1 ABANYA KORĨNTO 10

1Balĩkyetu, nyanzĩre imwaminya, ngoko abotata-kulu betu abosĩ mobasondolwa n'ekĩtũ, n'abosĩ mobasoka Engetsi y'Omunyama. 2Kandi abosĩ mobabatĩsĩbwa omo kĩtũ n'omo ngetsi ng'endeko ya Musa. 3N'abosĩ mobalya akalyo kaguma k'ekĩrĩmũ. 4Kandi abosĩ mobapũlya eby'erĩpũlya eby'ekĩrĩmũ, kusangwa babya bakapũlya oko lĩbwe ery'ekĩrĩmũ, eryakwamabo. Erĩbwe eryo lyabya Kristo. 5Nĩkwa Nyamuhanga mwatatsemesĩbwa n'abangi ba kubo; kusangwa ebĩnda byabo mobyapanzapanzwa omo mbwarara. 6Neryo, emyatsi yosĩ eyĩ yabiribya ebĩmĩnyĩsyo busana netu, situbye tũkakwa esyongumbu sy'emyatsi mibi ngoko abo nabo bakwa esyongumbu esyo. 7Kandi simubye abasabĩ b'esyosanamu, ngoko abandi ba kubo babya, ngoko kĩsakĩre kiti. Abandu mobĩkala ahisi busana n'erirya n'erĩpũlya, kandi mobahangana n'erisata. 8Kandi sĩtũsĩngĩre ng'abandi ba kubo ko basĩngĩra, neryo mobahola omo kiro kiguma, abandu elfu makũmĩ abiri n'ĩsatu 23,000. 9Kutse situlenge oko Mukama ngoko abandi ba kubo ko bamulengako, neryo mobĩtwa n'esyonzoka. 10Simuyitonge ng'abandi ba kubo ko bayitonga, neryo mobĩtwa n'omũtĩngĩtya. 11Neryo emyatsi eyĩ moyahĩka kubo ng'ekĩmĩnyĩsyo busana n'abandi bandu, kandi moyasakwa busana n'eritukunga. Kusangwa twĩkere hakũhĩ n'endũlĩ y'omugulu ono. 12Neryo oyũkaganĩraya ati imene ndeke, ayĩtegaye akasyayĩhĩnda. 13Erirengwako eryo lĩkabahĩkako lye n'eryo lyo lĩkanahĩka oko bandi bandu; Nyamuhanga sialiregula, siendĩsyalĩga mukalengwako kwilaba amaka wenyũ; nĩkwa omw'irengwako eryo asyabaha amaka w'erĩyĩyĩnĩa, n'enzira y'eribala. 14Neryo abanze betu, musage erisaba esyosanamu. 15Ngababwira ng'abandu b'amenge; neryo musohe ebyo ngabũga. 16Olũtehĩ olo lw'omũyĩsa, tukaha ewasĩngya busana nalo. Olũtehĩ olo si lw'erisangira omo musasi wa Kristo kwehĩ? Kandi obundu obo tũkatsũtsanga, si bw'erisangira omo mubiri wa Kristo kwehĩ? 17Neryo kusangwa obundu ni buguma, ĩtwe nomo tune bangi, tuli mubiri muguma. Kusangwa ĩtwe bosĩ tukasangira obundu buguma. 18Mũlebaye ekihanda kya Ĩsraelĩ; abakalya oko mahere sibesangira omo mwatsi w'ekiherero kwehĩ? 19Nyĩtĩkĩ kwehĩ? Nyiti ebyo ebikaherawa oko sanamu ni kindu kwehĩ? Kutse esanamu nayo ni kindu kwehĩ? 20Iyihi; nĩkwa nyiti, ebyo ab'Ebihanda bakahera, bakahererabyo esyombĩnga, butsira uku Nyamuhanga; kandi sĩnyanzĩre mukasangira esyombĩnga. 21Simwangatoka erĩpũlya oko lũtehĩ lw'Omukama n'oko lũtehĩ lw'esyombĩnga; simwangatoka erisangira eby'emesa y'Omukama n'eby'emesa y'esyombĩnga. 22Tukasonda erĩhĩtanĩa Omukama kwehĩ? Ko tũmũlengĩrye maka kwehĩ? 23Emyatsi yosĩ yanganakolwa, nĩkwa emyatsi yosĩ sirigasakĩ. Emyatsi yosĩ yanganakolwa, mkwa emyatsi yosĩ sĩrĩhĩmba. 24Omundu sĩasondaye endũndĩ yiwe ĩyowene-wene, nĩkwa asondaye endũndĩ busana n'omũlĩkyabo. 25Wanganalya ebyosĩ ebĩkagũlĩbawa omo katale k'esĩswĩ, ĩsũlĩtabũlyakĩ busana n'obunya-mutima bwawe. 26Kusangwa kĩsakĩre kiti, Ekihugo n'ebyosĩ ebiri mukyo ni by'Omwami Mukulu. 27Omundu oyũtĩkĩrĩrye amakubirikira okw'irya, nawe wamanza eriyayo, ulye ebyo bakahĩra oko mesa, ĩsũlĩtabũlyakĩ busana n'obunya-mutima bwawe. 28Nĩkwa omundu amakubwira ati, Esĩswĩ esĩ syaherawa oko sanamu, sulyesyo busana n'oyo wakũtũlĩrago, kandi busana n'obunya-mutima. 29Nĩkwa sindiahula obunya-mutima bwawe, nĩkwa obunyamutima bw'oyo wababwira. Kusangwa busana nakĩ obwĩranda bwage bukatswerawa busana n'obunya-mutima bw'ogundi mundu kwehĩ? 30Namalya akalyo iningaha ewasĩngya uku Nyamuhanga, busana nakĩ ngatongawa nabi busana n'akalyo ako ngalya n'ewasĩngya kwehĩ? 31Neryo wamalya akalyo kutse ũkapũlya, kutse wamakola ekĩndũkĩ, ukole ebyosĩ busana n'eriha olukengerwa uku Nyamuhanga. 32Simukole ekyangaleta omwaga oko Bayũda, kutse oko b'Ebihanda, kutse oko kanĩsa ya Nyamuhanga. 33Ngoko ĩngye ngalenga erĩtsemesya abandu bosĩ omo myatsi yosĩ, ĩsĩndĩsondaya endũndĩ yage, nĩkwa ngasondaya endũndĩ y'abandu bangi, batoke erĩlamĩbwa.

will be added

X\