1 KORINTUS 14

1Keleh keton manggau jalan uka sinta kare oloh beken. Tuntang keleh manggau jalan kea uka manarima kare panenga je inenga awi Roh Hatalla, ije mambatang toto kaolih uka manyampai kare rencana Hatalla akan olon. 2Oloh ije hakotak huang basa je bakahera-heran, oloh te dia hakotak dengan olon; ie hakotak dengan Hatalla. Jaton oloh je harati taloh je ingotake, awi Roh Hatalla te je mawi ie mangotak kare hal je baya ingatawan awi Hatalla. 3Tapi oloh je manyampai barita bara Hatalla, jete inyampaie akan olon; hapan mampaabas ewen, uka manenga semangat akan ewen tuntang hapa mampong ewen. 4Oloh je hakotak hapan basa je bakahera-heran baya mampaabas arepe kabuat bewei, tapi oloh je manyampai barita bara Hatalla mandohop uka ungkup manjadi maju. 5Dia laluen kahalape jaka pahari handiai tau hakotak hapan sepsimpan basa je bakahera-heran. Tapi je pangkahalape iete amon pahari tau mambarita kare rencana ain Hatalla. Basa oloh je manyampai barita bara Hatalla, labih hai bara oloh je hakotak hapan sepsimpan basa je bakahera-heran; kacuali jaka oloh je hakotak hapan basa je bakahera-heran te tau manarang taloh je ingotake te uka hapus ungkup dinon gunae. 6Paribasae jaka aku dumah manalih keton tuntang aku hakotak huang sepsimpan basa je bakahera-heran, en gunae jete akan keton? Isut mahin jaton gunae! Beken soale jaka aku mamparahan taloh en-en bara Hatalla, atawa aku manarang taloh en-en tahiu Hatalla, atawa aku manyampai barita bara Hatalla, atawa aku majar. 7Kare pakakas musik je jaton tahasenge, kilau suling tuntang kacapi paribasae, amon kare nadae dia impahiau tarang auhe, kilen ampie oloh katawan aran lagu je impahiaue te? 8Ije sonto je beken tinai: Amon tarompet te impahiau barangai auhe, eweh je handak tatap tolak perang? 9Kalote kea dengan kaolih keton hakotak hapan sepsimpan basa je bakahera-heran. Amon mahapan kaolih jete pahari hakotak mahapan auh je dia tarang, ije biti mahin jaton oloh je tau harati taloh je ingotak pahari te. Kare auh keton te akan nihau jaton katawan manae. 10Hong kalunen toh aton sakean kare basa, tapi jaton ije bara kare basa te je jaton rimae. 11Tapi amon aku dia harati basa je ingotak oloh, maka oloh je hakotak hapan basa te kilau oloh asing akangku; kalote kea aku dengae. 12Tahiu keton kabuat, katawangku keton nahuang toto mandino kare panenga bara Roh Hatalla. Tapi je mambatang haliai, keton musti manggau jalan uka mahapan kare kaolih keton mandohop mangat ungkup tau maju. 13Jete sababe oloh je hakotak hapan basa je bakahera-heran, musti balaku bara Hatalla uka ie inenga kea kaolih hapa manarang taloh je ingotake te. 14Basa amon aku balakudoa hapan basa je bakahera-heran, rohku kea balakudoa, tapi tirokku dia bagawi. 15Jadi, en je musti iawiku? Jetoh ie je handak iawiku: Aku handak balakudoa hapan rohku, tapi aku handak balakudoa kea hapan tirokku. Aku handak manyanyi hapan rohku, tapi aku handak manyanyi kea hapan tirokku. 16Basa amon pahari manyewut tarimakasih akan Hatalla hapan roh bewei, tuntang aton oloh beken je dia harati basa je bakahera-heran je bara Hatalla te, maka oloh te dia tau hamauh, "Aku satuju" dengan lakudoa tarimakasih ayum te; awi ie dia katawan taloh je ingotak pahari. 17Aloh lakudoa tarimakasih akan Tuhan te bahalap toto, tapi lakudoa te jaton gunae samasinde akan oloh beken. 18Aku manarimakasih akan Hatalla awi aku kabuat tau hakotak huang sepsimpan basa je bakahera-heran labih bara kare pahari handiai. 19Tapi, huang kare pumpong sombayang, aku labih rajin mahapan lime bawak kotak je tau oloh haratie bara aku mahapan bakoya-koyan bawak kotak huang basa je bakahera-heran. Aku labih rajin kalote mangat aku tau majar oloh. 20Pahari handiai! Ela manirok kilau anak korik. Huang hal kapapa, keleh keton tetep kilau anak korik. Tapi huang tirok atei, keleh keton manjadi oloh je jari bakas. 21Huang Surat Barasih tarasurat kalotoh, "Tuhan hamauh, 'Mahalau kare oloh je hakotak mahapan basa je bakahera-heran, aku handak hakotak dengan ungkup toh. Mahalau kare oloh tamuei haream, aku handak hakotak dengan ungkup ayungku; aloh kalote, ewen dia handak mahining auh kotakku.' " 22Jadi panenga mangat hakotak hapan sepsimpan basa je bakahera-heran jete kilau tanda akan oloh je dia percaya, dia ie akan oloh je percaya. Tuntang panenga uka mansanan rencana ain Hatalla akan olon, jete tanda akan oloh je percaya, tapi dia akan oloh je dia percaya. 23Tagal te, paribasae huang sombayang ungkup, hapus ungkup hakotak huang sepsimpan basa je bakahera-heran, palus dumah pire-pire oloh luar, atawa kare oloh je dia Kristen, batantu kare oloh te kareh manyangka keton jadi gila urase! 24Tapi amon pahari samandiai manyampai barita bara Hatalla, palus dumah ije biti oloh je dia Kristen atawa oloh luar, maka kare hal je imbarita awi pahari te uras tau manunjuk kare dosan oloh te tuntang mawi ie mingat dengan kare dosae. 25Kare hal je basilim huang ateie kareh imparahan, sampai ie handak mamparandah arepe palus manyembah Hatalla. Ie kareh mangaku Hatalla te puna toto aton hong bentok keton. 26Jadi, pahari handiai, en rimae taloh samandiai te? Amon keton hapumpong mangat manyembah Tuhan, aton je manyanyi, aton je majar, aton je mansanan taloh en-en bara Hatalla, aton je hakotak huang basa je bakahera-heran, tuntang aton je manarang taloh je ingotak te. Tapi taloh handiai te musti ilalus akan hapa majar tuntang akan kahalap keton samandiai. 27Amon aton je handak hakotak huang basa je bakahera-heran, keleh badue atawa batelo ih bagilir hakotak. Tuntang musti aton je manarang taloh je inyewut awi oloh je hakotak te. 28Amon jaton oloh je tau manarange, maka kare oloh je hakotak huang basa je bakahera-heran te musti suni huang pumpong te. Keleh ewen hakotak huang atei ewen bewei dengan Hatalla. 29Due atawa telo biti oloh je tempon barita bara Hatalla, musti manyampai barita te tuntang oloh beken manimbang taloh je insanan te. 30Tapi paribasae amon barita bara Hatalla dumah manalih ije biti oloh beken je mondok hong pumpong te, maka oloh je hakotak te musti tende. 31Hapan cara je kalote, kare pahari samandiai, mije-mije tau manyampai barita bara Hatalla; uka samandiaie tau mandino ajar tuntang sasar percaya. 32Panenga bara Roh uka manyampai barita bara Hatalla tau ingamburi awi oloh je manyampai barita te. 33Hatalla te Hatalla je rajin dengan taloh je iator; ie dia Hatalla je rajin dengan taloh je hakangkalut. Kilau je manjadi huang kakare ungkup Hatalla, 34oloh bawi musti suni hong katika pumpong ungkup. Ewen dia tau hakotak. Ewen dia tau mimbing pimpinan; jete puna hakabuah dengan hukum agama. 35Amon ewen handak mangatawan taloh en-en, ewen musti misek jete dengan kabalin ewen huang huma. Paham mampahawen toto amon oloh bawi hakotak huang pumpong ungkup. 36En auh Hatalla dumah bara keton? Atawa baya akan keton bewei auh te inyampai? 37Amon aton oloh je mangkeme mandino panenga uka manyampai barita bara Hatalla, atawa ie mandino panenga je beken tinai bara Roh Hatalla, oloh te musti katawan narai taloh je inyuratku toh, jetoh parentah bara Tuhan. 38Tapi amon aton oloh je dia manarima jetoh, ela paduli dengae. 39Tagal te pahari handiai, keleh manggau jalan uka manyampai barita bara Hatalla, tapi ela mangahana oloh je handak hakotak huang macam-macam basa je bakahera-heran. 40Tapi taloh handiai te musti ilalus dengan bahalap tuntang baatoran.

will be added

X\