EPESUS 3

1Jete bukue aku, Paulus, inamean akan penjara tagal Kristus Yesus akan kepentingan keton je dia Yehudi. 2Batantu keton jari mahining iete Hatalla, awi kahalap Ateie, jari manenga akangku gawi toh akan kepentingan keton. 3Hatalla mukei rahasia rencana Ayue tuntang mansanan jete akangku. (Tahiu hal toh jari inyuratku intu hunjun nah hapan auh pandak, 4tuntang amon keton mambasae, keton tau harati rahasia tahiu Kristus sama kilau aku kea haratie.) 5Bihin rahasia te dia puji insanan akan olon, tapi Roh Hatalla jari mamparahan akan kare rasul tuntang kare nabi. 6Rahasia te kalotoh: Mahalau Barita Bahalap te, oloh je dia Yehudi omba mangkeme kare berkat Hatalla je horan baya inatap akan oloh Yehudi. Kare oloh je dia Yehudi jari manjadi anggota ain biti ije te kea, tuntang omba manarima taloh je injanji Hatalla mahalau Kristus Yesus. 7Hatalla manenga akangku panenga -- iete gawi -- uka mangabar Barita Bahalap te. Aku manarima panenga te mahalau kuasan Hatalla je bagawi huang aku. 8Hong marak hapus ungkup Hatalla, aku toh je paling papa. Tapi Hatalla manenga akangku panenga toh: gawi uka mangabar akan kare oloh je dia Yehudi Barita Bahalap tahiu panatau Kristus je jaton tau lepah; 9tuntang kea uka mahalau aku oloh handiai katawan kilen ampie Hatalla, Je Manjapa langit tuntang petak toh, malalus rencana Ayue je bara horan basahokan akan kalunen. 10Kahandak Hatalla iete uka toh, mahalau ungkup, kakare taloh je mimbing kuasa hong langit katawan kapintar-kaharatin Hatalla huang kakare macam ampin tampae. 11Hatalla malalus jete hasaroroi dengan rencana Ayue je katatahie, je ilalus Awie mahalau Kristus Yesus Tuhan itah. 12Awi percaya dengan Kristus tuntang awi hinje Dengae, itah mandino kamardeka mangat manokep Hatalla hapan sakalepah kapercayan itah. 13Awi te, palakungku iete: ela mikeh tahiu kapehe je inyarenangku tagal keton, basa taloh handiai te uras akan kahalap keton. 14Awi jete kea aku mandeko ututku intu taharep Bapa. 15Bara Ie kea genep keluarga hong sorga tuntang hunjun petak manarima Arae. 16Aku balakudoa keleh Hatalla je paham tinduh-kahain Aie pahias mampaabas atei keton hapan Roh Ayue. 17Keleh awi kapercayan keton dengan Kristus, Kristus melai huang atei keton, tuntang pambelom keton inggalang tuntang inguasa awi sinta. 18Aku balakudoa keleh jaka haya-hayak dengan kakare ungkup ain Hatalla, keton tau marima lalehan kalombah tuntang kapanjang hayak kagantong tuntang kandalem sintan Kristus, 19je mahapan akal olon dia olih irima salepah kahandalem hapan tirok oloh. Keleh keton mangasene sintan Kristus te, sampai keton inyuang awi sipat Hatalla je tinduh-barasih. 20Hapan kuasan Hatalla je bagawi huang itah, Hatalla tau malalus taloh je labih are bara je olih itah balakue atawa maniroke. 21Keleh Hatalla impahai turon-manuron huang ungkup, mahalau Kristus Yesus. Tara akan Hatalla sampai katatahie! Amen.

will be added

X\