MATEUS 10

1Hong sinde andau Yesus mantehau due walas murid Ayue uka hapumpong. Palus Ie manenga akan ewen kuasa hapa maharak kare roh papa tuntang mampakeleh sepsimpan ampin panyakit tuntang kare karusak biti. 2Aran due walas rasul te ie te: je solake, Simon (je inyewut kea Petrus) dengan paharie Andreas, palus Yakobus dengan paharie Yohanes, ewen te anak Sebedeus. 3Limbah te Pilippus tuntang Bartolomeus, dengan Tomas tuntang Mateus, panagih pajak, tuntang Yakobus anak Alpeus, tuntang Taddeus; 4balalu Simon je Menteng, tuntang Yudas Iskariot je mandarhaka mawi Yesus. 5Limbah te kare due walas rasul te inyoho Yesus dengan auh peteh kalotoh, "Ela manalih akan daerah ain kare oloh je dia Yehudi. Ela kea akan kare lewun oloh Samaria. 6Tapi talih akan kare oloh Israel, je mambatang akan ewen je layang. 7Sanan akan ewen je Hatalla te kareh bajeleng marentah kilau Raja. 8Pakeleh kare oloh je haban; mbelom kare oloh je matei; pakeleh kare oloh je buah panyakit kulit je mimbit bahaya, tuntang harak kare setan. Keton jari manarima kare taloh samandiai te dia imbayar. Jadi tenga kea jete kilau te kea. 9Ela mimbit duit amas, duit perak atawa duit tambaga. 10Ela kea mimbit kambut sadakah atawa due lambar pakaian akam hong jalan, atawa sapatu, atawa sukah. Karana oloh je bagawi, puna inanggong huang kare katapase. 11Amon keton sampai kota atawa lewun oloh, gau oloh je maku manarima keton. Melai ih omba ie sampai keton tolak tinai. 12Metoh keton tame huma, keleh keton hamauh, 'Keleh Tuhan mamberkat keton.' 13Amon kare oloh huma te manarima keton, nauhe ih auh taben keton te tetep melai hong ewen. Tapi amon ewen dia manarima keton, jijit haluli auh taben keton te. 14Amon aton huma atawa lewu je dia maku manarima keton atawa dia maku mahining auh keton, lihi ih eka te tuntang ngibas kawon petak bara tatap pain keton. 15Ingat! Hong Andau Kiamat, kare oloh hong lewu Sodom tuntang Gomora labih murah iampun awi Hatalla, bara kare oloh hong lewu te!" 16"Hining toh: Aku manyoho keton sama kilau tabiri je jaton bara kaabas manalih bentok kare sarigala je basiak. Keton musti barendeng sama kilau handipe tuntang bujur atei sama kilau burong dara. 17Keleh keton tetep bajaga, basa keton kareh inawan tuntang iimbit akan pengadilan. Keton kareh ingapehe hong kare huma sombayang. 18Keton kareh iimbit manaharep kare oloh je mimbing kuasa tuntang kare raja awi keton murid-Ku. Tuntang jete katika je bahalap akan keton manyaksi tahiu Aku taharep ewen tuntang taharep kare oloh je dia mangasene Hatalla. 19Tapi amon keton iimbit akan pengadilan, ela mikeh tahiu taloh je musti ingotak keton, atawa kilen ampie keton musti hakotak. Basa taloh je musti insanan keton te, kareh insanan akan keton pas tumon katikae. 20Karana je hakotak metoh te dia ie keton, tapi Roh Bapa je hong sorga, mahalau keton. 21Maka kareh akan manjadi: oloh manyarah paharie kabuat uka impatei. Jete kea kareh manjadi awi bapae dengan anake. Kare anak kareh malawan indue tuntang bapae, tuntang manyarah ewen uka impatei. 22Keton kareh inyingi awi oloh samandiai awi keton toh murid-Ku. Tapi oloh je tahan sampai kalepahe kareh inyalamat. 23Amon keton ingapehe hong ije lewu, hadari keton akan lewu je beken. Aku mansanan akan keton: Helo bara keton manalih lepah kare lewu hong Israel, Anak Olon jari dumah. 24Murid dia labih hai bara gurue, tuntang jipen dia labih hai bara tempoe. 25Sukup ih ije biti murid olih sama kilau gurue, tuntang ije biti jipen sama kilau tempoe. Amon kapala keluarga jari inggare Beelsebul, mahin hindai oloh je huang hapus humae. Ewen kareh inggare oloh labih papa hindai!" 26"Ela mikeh dengan olon. Jaton taloh je basilim, je kareh dia gitan, tuntang jaton taloh je basahokan, je kareh dia iungkar. 27Taloh je insanang-Ku akan keton hong eka je kaput keton musti mansanae tinai hong katarang andau. Tuntang taloh je imbisik huang pindingm, mbarita jete akan hete-hete sapire kaolih keton! 28Ela mikeh dengan ewen je mampatei biti, tapi jaton kuasae mampatei hambaruan. Keleh keton mikeh dengan Hatalla je kuasa marusak biti kalote kea hambaruan intu apui naraka. 29Due kongan burong ampit olih imili hapan ije kabintap duit je pangkakorike. Tapi aloh kalote, ije kongan mahin jaton ewen manjato akan petak amon dia ingahandak awi Bapa keton. 30Kare balau hong takolok keton mahin uras jari iise. 31Awi te, ela mikeh! Keton toh labih barega bara kare burong ampit!" 32"Ewe-eweh je dengan katoton auhe mangaku arepe murid-Ku intu taharep oloh are, Aku kareh mahin mangaku ie intu taharep Bapa-Ku je huang sorga. 33Tapi ewe-eweh je milim arepe murid-Ku intu taharep oloh are, Aku kareh milim ie kea intu taharep Bapa-Ku je huang sorga." 34"Ela manyangka Aku toh mimbit kadamai akan kalunen toh. Aku dia mimbit kadamai tapi kalawan. 35Aku dumah mawi sabab sampai anak hatue malawan bapae, anak bawi malawan indue, manantu bawi malawan empoe je bawi. 36Yoh, je kareh manjadi musoh je pangkahaie, iete oloh huang keluarga te kabuat. 37Oloh je masi bapae atawa indue malabien bara Aku, dia patut manjadi murid-Ku. Kalote kea oloh je masi anake bawi atawa hatue labien bara Aku. 38Tuntang oloh je dia maku meton sampalakie tuntang omba Aku, dia patut manjadi murid-Ku. 39Oloh je mahaga pambelom ayue kabuat, kareh nihau pambelome, tapi oloh je nihau pambelome awi kaketepe dengang-Ku, kareh mandino pambelome." 40"Oloh je manarima keton, manarima Aku, tuntang oloh je manarima Aku, manarima Ie je manyoho Aku, 41Oloh je manarima nabi awi ie nabi, kareh manarima upah ije biti nabi. Tuntang eweh je manarima ije biti oloh bahalap awi ie bahalap, ie kareh manarima upah ije biti oloh bahalap. 42Eweh bewei manenga danum ihop, aloh baya danum sadingen, akan ije biti bara kare oloh je naniha toto ampie toh, awi ie murid-Ku, percaya bewei ie pasti kareh manarima upahe!"

will be added

X\