1 Ipan nopa tonali quema jueces tlanahuatiyayaj ipan tlali Israel, oncac se hueyi mayantli ipan nochi nopa tlaltini. Huan itztoya se tlacatl tlen itoca Elimelec tlen ejqui ipan altepetl Bel'en ipan tlali Jud'a. Huan pampa eliyaya chicahuac nopa mayantli Elimelec quisqui ialtepe huan yajqui itztoti se quesqui tonali ipan tlali Moab. Huan ihuaya yajqui isihua huan iniome telpocahua. 2 Isihua itoca eliyaya Noem'i, huan ome inintelpocahua inintoca eliyaya Mahl'on huan Queli'on. 3 Huan quema noja itztoyaj nopona ipan tlali Moab, mijqui Elimelec huan mocajqui iselti Noem'i ica ome itelpocahua. 4 Huan ax huejcajqui mosihuajtijque nopa telpocame ininhuaya ome ichpocame tlen tlali Moab. Se ichpocatl itoca Orfa huan seyoc Rut. Pero quema panotoya se majtlactli xihuitl para itztoya nopona, 5 nojquiya mijque nopa telpocame Mahl'on huan Queli'on. Huajca mocajqui iselti nopa sihuatl Noem'i, niyon ihuehue, niyon iconehua. 6 - 7 Huan se tonal ipan tlali Moab Noem'i quicajqui se tlajtoli para TOTECO sampa quintlasojtlatoya itlacajhua ipan tlali Jud'a campa quisque huan quinmacatoya se pixquistli tlen yejyectzi. Huajca Noem'i mocualtlali para mocuepas ipan tlali Jud'a huan quistejqui ininhuaya ome iyexhua. 8 Pero ipan ojtli Noem'i moyolcuepqui huan quinilhui: --M'as cuali sampa xiyaca imochajchaj campa imonanahua. Ma TOTECO inmechtlaxtlahui pampa cuali initztoyaj ica notelpocahua huan ica na nojquiya. 9 Huan ma inmechcahuili sampa ximonamictica huan xiitztoca ica paquilistli. Huajca Noem'i quintzoponi huan quinnahuatijtejqui Rut huan Orfa, pero inijuanti pejque chocaj, 10 huan quiilhuijque: --¡Tijnequij tiyase mohuaya campa motlacajhua! 11 Pero Noem'i quinilhui: --¡Ax hueli inyase, noconehua! Monequi sampa xiyaca imotlal. San tlapic inyase nohuaya. Ayoc niquinpiyas m'as coneme para huelis mosihuajtise imohuaya queja timomajtoque. 12 Nimechilhu'ia, ximocuepaca. Ya ninanatzi para sampa nimonamictis. Huan yonque sampa nimonamictisqu'ia ni tlayohua huan niquinpiyasqu'ia m'as coneme, 13 ax huelis inmochiyase ma motlajtlamica para mosihuajtise imohuaya. ¡Axtle, noconehua! ¡Ax queja nopa! Nijpiya se cuesoli tlen m'as hueyi que imojuanti pampa yajaya TOTECO nechtlaijiyohuiltijtoc. 14 Huan sampa pejque chocaj. Teipa Orfa quitzoponi iyexna huan quinahuatijtejqui, pero Rut mocajqui ihuaya. 15 Huajca Noem'i quiilhui: --Xiquita, mohues ya mocuepqui itlal campa itlacajhua huan itlaixcopincayohua. Xiya ihuaya. 16 Pero Rut quinanquili: --¡Amo xinechilhui para ma nimitzcajtehua huan ma timoiyocatlalica! Campa tiyas, na nojquiya niyas. Campa tiitztos, nopona nimocahuas na. Motlacajhua elise notlacajhua, huan moTeco Dios elis noTeco. 17 Campa ta timiquis, nojquiya nopona nimiquis na huan nopona nijnequi ma nechtlalpachoca. Ma TOTECO hueyi nechtlatzacuilti intla moselti nimitzcahuas. Niitztos mohuaya hasta miquistli techiyocatlalis. 18 Huan quema Noem'i quiitac para Rut nel'ia quinequiyaya ihuaya yas, ayoc tleno quiilhui. 19 Huan queja nopa, nopa ome quitoquilijque nopa ojtli hasta ajsitoj altepetl Bel'en. Huan quema calajque nopona, nochi Bel'en ehuani san quinsentlachilijque huan quiijtohuayayaj: --¿Ax ya ne Noem'i? 20 Pero Noem'i quinnanquiliyaya: --Ayoc xinechtocajtica niNoem'i. (Noem'i quiijtosnequi Paquilistli.) Ama xinechtocajtica Mara. (Mara quiijtosnequi Tlen Chichic.) Pampa Toteco Tlen Quipiya Nochi Chicahualistli nechmacatoc miyac cuesoli. 21 Quema niquistejqui nochi nijpiyayaya, pero ama nimocuepa san ica noma. Huajca amo xinechtocajtica Noem'i pampa TOTECO Tlen Quipiya Nochi Chicahualistli huelis quipantijtoc tlen ax cuali ipan na huan nechtlaijiyohuiltijtoc. 22 Huajca queja nopa Noem'i huan iyex Rut tlen ejqui tlali Moab quicajtejque Moab huan mocuepque altepetl Bel'en. Huan ajsitoj quema pejtoyaj quipixcaj cebada.
