaha obuli mundu olũsũnzo busana n'erĩwatĩkya abosĩ. 8Kusangwa Omũlĩmũ akaha omundu muguma erĩbũga ebĩnywa by'amenge, kandi akaha ogundi erĩbũga ebĩnywa by'eriminya. 9Kandi Omũlĩmũ muguma oyũ wakaha oko mundu muguma erĩkĩrĩrya, n'oko gundi olũsũnzo lw'erĩlamya esyondwala. 10Kandi Omũlĩmũ akaha ogundi mundu obũtokĩ bw'erikola ebitiko-tiko; n'oko gundi akaha olũsũnzo lw'erĩbũga engulu ya Nyamuhanga; kandi oko gundi akaha amenge w'erisombola omo lũsũnzo olũkalũa oko Mũlĩmũ n'olũtelũa oko Mũlĩmũ. N'oko gundi, akamuha erĩbũga emĩsĩndo-mĩsĩndo y'ebĩnywa, n'ogundi akamuha erĩkũmbũla ebĩnywa ebyo. 11Nĩkwa nĩ Mũlĩmũ muguma oyukakola omo lũsũnzo olũ, iniakagabira oko buli mundu olũsũnzo, ngoko anzĩre. 12Kusangwa ngoko mubiri ni muguma nĩkwa awite ebĩtsũko bingi; n'ebĩtsũko byosĩ by'omubiri nomo byangabya bingi, ni mubiri muguma, neryo Kristo kw'ali atya. 13Kusangwa omo Mũlĩmũ muguma ĩtwe bosĩ twabĩrĩbatĩsĩbwa, n'omo mubiri muguma, ĩtwe Bayũda kutse ab'Ebihanda, kutse abakobe, kutse ab'obwĩranda; ĩtwe bosĩ twabirihabwa erĩpũlya oko Mũlĩmũ muguma. 14Kusangwa omubiri sĩ kĩtsũko kiguma, nĩkwa awite ebĩtsũko bingi. 15Ekisando kyamabũga kiti, ĩngye kusangwa sindi byala, neryo sindi w'omubiri, ekyo sikyangaleka kikatindabya ekĩtsũko ky'omubiri. 16Kandi okũtũ kwamabũga kuti, Kusangwa sindi rĩso, neryo sindi w'oko mubiri, ekyo sikyangaleka okũtũ ikutabya kĩtsũko ky'omubiri. 17Ko mubiri gosĩ amabya lĩso, angowa ati kwehĩ? Kandi kumbe omubiri gosĩ amabya kũtũ, angatoka erĩowa ekikumbo ky'ati kwehĩ? 18Nĩkwa lino Nyamuhanga abĩrĩhĩra ebĩtsũko omo mubiri, obuli kĩtsũko aho anzĩre. 19Kusangwa ebyosĩ byamabya ĩnĩ kĩtsũko kiguma, neryo omubiri angabya hayi kwehĩ 20Nĩkwa lino hali ebĩtsũko bingi, n'omubiri muguma. 21Neryo erĩso siryangatoka eribwira ebyala liti, Ukangubira kyahi kwehĩ? Kandi omutwe siangatoka eribwira ebisando, ati, Ukangubira kyahi kwehĩ? 22Nĩkwa ni kwenene ebĩtsũko by'omubiri ebikabya nga byolo-byolo kwilaba ebindi, nĩkwa bitolere kutsibu. 23Kandi ebĩtsũko by'omubiri ebyo tũkaganĩraya nga sibyegasakĩ, byo tũkasĩkaya kwilaba ebindi. Kandi ebĩtsũko ebyo ebite bibuya byo tũkasũga. 24Nĩkwa ebĩtsũko bibuya ebyo sibiri n'obwaga bw'erĩsũgwa. Nĩkwa Nyamuhanga mwahangika omubiri, ĩnĩakasĩkaya ekĩtsũko ekyo ekikabula erĩsĩkya. 25Nyamuhanga mwakola atya ati sihabye erikatulana omo mubiri, nĩkwa ebĩtsũko bĩwatĩkanaye. 26Neryo ekĩtsũko kiguma kyamagalwa, ebĩtsũko byosĩ bikagalawa haguma nakyo; kandi ekĩtsũko kiguma kyamasĩkĩbwa, ebĩtsũko byosĩ bikatsema haguma nakyo. 27Neryo nenyũ muli mubiri wa Kristo, kandi ĩnywe bosĩ muli bĩtsũko byago. 28Neryo omo kanĩsa, Nyamuhanga abĩrĩhĩra ebyosĩ omo mianya yabyo; omo mwanya w'erĩmbere mwahĩra abakwenda, n'omo mwanya w'akabiri mwahĩra abatũlĩ b'omwatsi, n'ow'akasatu, abakangĩrĩrya, neryo abakakola ebitiko-tiko, neryo olũsũnzo lw'erĩlamya esyondwala, neryo abakawatĩkaya abandi, neryo abakasondola omũbĩrĩ, neryo abakabũga emĩsĩndo-mĩsĩndo y'ebĩnywa. 29Abosĩ ni bakwenda kwehĩ? N'abosĩ nĩ batũlĩ b'omwatsi kwehĩ? Kandi abosĩ nĩ bakangĩrĩrya kwehĩ? Abosĩ sibawite obũtokĩ bw'erikola ebitotiko kwehĩ? 30Abosĩ bawite olũsũnzo lw'erĩlamya esyondwala kwehĩ? Abosĩ bakabũga emĩsindo-mĩsĩndo y'ebĩnywa kwehĩ? Kandi abosĩ bakakũmbũla ebĩnywa ebyo kwehĩ? 31Nĩkwa mũkwe omũhwa w'erĩsondya olũsũnzo olũlengĩre olundi. Nĩkwa ĩngye ngabakangaya enzira nyibuya-buya kw'aho.

will be added

X\