APOCALIPSIS 2

1Huan Jesucristo nechilhui: "Xijtlajcuilhui nopa elhuicac ejquetl ipan nopa tiopamitl tlen tlaneltocani tlen eltoc ipan altepetl 'Efeso. Xiquilhui para na niJesucristo tlen nijpiya nomaco nopa chicome elhuicac ehuani tlen tlayacanaj ipan nopa chicome tiopantini. Huan ninemi tlatlatlajco nopa chicome tiopantini tlen tlaneltocani. Xiquilhui queja ni niquilhu'ia: 2"Nijmati nochi tlen inquichihuaj. Nijmati para chicahuac intequitij huan inquipiyaj imoyolo ica nochi tlen inmechpanotihuala. Nijmati ax inquinijiyohu'iaj tlen ax cuajcualme. Quema ajsitoj tlacajcayahuani tlen motocajt'iaj itlayolmelajcahua Toteco, nijmati para inquinyejyecojque huan inquinixmatque para istlacatini. 3Inquipixtoque imoyolo quema inquiijiyohuijtoque tlaohuijcayotl pampa innechicnel'iaj. Intequititoque chicahuac huan ax insiyajtoque, niyon ax innechcajtoque. 4"Pero niquita se tlamantli tlen ax ijqui. Ayoc innechicnel'iaj huan ayoc inmoicnel'iaj queja achtohuiya. 5Huajca xiquilnamiquica quejatza innechicneliyayaj achtohuiya huan ximoyolcuepaca huan sampa queja nopa xinechicnelica. Intla ax inmoyolcuepaj, huajca nimantzi niyas nepa huan nimechquixtilis imotlahuil quetzal campa eltoc. 6Nojquiya nijmati seyoc tlamantli tlen cuali inquichihuaj. Inquicocol'iaj tlen quichihuaj nopa nicolaitame tlen na nojquiya ax nijnequi niquitas. 7"Nochi inquipiyaj imonacas, huajca xijtlacaquilica huan xijmachilica tlen Itonal Toteco quinilhu'ia tlaneltocani ipan tiopantini, pampa quiijtohua: Nochi tlacame tlen quitlanij tlen ax cuali quicuase itlajca nopa cuahuitl tlen temaca yolistli para nochipa. Nopa cuahuitl ijcatoc campa tlahuel tlayejyectzi nepa campa itztoc Toteco." 8Huan Jesucristo nechilhui: "Xijtlajcuilhui nopa elhuicac ejquetl ipan nopa tiopamitl tlen tlaneltocani ipan altepetl Esmirna huan xiquilhui para na niipejya huan niitlamiya nochi tlen onca. Nimijqui huan sampa nimoyolcuic huan queja ni niquilhu'ia: 9"Nijmati nochi tlen inquichihuaj. Nijmati quejatza intlaijiyohu'iaj nopampa na. Nijmati tlahuel inteicneltzitzi, yonque nel'ia intlapijpixtoque iixpa Toteco. Nijmati quejatza inmechtlaijilhu'iaj nopa tlacame tlen quiijtohuaj para israelitame huan itlacajhua Toteco, pero ax neli. Tlen itztoque ipan nopa israelita tiopamitl, inijuanti nel'ia iaxcahua Axcualtlacatl pampa yajaya tlen inijuanti quitequipanohuaj. 10Amo xiquimacasica tlen monequi inquiijiyohuise. Ax huejcahuas inijuanti tlen quitoquil'iaj Axcualtlacatl inmechtzacuase sequin imojuanti ipan tlatzactli para inmechyejyecose, huan intlaijiyohuise majtlactli tonali. Pero xiitztoca intemachme huan amo xinechcahuaca yonque monequi inmiquise. Huan na nimechmacas se corona tlen eli yolistli para nochipa. 11"Nochi inquipiyaj imonacas, huajca xijtlacaquilica huan xijmachilica tlen Itonal Toteco nica quinilhu'ia tlaneltocani ipan nochi tiopantini. Tlen quitlanise tlen ax cuali ax yase mictla campa tlacame quiijiyohuise nopa ompa miquistli." 12Huan Jesucristo nechilhui: "Xijtlajcuilhui nopa elhuicac ejquetl ipan nopa tiopamitl tlen tlaneltocani ipan altepetl P'ergamo huan xiquilhui para najaya tlen nijpiya se machete tlen oncac tlatequi huan queja ni niquilhu'ia: 13"Nijmati nochi tlen inquichihuaj huan nojquiya nijmati initztoque nepa ipan nopa altepetl campa nochi quihueyichihuaj Axcualtlacatl. Pero noja innechtoquil'iaj ica nochi imoyolo. Ax inquicajtoque innechneltocaj yonque itoquilijcahua Axcualtlacatl quimictijque 'Antipas tlen quinpohuiliyaya tlacame tlen na mojmostla. 14"Pero niquita se ome tlamantli tlen ax ijqui. Inquincahuil'iaj tlacame ma itztoca imohuaya tlen quichihuaj tlen Balaam quichijqui huejcajquiya. Balaam quiilhui Balac ma quinmachti israelitame ma quicuaca tlacualistli tlen quitlalijtoyaj iniixtla totiotzitzi para tlacajcahualistli. Huan ica nopa quinchijqui ma huetzica ipan tlajtlacoli. Nojquiya quiilhui ma quinmachti israelitame ma quichihuaca tlamantli ica tlen ax ininnamic, huan ya nopa tlen quichihuaj nopa tlacame nepa imohuaya. 15Huan imojuanti nojquiya inquinijiyohu'iaj tlacame imohuaya tlen quitoquil'iaj ininfiero tlamachtilis nopa nicolaitame huan ya nopa ax nijnequi niquitas. 16Huajca ximoyolcuepaca, pampa intla ax inmoyolpatlase, niyas nimantzi huan niquintehuis ica notlajtol tlen eltoc queja se machete tlen quisa ipan nocamac. 17"Nochi inquipiyaj imonacas, huajca xijtlacaquilica huan xijmachilica tlen Itonal Toteco nica quinilhu'ia tlaneltocani ipan tiopantini. Tlen quitlanise tlen ax cuali niquinmacas nopa tlacualistli tlen huala tlen elhuicac tlen axaca hueli quiita. Huan nijmacas se piltetzi tlen chipahuac huan quipiyas se tocaitl tlen yancuic tlen tlajcuiloli ipani huan axaca quimatis nopa yancuic tocaitl tlen Toteco quimacas, san yajaya tlen quisel'ia." 18Huan Jesucristo nechilhui: "Xijtlajcuilhui nopa elhuicac ejquetl ipan nopa tiopamitl tlen tlaneltocani ipan altepetl Tiatira huan xiquilhui para na niIcone Toteco. Na nijpiya noixtiyol tlen tlahu'ia queja tlixochitl huan nijpiya noicxi tlen nesi queja nopa tepostli bronce tlen nel'ia cuali quipojpojtoque huan queja ni nijnequi niquilhuis: 19"Nijmati nochi tlen inquichihuaj huan quejatza miyac inteicnel'iaj. Nijmati chicahuac innechneltocaj huan innechtequipanohuaj. Inquiijiyohuijtoque nochi tlen inmechpanotihuala, huan mojmostla m'as inquichijtiyohuij tlen cuali ama huan ax queja inquichihuayayaj achtohuiya. 20"Pero niquita se ome tlamantli tlen ax ijqui. Inquicahuil'iaj nopa sihuatl Jezabel ma quinmachti huan quintlajtlacolmaca notlatequipanojcahua. Yajaya motocajt'ia se itiocamanalojca Toteco huan quiijtohua tlamacht'ia tlajtoli tlen Toteco quimacatoc, pero ax neli. Yajaya quinmacht'ia tlaneltocani ma quichihuaca tlamantli ininhuaya tlen ax ininnamic. Quinmacht'ia ma quicuaca tlacualistli tlen sequinoc quitlalijtoque queja se tlacajcahualistli iniixtla totiotzitzi. 21Nijchixqui miyac tonali para Jezabel moyolcuepasqu'ia, pero ax quinequi quicahuas momecat'ia. 22Huajca nijmacas se cocolistli tlen ica huilantos ipan itlapech huan tlaijiyohuis miyac. Nojquiya tlaijiyohuise nochi tlen momecatiyayaj ihuaya intla ax quicahuase inintlajtlacol. 23Huan niquinmictis nochi tlen quitoquil'iaj itlamachtilis Jezabel, intla ax moyolpatlaj, pampa itztoque queja iconehua. Yeca tlaneltocani quimatise ipan campa hueli tiopantini para na, niJesucristo, nijmati tlen sesen imojuanti inmoilhu'iaj ipan imotlalnamiquilis huan nijmati tlen eltoc ipan sesen imojuanti imoyolo. Huan nimechcuepilis sesen imojuanti queja tlen quinamiqui. 24Nojquiya nijpiya se tlajtoli para ne sequin imojuanti ipan altepetl Tiatira tlen ax inquitoquilijtoque itlamachtilis nopa sihuatl. Ax inquimatij tlen inijuanti quitocajt'iaj nopa 'tlamachtilistli tlen m'as huejcapa' tlen Axcualtlacatl. Ax tleno m'as monequi nimechnahuatis. 25San nijnequi inquichijtinemise nopa cuali tlamantli tlen ama inquichihuaj hasta quema nihualas. Amo xisiyahuica. 26"Nochi tlacame tlen quitlanise tlen ax cuali huan quichijtinemise tlen nimechilhuijtoc hasta itlamiya, nimechmacas tequihuejcayotl inquinnahuatise tlacame ipan nochi tlaltini. 27Chicahuac inquinnahuatise. Huan intla tlacame ax inmechtlepanitase, inquinchihuilise queja elisqu'iaj se comitl tlen tlapani. Inquipiyase san se nopa tequihuejcayotl queja noTata nechmacatoc na. 28Huan nojquiya nimechmacas nopa sitlali tlen tlahu'ia chicahuac ica ijnaloc quema nechca para tlanesis. 29Nochi inquipiyaj imonacas, huajca xijtlacaquilica huan xijmachilica tlen Itonal Toteco nica quinilhu'ia tlaneltocani ipan nochi tiopantini."

will be added

X\