1 ABANYA KORĨNTO 1

1Ĩngye Paũlo, oyo wabirikirawa busana n'erisonda lya Nyamuhanga eribya mukwenda wa Kristo Yesu. Ĩngye n'omũlĩkyetu Sosĩtenĩ, 2tukabasakira haguma, ĩnywe kanĩsa ya Nyamuhanga eyiri eKorĩnto, ababirikirawa eribya bandu ba Nyamuhanga, abahigulawa erimatikana na Kristo Yesu. Kandi tukabasakira haguma n'abandu bosĩ ehosĩ abakalakira erĩna ly'Omukama wetu Kristo. Yo Mukama wabo n'owetu. 3Nyamuhanga Tata wetu n'Omukama Yesu Kristo abahe olukogo n'obuholo. 4Ngaha Nyamuhanga y'ewasĩngya emigulu yosĩ busana nenyũ. Kandi ngamuha ewasĩngya busana n'olukogo luwe, olo mwahabawa busana na Kristo Yesu. 5Kusangwa eriwatana na Kristo lyabiribaha eribya ab'ebindu omo myatsi yosĩ, omw'ĩbũga lyosĩ, n'amenge gosĩ. 6Engulu ya Kristo yabiribererera omwisi wenyũ, 7neryo simwetabula olũsũnzo n'oluguma lwa Nyamuhanga, imunemulindirira eriminyikala ly'Omukama wetu Yesu Kristo. 8Naye asyabasĩkya erĩhĩka oko ndũlĩ, isimuli oko lubanza oko kiro ky'Omukama wetu Yesu Kristo. 9Nyamuhanga sialiregula, naye abiribabirikira erisakana n'Omugala wuwe, Omukama wetu Yesu Kristo. 10Neryo balĩkyetu, ngabalemba-lemba omo lĩna ly'Omukama wetu Yesu Kristo, nyiti ĩnywe bosĩ mũbũge kiguma. Nyiti sihabye erigabana omo katĩkatĩ kenyũ, nĩkwa mubohane omo bũlengekanĩa buguma n'omutima muguma. 11Kusangwa abalĩkyetu ab'ekĩtũnga kya Kloe, babĩrĩnyĩtũlĩrago busana nenyũ bati, hali erinegena omo katĩkatĩ kenyũ. 12Neryo nyiti, obuli mundu ũkw'ĩnywe akabũga ati, Ĩngye mdi wa Paũlo, n'ogundi ati, Ĩngye indi wa Apolo, n'ogundi ati, Ĩngye mdi wa Petero, n'ogundi ati, Ĩngye indi wa Kristo. 13Ko Kristo agabĩrwe kwehĩ? Na Paũlo mwabambwa oko musalaba busana nenyũ kwehĩ? Kutse mwabatĩsĩbawa omo lĩna lya Paũlo kwehĩ? 14Ngaha Nyamuhanga y'ewasĩngya kundi mondabatĩsya mundu n'omuguma omo katĩkatĩ kenyũ, nina Krĩspo na Gayo, ĩbobene. 15Neryo sihabye mundu oyũkabũga ati mwabatĩsĩbawa omo lĩna lyage. 16Nĩkwa monabatĩsya enyũmba ya Setefano, nĩkwa sĩnyasĩ ogundi nabatĩsaya. 17Kusangwa Kristo mwatanyituma erĩbatĩsya, nikwa anyituma erĩtũla Engulu Yowene. N'erĩtũlago butsira omo kĩsehya ky'ebĩnywa by'abandu, neryo omusalaba wa Kristo akasyayirwa mo buyira. 18Kusangwa omwatsi w'omusalaba nĩ bũkĩrũ oko bandu abakahera, nĩkwa nĩ bũtokĩ bwa Nyamuhanga busana netu, ĩtwe tũkalamĩbawa. 19Kusangwa Amasako akabũga ati, Nasyaherya amenge w'ab'amenge, Kandi nasyalũsya eriminya ly'abanyima-nyima. 20Omundu w'amenge ali hahi kwehĩ? Omũsakĩ ali hahi kwehĩ? Embũyĩ y'ekihugo y'omugulu ono yiri hahi kwehĩ? Nyamuhanga abiriyira amenge w'ekihugo kino mo bũkĩrũ. 21Kusangwa ekihugo mokitetatoka eriminya Nyamuhanga omo menge wakyo. Neryo omo menge wuwe Nyamuhanga mwatsemesĩbwa erĩlamya abandu abakĩkĩrĩraya busana n'obũkĩrũ bw'omwatsi tũkatũla. 22Kusangwa Abayũda bakabũlaya ebitiko-tiko, n'Abagĩrĩkĩ bakasonda-sonda amenge; 23nĩkwa ĩtwe tũkakanganaya Kristo oyo wabambawa oko musalaba. Abayũda sĩbanzĩre omwatsi oyũ, n'abandu b'Ebihanda bakaganza omwatsi oyo mo bũkĩrũ. 24Nĩkwa busana n'abo Nyamuhanga akabirikira, Abayũda n'Abagĩrĩkĩ, Kristo nĩ bũtokĩ bwa Nyamuhanga, kandi, ni menge wa Nyamuhanga. 25Kusangwa obukahulawa mo bũkĩrũ bwa Nyamuhanga, ni bw'amenge kwilaba aw'abandu, n'obukahulawa mo bolo bwa Nyamuhanga, bũkalĩre kwilaba abandu. 26Balĩkyetu, mwibuke ngoko mwabya ekiro Nyamuhanga ababirikira. Sihabya bangi omo katĩkatĩ kenyũ abakahulawa mo bandu b'amenge, kutse esyombangĩ, kutse abakulu. 27Nĩkwa Nyamuhanga mwayisoga emyatsi mĩkĩrũ y'ekihugo erihemula abandu b'amenge. Kandi Nyamuhanga abiriyisoga emyatsi myolo y'ekihugo erihemula esyombangĩ. 28Kandi Nyamuhanga mwayisoga emyatsi eyikaponawa n'abandu, n'emyatsi eyikaganzawa n'abandu nga buyira, kandi emyatsi eyiteho, iniatoka erĩsĩnga emyatsi eyiriho. 29Neryo sihabye mundu oyukayihalamba embere sya Nyamuhanga. 30Nĩkwa Nyamuhanga abĩrĩbamatĩkanĩa na Kristo Yesu. Kandi Nyamuhanga abiriyira Kristo eribya menge wetu. Busana na Kristo tukatunganana embere sya Nyamuhanga, kandi busana na Kristo tukabya bana ba Nyamuhanga, n'eribya bwĩranda. 31Neryo ngoko Amasako akabũga ati, Oyukayihalamba, ayihalambe umw'ebyo Omukama abirikola.

will be added

X\