Zechariah 4

1Huajca nopa elhuicac ejquetl tlen nechcamahuijtoya, nechixiti queja quiixit'iaj se tlacatl tlen cochtoc. 2Huan nechilhui: "¿Tlachque tiquita?" Huan na niquilhui: "Niquita se tlahuil quetzali tlen tlachijchihuali ica oro, huan quipiya chicome tlahuili. Huan ica huejcapa tlen nopa tlahuili onca se caxitl campa quitecaj aceite. Huan yahualtic nopa caxitl, onca chicome tlahuili huan tubos quisayayaj tlen nopa caxitl para quipanoltise aceite ipan sesen tlahuili. 3Huan ipan sese lado nopa caxitl onca se olivo cuahuitl. Se ipan inejmatl nopa caxitl huan seyoc ica iarraves." 4Na nijsenhuiquili nicamati. Huan nijtlatzintoquili nopa elhuicac ejquetl tlen nechcamahuiyaya, niquilhui: "Tate, ¿tlachque nochi ya nopa? Huan ¿Tlachque quiixnext'iaj?" 5Huan nopa elhuicac ejquetl tlen nechcamahuiyaya nechilhui: "¿Melahuac ax tijmati tlachque quiixnext'iaj?" Huan na niquilhui: "Melahuac ax nijmati, tate." 6Huajca yajaya nechilhui: "Ya ni quiixnext'ia nopa tlajtoli tlen TOTECO quinequi quimacas nopa tequihuejquetl Zorobabel ica quejatza quitlamiltis nopa tiopamitl: 'Ax ininpampa mosoldados, niyon ipampa mochicahualis. San nopampa na notonaltzi mochihuas.' Queja nopa quiijtohua TOTECO Tlen Quinyacana Ielhuicac Ejcahua Ma Tlatlanitij. 7"Huan tlen hueli tlaohuijcayotl tlen nesis queja se hueyi tepetl para quitzacuilis itequi Zorobabel, mocuepas ica se tlamayamitl tlen ax m'as ohui. Huan quema quitlalis itlamiya tetl tlen nel'ia yejyectzi ipan itzonpac nopa tiopamitl, nochi israelitame tzajtzise ica paquilistli huan quiijtose: '¡Ma TOTECO quitiochihua! ¡Ma TOTECO quitiochihua!' " 8Huan TOTECO nechmacac ni tlajtoli: 9"Zorobabel quitlali itzinpehualtil nopa tiopamitl huan yajaya quisencahuas. Huan huajca inquimachilise para TOTECO Tlen Quinyacana Ielhuicac Ejcahua Ma Tlatlanitij nechtitlanqui campa ta. 10Ma axaca moilhui para ax tleno ipati nopa tlamantli pilsiltzitzi tlen quichihuas para ica quipehualtis nopa tiopamitl, pampa paquise quema quiitase nopa plomada imaco Zorobabel quema nopa tequitl cuali yohui. Huan nopa chicome iixtiyolhua TOTECO tlen tlachiyaj campa hueli ipan nochi tlaltepactli quipalehuise ma quitlamisencahua nopa tiopamitl." 11Na sampa nicamatqui huan nijtlatzintoquili: "¿Tlachque quiixnext'iaj ne ome olivo cuahuitl tlen eltoque ipan sesen lado tlen ne tlahuil quetzali?" 12Huan nojquiya niquilhui: "¿Tlachque quiixnext'iaj ne ome ininmacuayohua ne cuatini olivo tlen quitoyahuaj nopa aceite tlen eltoc queja oro ipan nopa ome tubos tlen oro?" 13Huan yajaya nechilhui: "¿Ax tijmati tlachque quiixnext'iaj?" Huan na niquilhui: "¡Axtle, tate, ax nijmati!" 14Huajca yajaya nechilhui queja ni: "Quiixnext'iaj nopa ome tlacame tlen quinajaltijtoque huan quintequimacaque para quitequipanose TOTECO tlen quinahuat'ia nochi tlaltepactli."

will be added

X\