PANGARINAH 19

1Limbah te aku mahining auh je sama kilau auh gutok oloh are bara sorga je teha-tehau, "Tara akan Hatalla! Hatallan itah jete Hatalla je manyalamat; Ie te Hatalla je hai tuntang barakuasa! 2Ie mahakim hapan kaadilan tuntang kapintar-kaharati! Ie jari malalus hukuman te mawi lontei hai, je marusak kalunen hapan karayape. Hatalla jari mahukum lontei te, basa ie mampatei kare rewar Hatalla." 3Palus auh oloh are te mangkariak tinai, "Tara akan Hatalla! Asep apui je mangehu lewu hai te kareh mangangkewul harajur!" 4Maka due puluh epat pamimpin tuntang epat taloh belom je intu kaliling padadusan te mahingkep tuntang manyembah Hatalla je mondok hunjun padadusan. Ewen hamauh, "Amen! Tara akan Hatalla!" 5Palus tarahining auh bara padadusan te hamauh, "Tara akan Hatalla, o kakare rewar Hatalla, tuntang oloh handiai -- hai korik -- je manyembah Hatalla!" 6Limbah aku mahining auh taloh je sama kilau auh ije kakawan oloh je are toto, auh sama kilau galombang je letu-letus tuntang kilau auh nyaho je mangaruntong. Aku mahining ewen hamauh, "Tara akan Hatalla! Basa Tuhan, Hatallan itah je Paham Kuasae te toh marentah! 7Keleh itah hanjak rantang tuntang basasurak; keleh itah manara kahain Aie! Basa andau pesta kawin Ayue je bagare Anak Tabiri te jari sampai, tuntang panganten jari tatap uka ingawin. 8Pakaian lena je mangilat jari inenga Akae mangat ihapan." (Pakaian lena iete kare gawi bahalap je ilalus awi ungkup Hatalla.) 9Palus malekat hamauh dengangku, "Surat jetoh: 'Salamat oloh je irawei akan pesta kawin Anak Tabiri te.' " Limbah te malekat te mandahang auhe tinai, "Jetoh ie barita je toto bara Hatalla." 10Aku mahingkep intu taharep malekat te handak manyembah ie, tapi ie hamauh dengangku, "Ela! Ela manyembah aku, keleh manyembah Hatalla! Basa aku kea jipen sama kilau ikau tuntang kilau kare paharim je dehen mimbing auh saksin ewen tahiu Yesus!" Basa auh saksi ain Yesus te je manarang atei oloh je manujum. 11Limbah te aku mite sorga buap, palus mite ije kongan kuda baputi. Oloh je manongkange te arae Je Baketep tuntang Je Bujur. Ie bujur amon mamutus hukum tuntang huang kalahi je ilaluse. 12Matan Aie sama kilau nyalan apui tuntang intu takolok Ayue ie mahapan makota. Intu bitin Aie aton tarasurat aran; tuntang baya ie kabuat ih je mangatawan aran te. 13Jubah je ihapae jari inculop huang daha. Tuntang ie inyewut "Auh Hatalla". 14Kare tantara sorga manuntut Ie manongkang kuda baputi, tuntang hapakaian lena je baputi lentah. 15Bara nyamae balua ije kabilap padang je banyihi tuntang hapan padang te Ie kareh mampakalah kare bangsa, tuntang Ie kareh marentah ewen hapan tongkeh sanaman. Ie kareh mahamis anggor hong eka sarangan mahamis anggor kalait Hatalla je Pangkahain Kuasae. 16Intu jubahe tuntang intu sapake aton tarasurat aran toh, "Rajan kare raja, tuntang Tuhan kare tuan." 17Palus aku mite ije biti malekat mendeng hunjun matanandau. Hapan auh hai ie mantehau kare burong je tarawang intu langit, "Keleh hapumpong kahetoh manalih pesta hai ain Hatalla! 18Kahetoh kuman isin kare raja, isin kare pangkalima, tuntang isin kare oloh menteng; kahetoh kuman isin kare oloh je manongkang kuda dengan isin kudae tuntang isin kare salepah ungkup oloh kalunen, hai-korik, jipen atawa oloh mardeka!" 19Limbah te aku mite meto te, tuntang kare raja hunjun petak dengan kare kawan tantara ain ewen, hapumpong mangat kalahi malawan Ie je manongkang kuda baputi te tuntang kare tantara Ayue. 20Maka meto te buah tawan haya-hayak dengan nabi pananjaro je jari mawi kare taloh heran intu taharep meto te. (Hapan kare taloh heran te meto te manipu kare oloh je jaton tempon tanda ain meto te, tuntang kare oloh je manyembah hampatong meto te.) Palus meto te tuntang nabi pananjaro te injakah belo-belom akan huang tasik apui je manyala hagandang awi barirang. 21Tuntang kawan tantara ain ewen te impatei hapan padang je balua bara nyaman oloh je manongkang kuda baputi te. Maka kare burong mahin dumah tuntang manyangit kuman isin ewen je impatei te.

will be added

X\