Lum 10

1Boom bo bwɛɛm e, fiɛɛ fì me nshieele bô fitele fiem ficii, noo bunle yɛm ɛ̂ Nyo', nu lɛ bonyii bem bo Islael ban ke eboy. 2Fiɛɛ fì me ŋkee, ɛ ɛ̀ nulo ɛ́ me enjeme nu lɛ, bó kɛŋke naa shiee wvu baay fô Nyo' le. Geenɛn ɛ bó yaa kee kɛ je yi lɛŋ yì bó ebiì wvú le jó kɛ. 3No bó baa kee je yì Nyo' joo lɛ wee ké no nu teytey ɛ̂ wvú ɛjise jó, bó ɛ mum ɛ no gomte wase keegɛɛ yibo je, ɛ faŋɛ yaa bvuu nya bikuu bibole keebii yiyɛ je yì Nyo' joo lɛ wee nu teytey ɛ̂ wvú ɛjisɛ jó le kɛ. 4No Klistu to toɛ wase, ɛ je yi bonci yì bonyii to bii dvú keenu teytey ɛ̂ Nyo' ɛjise mum ka, wvu lɛ keenu teytey ɛ̂ Nyo' ɛjise keseen enù wase keelese fitele yî Klistu le. 5Muses to nu ɛ saŋ ɛkumɛ je keenu teytey ɛ̂ Nyo' ɛjise yì bii ɛ ɛ̀ nu bonci le lɛ, “Wee wvù gee no bonci gayte nu ke ecee nje wvú gɛɛle bonci bodvu bocii.” 6Fi ɛkumɛ je yi lɛ wee nu teytey ɛ̂ Nyo' ɛjise bii fitele fì wvú lese yî ye le nu ɛ bó ɛ saŋ lɛ, “Fo wo ebiitè ɛ̂ fitele fiew e lɛ laa ɛ̀ nu eben yɛɛ fowe lɛ?” Fì nu lɛ laa ɛ̀ nu eben yɛɛ eto bô Klistu lɛ. 7Kɛnɛɛ lɛ, “Fo wo ebiite lɛ laa ɛ̀ nu ebow yɛɛ woŋ boŋkfu le lɛ?” Fì nu lɛ laa ɛ̀ nu ebow yɛɛ eto bô Klistu lɛ. 8Geenɛn fí jemyi lɛ la? Fí jemyi lɛ, “Diɛw Nyo' nu naa mbew yo le. Yí nu diuw wo le, noo ɛ̂ fitele fiuw e.” Ɛ ɛ̀ nu yí yì bese fewci ɛkumɛ keelese fitele yî Klistu le. 9Ɛ́ wo jeme bô diuw wo lɛ Jisos nu Tata, ɛ bee fô fitele fiuw e lɛ Nyo' to nu ɛ bvuse wvú yî kpwe le, ɛ́ wo ke eboy. 10Fí nu nonɛn njefo wee beŋe ɛ ɛ̀ nu bô fitele fiew ɛ Nyo' sɛ jo wvú lɛ wvú nu sɛ jay. Ɛ wee jemyi ɛ ɛ̀ nu bô diuw we ɛ Nyo' sɛ boyse wvú. 11Ŋwa' Nyo' jemyi lɛ, “Kɛ wee wvù nu ɛ bee wvú le nu ke ekɛŋkɛ ken'wuumɛn kɛ.” 12Ben ekeè lɛ kɛ kejɛɛy jɛɛy nu dvú ɛntelɛŋ jo wee Juu bô wee wvù yaa nu kɛ wee Juu kɛ. Tata wvù nu Tata bonyii bocii nu kɛ mwaaŋ. Ɛ wvú ké no yen'yi can ye nyaa mwɛɛm ɛ̂ wee tfuu wvù beele fô wvú le. 13Fí nu no bó saŋ ɛ̂ Ŋwa' Nyo' le lɛ, “Wee tfuu wvù beele teŋe diee di Tata le, nu ɛ wvú nu ke eboyse wvú.” 14Geenɛn ɛ̀ nulo ɛ́ bonyii eghan nɛɛ sɛ no beele teŋe wvú sɛ bó nu ɛ lese fitele yî ye le? Ɛ ɛ̀ nulo ɛ́ bó eghan nɛɛ sɛ lese fitele yî ye le sɛ bó ke nu ɛ yuw wase ɛkumɛ wvú? Ɛ bó nulo eghan nɛɛ sɛ keeyuw sɛ wee nfewcɛ wvù efewcɛ ɛkumɛ wvú ɛ̂ bó. 15Ɛ ɛ̀ nulo ɛ́ bonyii eghan nɛɛ sɛ gɛn efewci sɛ bó nu ɛ tum bó? Fí nu ɛ bó ɛ saŋ lɛ, “Bonyii ké yuuke ncín bikaa bi wee wvù too bô saaka wvù jee, no yuuke njoŋ baay.” 16Geenɛn, kɛ bonyii bo Islael bocii nu ɛ bee wase saaka wvù jee wvun e kɛ. Kɛ lɛŋlɛŋ no Ŋwa' wee ntum Nyo' wvù Yɛsaya jemyi lɛ, “Tata, ɛ̀ nu yɛɛ dvú wvù nu ɛ bee saaka wvù bese fewci le?” 17Fí ɛ mum ɛ no nu lɛ keelese fitele yî Klistu le nɛn'yi yî fiɛɛ fì wee nu ɛ yuw e. Ɛ fiɛɛ fì wee yuw nɛn'yi fô fì bó fewci ɛkumɛ Klistu le. 18Me ɛ mum ɛ no mbiite lɛ laa bó to baa yuw ɛ? Kecɛɛy bó to nu ɛ yuw. Ŋwa' Nyo' gayte lɛ, “Diɛw yibo to nu ɛ gɛn yî ɛkolɛ ke nshɛ le kecii, ɛ njeme wvubo gɛn buy yî ɛbuw ɛ woŋ e ɛcii.” 19Me ɛ mbvuu ɛ no mbiite lɛ laa fí nu lɛ bonyii bo Islael to dioo yuw, faŋɛ yaa yuw ntay ɛ? Muses to nu ɛ yaw gay lɛ Nyo' gayte lɛ, “Me nu ŋke eŋge ɛ́ kendoŋ ebene ben bô ketum ke bonyii bo ɛcici le, eŋge ɛ́ shém eton'yì ben bô ketum ke bonyii bò nu biyuŋ e.” 20Ɛ Yɛsaya bvuu jeme lo sɛ nfan lɛ Nyo' gayte lɛ, “Bonyii bò se baa egomte me nu bò nu ɛ yɛn me le. Ɛ me ɛ nduŋcɛ ɛkolɛ kem ɛ̂ bonyii bò se baa ebiite me kɛ.” 21Geenɛn fi ɛkumɛ bonyii bo Islael nu ɛ Nyo' to gay lɛ, “Ɛdiuw ɛcii nu kɛ no me nshee ɛ me ɛ nɛke can keenfiisɛn bonyii, geenɛn ɛ bó tɛmyi kɛ ɛ ɛ̀ nu bikuu gɛne ɛ̂ yibo je le.”

will be added

X\