ROMANOS 2

1Nojquiya imojuanti ax hueli inmotechtise. Inmoilhu'iaj para nel'ia fiero ni tlacame tlen nimechilhu'ia huan monequi Toteco quintlatzacuiltis. Pero quema inquiijtohuaj para ax cuali tlen quichihuaj inijuanti, inmotelchihuaj ica imoseltitzitzi pampa inquichihuaj san se nopa tlajtlacoli, huan yeca Toteco nojquiya inmechtlatzacuiltis. 2Huan tijmatij para quema Toteco quintlajtolsencahuas huan quintlatzacuiltis tlacame tlen quichijtinemij tlamantli tlen ax cuali queja nopa, yajaya quichihua tlen xitlahuac. 3¿O huelis inmoilhu'iaj Toteco quintlatzacuiltis nopa sequinoc tlen queja nopa tlajtlacolchihuaj huan ax inmechtlatzacuiltis? ¡Ax queja nopa! 4Huelis ax inquimachil'iaj para tlen Toteco ax inmechtlatzacuilt'ia nimantzi quema intlajtlacolchihuaj. Ax nimantzi inmechtlatzacuilt'ia pampa nel'ia hueyi iyolo Toteco ica nochi tlacame. Huan yajaya inmechchiya huan quipiya iyolo, pampa quinequi queja nopa inmechpalehuis ximoyolcuepaca huan xijcahuaca imotlajtlacolhua. 5Pero inyoltetique huan ax inquinequij inmoyolcuepase huan inquicajtehuase imotlajtlacolhua. Yeca inquimiyaquil'iaj imotlatzacuiltil tlen inmechchiyaj ipan nopa tonal tlen huala quema monextis ihueyi cualancayo Toteco, yajaya tlen xitlahuac tetlajtolsencahuas. 6Huan Toteco quintlaxtlahuis nochi tlacame queja tlen quichijtoque ipan ni tlaltepactli. 7Toteco quinmacas yolistli yancuic para nochipa nopa tlacame tlen quichijtinemij tlen cuali huan quitemohuaj para yajaya Toteco ma elis tlen quinhueyitlalis huan quintlepanitas, huan para yajaya quinmacas nopa yolistli para nochipa. 8Pero Toteco tlahuel cualanis huan quintlatzacuiltis nopa tlacame tlen quitemohuaj san tlen inijuanti quinequij huan quitoquil'iaj tlen ax xitlahuac. 9Oncas hueyi tlaohuijcayotl huan tlaijiyohuilistli para nochi tlacame tlen quichihuaj tlen ax cuali. Ni tlaijiyohuilistli achtohui quinajsis israelitame huan nojquiya quinajsis tlen ax israelitame. 10Pero Toteco quinhueyitlalis huan quinmacas tlatlepanitacayotl huan tlasehuilistli nochi tlacame tlen quichihuaj tlen cuali, yonque israelitame o ax israelitame. 11Pampa Toteco ax techchicoicnel'ia, quintlajtolsencahuas nochi tlacame. 12Quema tlajtlacolchihuaj tlacame tlen ax israelitame huan ax quimatij itlanahuatilhua Mois'es, Toteco quintlajtolsencahuas queja tlen cuali quimatiyayaj ipan ininyolo para quichihuasqu'iaj huan ax quichijque. Pero nochi tlacame tlen tlajtlacolchijtoque huan quimatiyayaj itlanahuatilhua Mois'es, Toteco quintlajtolsencahuas queja tlen quiijtohuaj nochi nopa tlanahuatili. 13Pampa Toteco ax quinita tlacame para xitlahuaque iixpa pampa quimatij nopa miyac tlanahuatili. San quinita para xitlahuaque iixpa tlacame tlen quichijtinemij tlen nochi nopa tlanahuatili quiijtohuaj. 14Huan quema tlacame tlen ax israelitame huan ax quimatij itlanahuatilhua Mois'es quichihuaj tlen cuali tlen nopa tlanahuatili tlanahuat'iaj ma tijchihuaca, quinextil'iaj para ipan ininyolo quimatij tlen cuali huan tlen ax cuali tlen nopa tlanahuatili quiijtohua. 15Nempa nesi ni tlacame quipiyaj nopa tlanahuatili ipan ininyolo pampa ininyolo quintelhu'ia quema quichihuaj tlen ax cuali, huan ax quintelhu'ia quema quichihuaj tlen cuali. 16Huan hualas nopa tonal quema Toteco quintlajtolsencahuas nochi tlacame ica Jesucristo. Huan Jesucristo quintlajtolsencahuas ica tlen ixtacatzi quipixtoque ipan ininyolo. Ya ni itlajtol Toteco tlen niquincamahu'ia tlacame. 17Imojuanti tlen inisraelitame tlen inmotemach'iaj ipan itlanahuatil Mois'es, inmohueyimatij pampa Toteco Dios inmechicnel'ia. 18Inquiijtohuaj inquimatij ipaquilis Toteco huan inquichihuaj tlen cuali pampa inmomachtijtoque itlanahuatil Mois'es. 19Inmoilhu'iaj huelis inquinmachtise sequinoc tlen itztoque queja popoyotzitzi. Huan inquinequij inquintlahuilise tlacame tlen nemij ipan tzintlayohuilotl pampa ax quiixmatij Toteco. 20Inmoilhu'iaj para intlamachtiani huan huelis inquintlalnamictise tlen huihuitique huan tlen coneme ipan iojhui Toteco, pampa inmoilhu'iaj inquipiyaj ipan nochi nopa tlanahuatili nochi tlalnamiquistli huan nochi tlen melahuac. 21Pero inisraelitame tlen inquinmacht'iaj sequinoc, ¿para tlen ax inmomacht'iaj para inquichihuase tlen xitlahuac? Inquinilhu'iaj sequinoc ma ax tlaxtequica, pero imojuanti intetlaxtequil'iaj. 22Inquiijtohuaj axaca ma momecati, pero monequi ximotlachilica intla imojuanti ax inmomecat'iaj. Inquiijtohuaj inquincocol'iaj nopa tlaixcopincayome huan teteyome, pero ximotlachilica pampa sequin imojuanti inquiichtequij tlen eltoc ipan nopa inintiopa nopa tlaixcopincayome. 23Inmohueyimatij huan inquiijtohuaj cuali inquimatij tlen nopa tlanahuatili quiijtohuaj, pero ax inquichihuaj tlen nochi nopa tlanahuatili tlanahuat'iaj. Huan yeca inquipinahualt'iaj Toteco Dios. 24Yeca eltoc queja ijcuilijtoc ipan Itlajtol Toteco huejcajquiya: "Ica tlen ax cuali inquinchihuaj, inquinchihuil'iaj tlacame tlen ax israelitame ma quitlaijilhuica Toteco Dios." 25Tlahuel ipati para inelise inisraelitame huan inmechtequilijtoque nopa tlanescayotl tlen itoca circuncisi'on ipan imotlacayo intla nel'ia inquichihuaj nochi tlen quiijtohua itlanahuatil Mois'es. Pero intla ax inquichihuaj nochi tlen quiijtohuaj itlanahuatilhua, iixpa Toteco inisraelitame ihuical initztoque ica tlen ax israelitame. 26Huan intla se tlacatl tlen ax israelita quichijtinemi nochi tlen quiijtohuaj nopa tlanahuatili, ¿ax inmoilhu'iaj para yajaya elis iaxca Toteco queja se israelita? 27Huan quema se tlen ax israelita quichihua nochi tlen quiijtohuaj itlanahuatilhua Mois'es, yajaya quinext'ia para hueyi imotlajtlacolhua inisraelitame pampa cuali inquinmatij nochi nopa tlanahuatili, pero ax inquichihuaj tlen quiijtohuaj. 28Pero ax neli se tlacatl elis iaxca Toteco san pampa tlacatqui israelita huan quitequilijtoque nopa tlanescayotl tlen itoca circuncisi'on ipan itlacayo. 29Se tlen nel'ia se israelita huan iaxca Toteco itztoc se tlen quipiya iyolo cuali iixpa. Huan ax elis se tlanescayotl ipan itlacayo nopa tlacatl tlen quinextis para iaxca Toteco, pero elis pampa Itonal Toteco quipatlatoc iyolo huan nopona quitlalijtoc itlanescayo. Huan se tlacatl ica iyolo cuali queja nopa ax quitemohua tlacame ma quipaquilismacaca, yajaya quinequi para Toteco ma quicualita.

will be added

X\