IBRANI 11

1Mimbing kapercaya jete rimae toto-toto yakin dengan kare hal je iharap, rimae aton kaharap je batantu dengan kare taloh je dia gitan. 2Awi ewen aton kapercayae, maka kare oloh katika horan eka karajin Hatalla. 3Awi kapercaya, maka itah harati langit tuntang petak toh injapa awi auh Hatalla; jadi, taloh je tau gitan, jete manjadi bara taloh je dia tau gitan. 4Awi kapercayae, maka Abel manyarah akan Hatalla parapah je labih bahalap bara ain Kain. Awi kapercayae te, Abel inarima awi Hatalla kilau oloh je bahalap, basa gitan ampie Hatalla manarima parapah je inenga te. Abel jari matei, tapi tagal kapercayae te, maka ie magon hakotak sampai katika toh. 5Awi kapercayae, maka Henokh dia matei, tapi inggatang tuntang iimbit manalih Hatalla. Ije biti mahin jaton oloh olih sondau ie, awi ie jari inggatang awi Hatalla. Huang Surat Barasih tarasurat iete Henokh inggatang, ie manyanang atei Hatalla. 6Amon kapercaya jaton, ije mahin jaton oloh tau manyanang atei Hatalla. Basa oloh je dumah manalih Hatalla musti percaya je Hatalla te aton, tuntang Hatalla manenga baleh akan oloh je manggau Ie. 7Awi kapercayae, maka Hatalla mansanan akan Noah tahiu kare taloh je kareh manjadi andau rahian, je dia tau gitan awie. Noah mamenda auh Hatalla sampai ie manampa ije kapal je kajariae manyalamat ie tuntang dengan keluargae. Awi kalote, kalunen ihukum, tapi awi kapercayae, Noah kabuat imparahan awi Hatalla kilau oloh bahalap. 8Awi kapercayae, maka Abraham mamenda auh Hatalla katika Hatalla mantehau ie tuntang manyoho ie haguet akan lewu je injanji Hatalla akae. Palus Abraham haguet tuntang dia katawan akan kueh tintun pangguete. 9Awi kapercayae maka Abraham melai kilau oloh tamuei hong lewu je injanji Hatalla akae. Abraham melai hete intu huang kemah. Kalote kea Isaak tuntang Yakob je manarima janji je kalote kea bara Hatalla. 10Basa Abraham puna mentai lewu je irencana tuntang imangun awi Hatalla hapan galang je dehen. 11Awi kapercayae maka Abraham tau mandino turonae bara Sarah, aloh Abraham jari bakas toto, tuntang Sarah kabuat tamanang. Abraham percaya je Hatalla kareh malalus janjie. 12Aloh hong katika te Abraham te sama kilau oloh je jari matei bitie, tapi ie mandino are turonae, je dia taraise karee -- sama kilau kare bintang hong langit tuntang baras intu saran tasik. 13Kakare oloh te tetep percaya sampai matei. Ewen jaton manarima kare taloh je injanji Hatalla, tapi baya mite tuntang manambange bara kejau. Tuntang awi te ewen mansanan je ewen te baya oloh luar je manamuei hong kalunen toh. 14Oloh je mangaku arepe kalote jete tandae je batantu ewen te manggau lewu je kareh manjadi petak danum ayue. 15Ewen dia tinai manirok lewu je jari ilihi ewen te. Basa amon kalote, maka jari are toto katika akan ewen mangat haluli akan lewu te. 16Tapi ampie, ewen taharu dengan ije lewu je labih bahalap, iete je hong sorga. Jete sababe Hatalla dia mahamen amon ewen mantehau ie Hatallan ewen, basa Hatalla jari manatap ije lewu akan ewen. 17Awi kapercayae kea, maka Abraham manenga Isaak manjadi parapah metoh ie iningkes Hatalla. Akan Abraham kea Hatalla manenga janjie, tapi Abraham pahias manyarah anake je baya tikas ije te. 18Hatalla jari hamauh dengan Abraham, "Mahalau Isaak toh kea ikau kareh mandino turonan je injanji-Ku akam." 19Abraham percaya Hatalla olih mambelom haluli Isaak bara pampatei -- jadi, tau inyewut, Abraham jari manarima haluli Isaak bara pampatei. 20Awi kapercayae, maka Isaak manjanji kare berkat akan Yakob tuntang Esau akan wayah je inaharep rahian. 21Awi kapercayae, maka helo bara ie matei, Yakob manenga kare berkate akan kare anak Yosep -- awie basingguh intu takolok sukahe tuntang manyembah Hatalla. 22Awi kapercayae, maka Yosep -- katika ie handak matei -- hakotak tahiu oloh Israel balua bara Misir, tuntang mampelai peteh tahiu taloh je musti ilalus dengan kare tulange. 23Awi kapercayae, maka oloh bakas ain Moses manyahokan ie telo bulan katahie limbah ie inakan. Gitan ewen ie te ije biti anak je bahalap, tuntang ewen dia mikeh malawan parentah raja. 24Awi kapercayae, maka Moses sana ie jari hai, dia maku inyewut anak putri raja Misir. 25Ie labih rajin manyarenan kapehe hinje dengan ungkup ain Hatalla bara mangkeme kasanang kamangat pambelom je badosa je baya hanjulo. 26Moses mangkeme labih kejau kahain regae amon mandino taloh je hina tagal Raja Panyalamat je injanji Hatalla te bara mandino salepah ramon lewu Misir, awi Moses maharap upah hong andau je rahian. 27Awi kapercayae, maka Moses malihi tanah Misir marak jaton kikehe dengan kalait raja. Moses miar manintu eka je inalihe kila-kilau ie jari mite Hatalla je dia gitan te. 28Awi kapercayae, maka Moses mahaga Paska tuntang marentah uka intu bauntonggang human oloh Israel iohos daha mangat Malekat Pampatei dia mampatei kare anak temei ain ewen. 29Awi kapercayae, maka kare oloh Israel olih dimpah Tasik Bahandang, ampin ewen kila-kilau mananjong hunjun petak teah, tapi oloh Misir inelen awi tasik te, katika ewen mancoba dimpah kea. 30Awi kapercayae, kare oloh Israel mawi kare dinding batu Yerikho baduroh limbah ewen mangalilinge katahin uju andau. 31Awi kapercayae kea, maka Rahab oloh bawi lontei te dia tamput matei hayak dengan kare oloh je malawan Hatalla; awi ie mahapan kajentae manarima kare oloh kalati ain oloh Israel. 32Nah, aku tau ih jua-juan hakotak, tapi katika dia sukup akangku. Awi aku magon hindai manyewut Gideon, Barak, Simson, Yepta, Dawid, Samuel tuntang kare nabi. 33Awi kapercayae, maka ewen jari mampakalah kare karajaan. Ewen malalus taloh je bujur, sampai ewen manarima taloh je injanji Hatalla. Ewen mangop kare nyaman singa, 34mambelep apui je hagandang, lapas bara tusuk padang. Ewen balemo, tapi manjadi abas; ewen menteng hong perang sampai mampakalah kare tentara bangsa beken. 35Awi kapercayae, maka kare oloh bawi mandino haluli kare oloh ayue je jari matei. Aton kea je pahias ingapehe sampai matei, tuntang dia hakon iliwus, awie handak imbelom haluli akan ije pambelom je labih bahalap. 36Aton je ihababaka, ihewes hapan cambuk, imasong hapan rantai tuntang je inamean akan huang penjara. 37Ewen imedak hapan batu sampai matei, aton je inetek hapan garagaji tuntang impatei hapan padang. Ewen manamuei hapan pakaian bara upak tabiri atawa upak kambing; ewen belom susah, ingapehe tuntang injake. 38Kalunen toh dia ie eka je patut akan ewen. Ewen manamuei hong padang pasir tuntang hong kare bukit, hayak melai hong kare goha tuntang hong kare lowang petak. 39Dia laluen kahain kamanang je dinon awi oloh samandiai te tagal kapercayan ewen! Tapi ewen jaton manarima taloh je injanji Hatalla, 40awi ain Hatalla aton taloh beken je labih bahalap je handak iatohe akan itah. Taloh je iatohe te iete baya awi ewen hinje itah, maka ewen kareh manjadi tinduh-barasih.

will be added

X\