2 PETRUS 3

1Paharingku samandiai je inyinta! Jetoh surat ayungku je kaduee akan keton. Intu huang kadadue surat toh, aku manggau jalan mambelom kare tirok je barasih intu keton. 2Aku balaku uka keton mingat kare auh je horan inasanan awi kare nabi ain Hatalla, tuntang parentah ain Tuhan, Raja Panyalamat, je inyampai akan keton mahalau kare rasul. 3Je mambatang haliai, keton musti katawan hong kare andau je pangkarahiae, kareh dumah kare oloh je belom inguasa awi angat kipen ewen kabuat. Ewen kareh hababaka keton 4hapan auh kalotoh, "Koan keton Tuhan bajanji akan dumah! Toh kueh ie? Kare tato hiang itah jari matei, tapi taloh handiai sama ih ampie kilau bara metoh langit petak injapa!" 5Ewen te tantai ihate dia handak mangaku je horan Hatalla manjapa langit tuntang petak hapan Auhe. Petak toh injapa Awie bara danum, tuntang dengan danum; 6tuntang hapan danum kea -- iete bara danum soho -- kalunen jaman horan te imbinasa. 7Tapi langit tuntang taloh je aton wayah toh, ihaga awi auh Hatalla te kea mangat kareh imbinasa tinai hapan apui. Toh langit tuntang petak magon ihaga sampai katika andau kare oloh papa ihukum tuntang imbinasa. 8Tapi paharingku samandiai, ela ih keton mangalapean ije hal toh: baya huang tampayah Tuhan, ije andau dia beken bara sakoyan nyelo -- kadaduee te akae sama ih. 9Tuhan dia kalapean manenga taloh je injanji Awie, aloh aton oloh je manyangka kalote. Tapi ie sabar dengan keton, ije biti mahin dia ie handak uka binasa. Kahandak Ayue te uka oloh samandiai uras hobah bara kare dosae. 10Tapi Andau panumah Tuhan te sama kilau maling. Hong andau te langit kareh lilap awi auh nyaho, tuntang kare taloh hong langit kareh lepah bakehu, tuntang petak dengan kare taloh huange kareh lilap. 11Basa kare taloh handiai te kareh lenyoh dengan cara je kalote, kilen ampie kapatut keton belom? Keton musti belom barasih tuntang baya akan Hatalla, 12katahin keton mentai tuntang mangenang panumah Andau ain Hatalla. Hong Andau te langit kareh lepah bakehu, tuntang tagal kalasote, maka kare taloh hong langit kareh lenyoh. 13Tapi itah mentai taloh je jari injanji Hatalla, iete langit je taheta tuntang petak je taheta, je intu hete aton kaadilan. 14Tagal te pahari handiai je inyinta, pandehan keton mentai Andau te, keleh manggau jalan toto-toto uka belom barasih tuntang jaton bara kasalan intu taharep Hatalla. Tuntang haga pambelom je bahalap dengan Hatalla. 15Anggap ih kasabar Tuhan itah te kilau ije katika je inenga akan keton mangat keton tau salamat. Paulus, paharin itah je inyinta, jari manyurat kalote akan keton. Ie manyurat jete hapan kapintar-kaharati je inenga Hatalla akae. 16Hong kakare surate, Paulus harajur manyurat tahiu hal te. Puna aton pire-pire hal je bahali itah haratie hong kare surate te. Tuntang bagian jete je inumbak-nambalik awi kare oloh je dia katawan en-en tuntang je dia dehen kapercayae. Hal te dia ie taloh heran, awi kare bagian beken hong Surat Barasih iawi ewen macam te kea. Taloh je ilalus ewen te kajariae mawi kahancor akan ewen kabuat. 17Tapi keton, pahari handiai je inyinta, keton jari katawan tahiu hal te. Tagal te keleh barendeng, ela sampai keton omba hanyut akan huang kalayau kare oloh darhaka sampai keton lawo bara eka keton mendeng je segah. 18Keleh keton sasar mangkeme asin Tuhan Yesus Kristus, Tuhan tuntang Raja Panyalamat ain itah, tuntang keleh keton kea sasar mangasene Ie. Tara hormat Akae, toh tuntang palus katatahie! Amen. Hormat ikei, Paulus

will be added

X\