1 TIMOTEO 3

1uLukaani ulu ingĩ lwa tai; wensi kanga wadũũme udĩĩmi wa ulĩnguli usiile mulĩmo namuuza. 2Luulo gua, ijĩpĩĩle mulĩnguli wĩĩ utĩĩte lukũmo naluuza, mugoosia wa musungu umuĩ, kangĩ nasikukugaalaa, munamasala muntu wa kĩĩsa-kĩĩsa, musũgamĩĩlia agenda, numanile kwilanga; 3sika muntu nwijiĩlĩĩle ulugaalo, sika mukuani ĩpa wĩĩ mupolo, sika wa nkungumi, sunga sika muawa mpiia. 4Ijĩpĩĩle wakendegeele ĩnumba yaakue iiza, nukuamanagiaa ĩaana aakue ĩniinupie nukukuapeela ĩantu ikyulio; 5wensi nasikumanile kwikendegeela ĩnumba yaakue umuene, ukishũũma mbii kwikendegeela ikyanisa lya kĩNzua. 6Ijĩpĩĩle walekitũla mulĩnguli koona waleke kĩkentula wague muulamulua wa kĩShetani; 7kangĩ ijĩpĩĩle kwikuĩlua uuza nĩantu naĩĩlĩ kunzi, koona walekiguĩla mumutego wa kĩShetani. 8Iio-iioo nĩaalĩĩlia iKyanisa ĩĩ akola lukũmo, nasika a masĩĩgo mabĩlĩ, nasika akukopekagiaa umubinio, sunga sika aawa mpiia za nsoni, 9ĩakendegelĩĩle uunkũnkũ wa usuĩĩli muumoo namuelu. 10Nĩndĩĩa gaa agemue tangua; na akondia kukigyelela kĩna agila kishokio, paapo ĩtume umulĩmo wa waalĩĩlia wiKyanisa. 11Nĩasungu gaa ĩĩ a lukũmo naluuza, sika asingĩĩlania, nasika akugaalaa, asuĩĩli mumpola zensi. 12ĩAalĩĩlia iKyanisa ĩĩ agoosia a musungu umuĩ, ĩakendegelĩĩle iiza inumba zaao nĩaana aao; 13kuitĩ naakĩtumaa umulĩmo wa waalĩĩlia iiza, akĩligĩlagiaa ikyulio naliiza, nuukamatĩkũ wingĩ muusuĩĩli nawĩĩlĩ mwa kĩKilisito Yesu. 14Ndaaĩlĩĩle kwiiiza kumuako kuukaaũ, ĩpa nakuandĩkĩla izi 15kanga ntinie, umane kĩna ijĩpĩĩle ĩantu kwigendela munumba ya kĩNzua. ĩlĩ lyolĩ kyanisa lya kĩNzua namupanga, ishĩmbĩlĩ kangĩ mukũlĩla wa tai. 16Kutilĩ kankankani, uunkũnkũ wa wĩtekeli wĩĩtu ingĩ ukulu. uNzua alĩ mũgyeleligue mumuĩlĩ, Nulĩngĩkigua kĩna munakulukuuluu mwa kĩMuau, Alĩ wigyelĩĩle kuamalaĩka, Nutanantigua pakatĩ ya ndugu, Nusuĩĩlua muna unkũmbigyulu, Nunansulua kukiania muukulu.

will be added

X\