1 "Ta tlen m'as tiyejyectzi tlen nochi sihuame, ¿canque yajqui yajaya tlen tiquicnel'ia? ¿Canque mocajqui yajaya tlen tiquicnel'ia? Tojuanti tiyase mohuaya tijtemotij." 2 "Yajaya tlen niquicnel'ia yajtoc campa ixochimil campa nochi tlaajhuiyaxtoc. Yajqui quintlamacati iborregojhua huan quitequiti xochitl. 3 Na niiaxca ya tlen nechicnel'ia huan yajaya noaxca na. Yajaya quintlamaca iborregojhua campa nopa xochimili tlen lirios." 4 "Ta tlen nimitzicnel'ia, nel'ia tiyejyectzi queja nopa altepetl Tirsa. Quena, tinelyejyectzi queja altepetl Jerusal'en. Tlahuel nechyoltilana ma nimitzsentlachilis queja soldados tlen yahuij para tlatehuitij. 5 Ayoc tinechtlachili pampa moixtiyolhua nechtlantoque. Motzoncal eltoc queja nopa chivojme tlen mahuilt'iaj ipan nopa cuatitlamitl tlen tlali Galaad. 6 Motlancochhua nochi eltoc cuali. Sesen motlancoch quipiya ihuical huan niyon se ax polihui. Eltoque chipahuaque queja nopa borregojme tlen ya maltijtoque huan yahuij para quinximase. 7 Mocampa chichiltic queja se granada tlen motlajcoitztoc. Quena, nel'ia ajhuiyac mocampa tlen tijtlatijtoc iica moixtzajca. 8 Yonque nihuelisqu'ia nijtlapejpenisqu'ia tlen 60 sihua tlanahuatiani, o 80 noompa sihuajhua o tlahuel miyac ichpocame, 9 san ta nimitztlapejpenisqu'ia, ta tinopaloma. San ta tiiyojtzi tlen nochi sihuame nijnequisqu'ia, ta tlen tieltoc queja tiiyojtzi cone monana. Quema mitzitaque nopa ichpocame tlen altepetl Jerusal'en san mitzsentlachilijque. Nojquiya nopa sihua tlanahuatiani huan nopa ompa sihuame mitzhueyimatque. 10 Quiijtojque: '¿Ajqueya ne tlen monext'ia queja nopa tonati tlen onpejtoc quisa ica ijnaloc? Nel'ia yejyectzi queja nopa metztli tlen noja monext'ia ipan elhuicac. Teipa hualpetlani queja itlahuil ne tonati. Tlahuel tinechyoltilana ma nijsentlachilis queja soldados tlen yahuij para tlatehuitij.' 11 "Na niyajqui campa nopa cuamili tlen nueces cuatini para niquitas intla tlaxoxohuiya ipan nopa tlamayamitl. Nijnejqui niquinitas intla chamaniyayaj nopa xocomeca miltini huan intla ya quistoc ixochiyo nopa granadas. 12 Teipa ayoc nijmatqui tlachque panoc huan nimomacac cuenta para niyohuiyaya ipan notepos cahuayo tlen notlacajhua quipixque para niinintlanahuatijca." 13 "Ximocuepa, tisulamita ichpocatl, ximocuepa. Ximocuepa pampa tijnequij timitzitase." "¿Para tlen inquinequij inquiitase ne sulamita?" "Tijnequij tiquitase quejatza yejyectzi mijtot'ia."
