1 ABANYA KORĨNTO 11

1Mũnyĩgerereraye ngoko nage ngagerereraya Kristo. 2Nĩkwa ngabapipa kusangwa mukanyibuka ebiro byosĩ, imukakwama ndeke erĩkangĩrĩrya, ngoko nabahalyo. 3Nĩkwa nyanzĩre imwaminya Kristo kw'ali mukulu w'obuli mundu, n'omulume ni mukulu w'omũkalĩ wuwe, kandi Nyamuhanga ni mukulu wa Kristo. 4Nĩkwa omulume oyukaswika omutwe wuwe omugulu akasaba kutse erĩtũlago, akahemula omukulu wuwe, ye Kristo. 5Kandi obuli mũkalĩ oyuteswika omutwe wuwe omugulu akasaba kutse erĩtũlago, akahemula omutwe wuwe, y'ĩba wuwe; kusangwa alingene n'omũkalĩ oyo wabĩrĩsĩswa oko mutwe. 6Kusangwa omũkalĩ amatindaswika omutwe wuwe, angatwa esyonzwiri siwe, nĩkwa lyamabya ĩnĩ ĩsoni busana n'omũkalĩ erĩtwa esyonzwiri siwe kutse erĩsĩsa omutwe wuwe, aswike omutwe wuwe. 7Omulume siangaswika omutwe wuwe, kusangwa iye akakanganaya ekĩsosekanĩo n'olukengerwa bya Nyamuhanga. Nĩkwa omũkalĩ akakanganaya olukengerwa lw'omulume. 8Kusangwa omulume omugulu ahangikawa, mwatalũa omo mũkalĩ, nĩkwa omũkalĩ mwalũa omo mulume. 9Kandi omulume mwata-hangikwa busana n'omũkalĩ, nĩkwa omũkalĩ mwahangikwa busana n'omulume. 10Neryo busana n'abamalaĩka, omũkalĩ atolere iniabya n'ekĩmĩnyĩsyo ky'ehamũlĩ oko mutwe wuwe. 11Nĩkwa embere sy'Omukama, omũkalĩ siangabyaho butsira mulume, n'omulume naye siangabyaho butsira mũkalĩ. 12Kusangwa ngoko mũkalĩ alũa oko mulume, litya nibya omulume akalũa oko mũkalĩ iniakabutawa atya; kandi emyatsi yosĩ ĩkalũa uku Nyamuhanga. 13Ĩnywe musohe, linatolere omũkalĩ iniasaba Nyamuhanga ĩsĩaswĩkĩre omutwe wuwe kwehĩ? 14Nĩkwa ebitula bĩkabakangĩrĩraya biti, omulume amabya n'esyonzwiri nyiri-nyiri, sĩkamwĩta esĩsonĩ, 15nĩkwa esyonzwiri nyiri-nyiri ni bubuya busana n'omũkalĩ. Kandi ahabawasyo busana n'eriswika omutwe. 16Nĩkwa omundu amabya anzĩre erikuba obuhaka nyiti, ĩtwe kutse amakanĩsa wa Nyamuhanga, situwite eyindi mitsye. 17Nĩkwa omugulu ngabahana lino, sindibapipa, kusangwa omugulu mũkahĩndana haguma sĩmwehĩndana ndeke, nĩkwa mũkahĩndana nabi. 18Kusangwa omugulu mũkahĩndana omo kanĩsa, namowa ko hali erigabana omo katĩkatĩ kenyũ; kandi ngalĩga nyiti ni kwenene hake. 19Kusangwa litolere ihabya erigabana omo katĩkatĩ kenyũ, neryo abakakwama ndeke ibaminyikala. 20Neryo omugulu mũkahĩndana haguma, sĩmũlĩhĩndana kwenene busana n'erirya emesa y'Omukama. 21Kusangwa omugulu mukalya, obuli mundu akatsũka erirya ebyalya biwe; omuguma akawira, n'ogundi akakũnda. 22Ko simuwite amanyũmba wenyũ aho mukalira n'erĩpũlya kwehĩ? Kutse mukapona ekanĩsa ya Nyamuhanga, n'erihemula abatawitekĩ kwehĩ? Nyibabwirekĩ kwehĩ? Nasyabapipa kwehĩ? Iyihi, sindibapipa omo mwatsi oyũ. 23Kusangwa ebyo Mukama anyĩkangĩrĩraya bye n'ebyo nabĩrĩbakangĩrĩrya nyiti, Omukama Yesu omo kiro ahoterawa mwĩmya obundu; 24neryo abere abiha ewasĩngya uku Nyamuhanga, mwatwabo, mwabũga ati, Obũ ni mubiri wage owali busana nenyũ. Mukole mutya busana n'erinyibuka. 25N'enyũma w'erirya mwĩmya olũtehĩ lw'atya, ati, Olũtehĩ olũ ni ndagane nyihya-nyihya omo musasi wage; mukole mutya emigulu yosĩ mũkapũlaya kulo busana n'erinyibuka. 26Kusangwa emigulu yosĩ mukalya obundu obũ n'erĩpũlya oko lũtehĩ, mũkakanganaya oluholo lw'Omukama, erĩhĩka aho asyasira. 27Neryo omundu oyukalya oko bundu obo bw'Omukama kutse erĩpũlya oko lũtehĩ luwe omo mũsĩndo owatatolere, ĩnĩabĩrĩhalya oko mubiri n'omusasi w'Omukama. 28Nĩkwa omundu ayitswere, neryo alye oko bundu obo n'erĩpũlya oko lũtehĩ. 29Kusangwa omundu amatindaminya ndeke omwatsi w'omubiri w'Omukama omugulu akalya n'erĩpũlĩrya oko mesa eyo, akayiretera olubanza omugulu akalya n'erĩpũlĩrya oko mesa eyo. 30Ekĩ kyalekĩre abangi omo katĩkatĩ kenyũ ibalwala n'eribya bolo-bolo, n'abandi babirihola. 31Nĩkwa kumbe twamayitswera sitwangabya omo lubanza lwa Nyamuhanga. 32Nĩkwa omugulu tukatswerawa, tukakungawa n'Omukama, ĩtũtaswahĩrwa oko lubanza lubi haguma n'ekihugo. 33Neryo balĩkyetu, omugulu mũkahĩndana eririra oko mesa y'Omukama, mulindirirane. 34Omundu amakwa enzala, alire eka wuwe, neryo ĩmũtaswahĩndana n'eribana olubanza. N'eyindi myatsi nasyategekanĩayo ekiro nasyasa.

will be added

X\