ROMA 5

1Toh itah jari badamai tinai dengan Hatalla, awi itah percaya. Tuntang tagal te itah belom huang kadamai dengan Hatalla mahalau Tuhan itah Yesus Kristus. 2Awi itah percaya dengan Yesus, maka Ie mawi itah olih belom huang sintan Hatalla, tuntang hapan sinta te ih itah belom wayah toh. Tagal te itah hanjak atei mingkes kaharap te, iete itah akan mangkeme salamat je inenga Hatalla! 3Tuntang labih bara te, itah kea hanjak huang kajake, basa itah katawan kajake te mawi oloh manjadi baketep, 4tuntang kaketep tau mawi oloh tahan huang tingkes; maka jete je mampalembut kaharap. 5Kaharap je kilau toh dia tau mawi itah korik atei, basa itah jari inyuang awi Hatalla hapan sintan Aie. Hatalla malalus jete hapan Roh Ayue, je jari inenga Awie akan itah. 6Katika itah nihau kaharap, Kristus matei akan itah hong katika je patut je inantu awi Hatalla; padahal itah toh puna oloh je kejau bara Hatalla. 7Akan oloh je adil mahin bahali oloh handak matei. Tapi akan oloh je bahalap, mikeh aton kea oloh je bahanyi matei. 8Tapi Hatalla mamparahan sintan Aie akan itah katika Kristus matei akan itah metoh itah magon oloh badosa. 9Toh itah jari badamai haluli dengan Hatalla mahalau pampatei Kristus; tagal te pasti itah kareh inyalamat kea bara kalait Hatalla awi Kristus. 10Amon hong wayah itah hamusoh dengan Hatalla itah indamai Dengae mahalau pampatei Anak Ayue, mahin hindai limbah toh hubungan itah dengan Hatalla bahalap tinai, batantu itah kareh inyalamat kea mahalau pambelom Kristus. 11Tuntang labih bara te, itah mahin hanjak kea tagal kahalap Hatalla mahalau Tuhan itah Yesus Kristus. Basa mahalau Kristus, toh itah mangkeme kamangat hubungan itah je bahalap te dengan Hatalla. 12Dosa tame akan huang kalunen mahalau ije biti oloh, tuntang bara dosa te lembut pampatei. Kajariae, pampatei tayap akan hapus oloh kalunen, basa oloh handiai jari badosa. 13Helo bara hukum agama Yehudi inenga, dosa jari aton huang kalunen. Tapi dosa dia inuntut, awi jaton hukum je tau ilanggar. 14Aloh kalote, bara jaman Adam sampai hong jaman Moses, pampatei manguasa salepah oloh kalunen. Malahan kare oloh je jaton mawi pelanggaran hapan cara je sama kilau je iawi Adam, kare oloh te mahin omba inguasa awi pampatei. Adam jete gambar Ayue je akan dumah rahian. 15Tapi ewen due te dia sama; basa panengan Hatalla labih hai haream amon inanding dengan pelanggaran je iawi Adam. Pelanggaran ije biti olon mawi oloh are matei. Dia laluen kalabien kahain asin Hatalla tuntang panengan Hatalla je inenga Awie mahalau kahalap atei ije biti oloh, iete Yesus Kristus. 16Panengan Hatalla labih kejau kahaie bara dosan ije biti oloh te. Basa limbah ije biti oloh mawi pelanggaran, maka balua auh hukuman, iete "basala". Tapi limbah are oloh mawi dosa maka dumah panenga bara Hatalla je mansanan, "dia basala". 17Tagal pelanggaran ije biti oloh, pampatei palus tayap akan hete-hete mahalau ije biti oloh te. Dia laluen kalabien kahaie hindai kajarian taloh je ilalus awi ije biti oloh beken, iete Yesus Kristus. Mahalau Ie, Hatalla manampuhak sintae akan are toto oloh tuntang inenga kakai bewei sampai mawi ewen olih badamai tinai dengan Hatalla; ewen aton barakuasa hong kalunen toh mahalau Kristus. 18Jadi, sama kilau pelanggaran ije biti oloh kajariae mawi oloh hapus kalunen ihukum, kalote kea gawin ije biti oloh je manumon kahandak Hatalla, kajariae mawi oloh handiai lapas bara kasalan tuntang mandino pambelom. 19Tuntang ganan ije biti oloh je dia taat te mawi are oloh manjadi oloh badosa, kalote kea tagal ije biti oloh je taat dengan Hatalla maka are oloh olih badamai tinai dengan Hatalla. 20Je manenga hukum agama Yehudi iete Hatalla kabuat. Tapi sasar oloh manggau jalan uka mamenda hukum te, sasar kea ewen malanggar tuntang mawi dosa taharep Hatalla. Tapi sasar olon mawi dosa, Hatalla sasar kea sinta ewen. 21Nah, itah musti matei awi itah mawi dosa. Tapi Hatalla sinta itah tuntang manenga jalan akan itah uka badamai tinai Dengae. Tuntang awi hubungan itah dengan Hatalla jari bahalap tinai, Ie kea manenga pambelom je bujur tuntang katatahie akan itah mahalau Yesus Kristus Tuhan itah.

will be added

X\