APOCALIPSIS 3

1Huan Jesucristo nechilhui: "Xijtlajcuilhui nopa elhuicac ejquetl ipan nopa tiopamitl tlen tlaneltocani ipan altepetl Sardis huan xiquilhui para najaya tlen nijpiya nopa chicome itonalhua Toteco huan nopa chicome sitlalime, huan queja ni niquilhu'ia: "Nijmati nochi tlen inquichihuaj. Nijmati sequinoc quiijtohuaj cuali initztoque huan cuali inquitequipanohuaj Toteco, pero ax neli. Eltoc queja inmictoque iixpa Toteco. 2Xiisaca huan xijmacaca tetili nopa tlamantli tlen noja inquichihuaj tlen quentzi cuali, pampa ax nijpant'ia para inquichihuaj tlen cuali iixpa Toteco. 3Xiquilnamiquica itlajtol Toteco tlen inquicajtoque huan inquiselijtoque. Xijchihuaca nochi tlen nopa tlajtoli quiijtohua. Ximoyolcuepaca ica tlen ax cuali inquichihuayayaj. Intla axtle, niyas campa imojuanti quema ax innechchiyaj queja ajsi se tlaxtejquetl. Huan ax inquimatise ipan tlaque hora niajsiti. 4"Pero itztoque se quesqui tlaneltocani imohuaya ipan altepetl Sardis tlen ax quisoquihuijtoque ica tlajtlacoli ininyoyo. Yajuanti moyoyontise ica tlen chipahuac huan nejnemise nohuaya, pampa queja nopa quinamiqui tlen itztoque tlapajpactique iixpa Toteco. 5Quena, nochi tlacame tlen quitlanise tlen ax cuali Toteco quinyoyontis ica ininyoyo tlen chipahuac. Huan ax quema niquixpolos inintoca ipan nopa amatlapohuali tlen quipiya ajqueya inijuanti itztose para nochipa. Huan na niquijtos iixtla noTata huan ielhuicac ejcahua para nopa tlacame noaxcahua. 6Nochi inquipiyaj imonacas, huajca xijtlacaquilica huan xijmachilica tlen Itonal Toteco nica quinilhu'ia tlaneltocani ipan nochi tiopantini." 7Huan Jesucristo nechilhui: "Xijtlajcuilhui nopa elhuicac ejquetl ipan nopa tiopamitl tlen tlaneltocani ipan altepetl Filadelfia huan xiquilhui para na tlen senquistoc nitlatzejtzeloltic huan nitemachtli. Xiquinilhui para na nijpiya illaves huan itequihuejcayo Tlanahuatijquetl David. Quema nijtlapos se puerta, axaca huelis quitzacuas huan quema nijtzacuas se puerta, axaca huelis quitlapos. Xiquilhui para queja ni nijnequi niquilhuis: 8"Nijmati nochi tlen inquichihuaj. Yonque quentzi imochicahualis, inquitoquil'iaj notlajtol huan inquinilhu'iaj tlacame para innoaxcahua. Huajca nimechtlapohuili se puerta imoixtla tlen axaca hueli quitzacuas. 9Xiquitaca, nijchihuas para nopa tlacame tlen iaxcahua Axcualtlacatl ma hualaca huan ma motlancuaixtlapachoca imoicxiteno, huan quiijtose para imojuanti nopa tlacame tlen nimechicnel'ia. Nopa tlacame quiijtohuaj para israelitame huan itlacajhua Toteco, pero ax neli. San istlacatij. 10"Nimechilhuijtoc xijpiyaca imoyolo ica tlen inmechpanotihuala huan nel'ia inquitlacaquilijtoque notlajtol, huajca na nimechmocuitlahuis para ax inmechpantis nopa hora quema oncas tlaijiyohuilistli ipan ni tlaltepactli para quinyejyecos tlen itztoque nica. 11Xiquitaca, ipan tlen hueli tlalochtli nihualas. Huajca xijtoquilijtinemica itlajtol Toteco tlen inquipiyaj para axaca inmechquixtilis nopa corona tlen inquiselise nepa elhuicac. 12Huan tlacame tlen quitlanise tlen ax cuali niquinchihuas ma elica queja tlaquetzali ipan ihueyi tiopa noTeco, huan ax quema quisase nepa. Huan niquijcuilos ipan nopa tlacame itoca noTeco huan itoca nopa yancuic altepetl Jerusal'en, ialtepe noTeco tlen temos tlen elhuicac campa yajaya itztoc. Huan niquijcuilos ipan inijuanti notoca tlen yancuic. 13Nochi inquipiyaj imonacas, huajca xijtlacaquilica huan xijmachilica tlen Itonal Toteco nica quinilhu'ia tlaneltocani ipan nochi tiopantini." 14Huan Jesucristo nechilhui: "Xijtlajcuilhui nopa elhuicac ejquetl ipan nopa tiopamitl tlen tlaneltocani ipan altepetl Laodicea huan xiquilhui para najaya tlen nijpiya nochi tequihuejcayotl. Na nitemachtli huan na tlen niquinilhu'ia tlacame tlen nel'ia xitlahuac. Xiquilhui ica na Toteco quichijqui nochi tlen onca huan na nijnahuat'ia, huan queja ni niquilhu'ia: 15"Nijmati tlen inquichihuaj. Ax innechcocol'iaj huan ax innechicnel'iaj. Initztoque queja se tlamantli tlen ax sesec, niyon ax totonic. M'as cuali intla innechcocolisqu'iaj o innechicnelisqu'iaj, 16pero pampa initztoque queja se atl tlen yamanca totonic, huajca monequi nimechisotlas. 17Inquiijtohuaj intlapijpixtoque huan ax tleno inmechpolohua, pero ax inquimachil'iaj intla iixpa Toteco fiero initztoque. Yajaya inmechijiya. Inteicneltzitzi, inpopoyotzitzi huan inxolome iixpa ya. 18Huajca nimechtlajtolmaca xihualaca campa na para nimechmacas tlen inmechchihuas nel'ia cuali iixtla. Amo xijtemoca tlen hueli oro, pero xinechcohuilica oro tlen m'as cuali tlen quipajpactoque ipan tlitl para nel'ia inmoricojtilise. Huan xinechcohuilica yoyomitl tlen nel'ia chipahuac queja Toteco quinmaca tlen itztoque xitlahuaque iixpa, huan ya nopa inmoquentise para ayoc inpinahuase pampa inxolome iixpa. Huan xinechcohuilica ixtiyol pajtli para inmotequilise ipan imoixtiyol para inquiitase tlen melahuac. 19"Na tlen niquintlacahualt'ia huan niquintlalnamict'ia nochi tlacame tlen niquinicnel'ia, huajca ica nochi imoyolo ximoicnonequica huan ximoyolpatlaca. 20"Xiquita, nimoquetza campa puerta huan nimitznotza. Intla tinechtoscaquis huan tinechcaltlapos, nicalaquis huan nitlacuas mohuaya huan tielis tinohuampo. 21Huan nochi tlacame tlen quitlanise tlen ax cuali niquincahuilis ma mosehuica nohuaya nepa campa nimosehu'ia para nitlanahuatis, san se queja na nijtlanqui tlen ax cuali huan nimosehu'ia ihuaya noTata nepa campa yajaya tlanahuat'ia. 22Nochi inquipiyaj imonacas, huajca xijtlacaquilica huan xijmachilica tlen Itonal Toteco nica quinilhu'ia tlaneltocani ipan tiopantini."

will be added

X\