Song of Solomon 5

1"Nica niitztoc. Nosihua, na niquita motlacayo para noxochimil tlen san para na. Ta tlen m'as nimitzicnel'ia huan niquita para ipati. Se paquilistli para nijcuis notlaajhuiyacayo tlen mirra huan tlen nochi sequinoc tlaajhuiyacayotl tlen nica nijpant'ia. Nijyecohua nopa nectli tlen na nosayolhua, huan niqui nopa xocomeca atl huan nopa lechi tlen noaxca." "Intohuampoyohua tlen inmoicnel'iaj, xitlacuaca huan xiquica nochi tlen inquinequij se ica seyoc." 2"Se yohuali na nicochtoya, pero noyolo ax cochtoya. Huan nijcochcajqui para yajaya tlen niquicnel'ia nechtzajtziliyaya ipan puerta, huan nechilhuiyaya: 'Xinechcaltlapo, ta tlen nimitzicnel'ia, tinopaloma tlen m'as yejyectzi, ta tlen m'as nimitzicnel'ia huan nijpatiita. Notzonteco huan notzoncal xolontoc ica nopa ajhuechtli tlen huetzi tlayohua.' " 3"Pero na niquilhui: 'Na ya nimoquixtili noyoyo, huajca monequis sampa nimoyoyontis. Ya nimoicxipajpajqui, huajca ¿tijnequi ma niquinsoquihuis sampa?' " 4"Pero yajaya tlen nechicnel'ia quicalaqui ima para caltlaposqu'ia huan ya nopa tlahuel nechyoltilana. 5Huajca nimoquetzqui para nijcaltlapos yajaya tlen niquicnel'ia. Huan ipan noma huan nomacpilhua chipiniyaya tlaajhuiyacayotl tlen mirra hasta motlalo ipan nopa tepostli tlen ica tijtzacuaj nopa puerta. 6Huan quema nijcaltlapo tlen niquicnel'ia, yajaya ayoc itztoya. Huajca nijmachili para nimiquis. Teipa nijtemo pero ax nijpanti. Nijtzajtzili, pero ax nechnanquili. 7Huan nechpantijque nopa tlacame tlen quimocuitlahu'iaj nopa altepetl huan nechhuitejque huan nechcocojque pampa ax quimachilijque para tlen ninemiyaya tlayohua. Huan nopa tlacame tlen quimocuitlahuiyayaj nopa puerta nechcuilijque noyoyo tlen ica nimopictoya." 8"Insihuame tlen altepetl Jerusal'en, intla inquipant'iaj yajaya tlen niquicnel'ia, xiquilhuica para nijmati nimococohua pampa tlahuel nijnequi itlaicnelil." 9"Ta tisihuatl tlen m'as tinelyejyectzi tlen nochi sihuame, xinechilhui ¿tlachque m'as quipiya yajaya tlen tiquicnel'ia tlen sequinoc, para tinechilhuisqu'ia ya ni?" 10"Tlen niquicnel'ia yajaya chipactic huan san yajaya tlen m'as yejyectzi tlen majtlactli mil tlacame. 11Itzonteco nesi queja senquistoc oro, huan itzoncal ijilacatztic huan yayahuic queja iijhuiyo nopa cacalotl. 12Iixtiyol nesi queja ome pilpalomajtzitzi tlen moquetztoque iteno se atentli huan malt'iaj ipan lechi. Onpano yejyectzi iixtiyol queja piltetzitzi tlen quinquetztoque ipan itencuayo. 13Icampa eltoque queja xochitl tlen ajhuiyac mijyot'iaj, huan itenxipal nesi queja se xochitl lirio campa quisa tlaajhuiyacayotl tlen mirra. 14Iajcolhua eltoque queja tepostli tlen oro tlen quiyejyecchijtoque ica piltetzitzi tlen itoca topacio. Huan itlacayo eltoc queja marfil tlen quicualchijchijtoque ica zafiros. 15Imetz eltoc queja nopa tlaquetzali tlen m'armol tlen moquetztoc ipan senquistoc oro. Quipiya tetili queja nopa cuatitlamitl tlen tlali L'ibano. Axaca seyoc queja ya. 16Nel'ia tzopelic icamac. Nochi tlen ya senquistoc cuali. Insihuame tlen altepetl Jerusal'en, queja nopa yajaya tlen niquicnel'ia. Yajaya tlen nohuampo."

will be added

X\