APOCALIPSIS 19

1Teipa niquincajqui tlahuel miyac tlacame nepa elhuicac tlen quiijtohuayayaj: "¡Hueyi paquilistli! Toteco techmaquixtijtoc. San yajaya tlen quipiya nochi hueyitilistli huan nochi chicahualistli. Ma tijnextilica nochi tlatlepanitacayotl para nochipa. 2Yajaya tetlajtolsencahua temachtli huan xitlahuac. Quintlatzacuiltijtoc tlen ehuayayaj nopa altepetl Babilonia tlen itztoyaj queja se momecatijquetl tlen tlahuel quintlajtlacolmacac nochi tlacame ipan tlaltepactli. Quinnextiliyayaj ma quihuejcamajcahuaca Toteco. Toteco quicuepilijtoc nopa fiero sihuatl pampa quinmicti itlatequipanojcahua." 3Huan sampa nopa miyac tlacame quiijtojque: "¡Hueyi paquilistli! Toteco ya quixolejqui nopa altepetl huan ipocyo tlejcos para nochipa." 4Huan teipa nopa sempoali huan nahui tlayacanani huan nopa nahui tlamantli tlen yoltoque motlancuaixtlapachojque huan quihueyimatque Toteco tlen mosehu'ia ipan nopa hueyi siyaj huan quiijtojque: "¡Queja nopa ma eli! ¡Ma tijpaquilismacaca Toteco!" 5Huan nijcajqui seyoc tlen hualcamatqui tlen nechca nopa hueyi siyaj huan quiijto: "Ma tijpaquilismacaca Toteco Dios nochi tojuanti tlen tijtlepanitaj huan tlen tiitlatequipanojcahua. Yonque tihuejhueyi tlacame o tipilsiltzitzi, nochi ma tijpaquilismacaca Toteco." 6Huan nijcajqui tlen caquistic queja itztoyaj miyac tlacame tlen camatiyayaj, huan tlen caquistic queja miyac atl tlen ajcahuaca, o caquistic queja tlatomoni chicahuac. Huan nochi san sejco quiijtohuayayaj: "¡Hueyi paquilistli! Tohueyiteco Dios tlanahuat'ia, Quena, tlanahuat'ia Toteco Tlen Quipiya Nochi Chicahualistli. 7Ma tipaquica huan ma tijpaquilismacaca huan ma tijhueyimatica. Ya ajsic hora para nopa nenamictili tlen nopa Pilborregojtzi. Ya mocualchijchijtoc isihua. 8Huan quimacatoc ma moquenti tlen m'as cuali yoyomitl tlen chipahuac huan neltlapajpactic hasta tlahui. Nopa cuali yoyomitl tlen chipahuac quinescayot'ia nochi nopa tlamantli tlen cuali tlen quichijtoque itlatzejtzeloltijca tlacajhua Toteco." 9Huan nopa elhuicac ejquetl nechilhui ma niquijcuilo: "Nel'ia paquij nopa tlacame tlen Toteco quinnotztoc ma yaca campa nopa tlacualistli tlen nenamictili tlen nopa Pilborregojtzi." Huan nechilhui: "Ni tlajtoli nel'ia melahuac pampa ni tlajtoli hualajqui tlen Toteco." 10Huan nimotlancuaixtlapacho iixtla para nijhueyimatisqu'ia nopa elhuicac ejquetl. Huan yajaya nechilhui: "Amo xinechhueyimati. Na nojquiya nijtequipanohua Toteco queja ta huan moicnihua tlen inquitoquil'iaj Jes'us. San Toteco xijhueyimati. Quema Toteco quinmaca itiocamanalojcahua tlajtoli tlen tlamantli tlen teipa panos para ma quinpohuilica sequinoc, quichihua para tlacame ma quihueyichihuaca Jes'us quema nopa tlamantli panose." 11Huan niquitac tlapojtoc elhuicac huan moquetzayaya nepa se cahuayo chipahuac. Huan yajaya tlen ipan tlejcotoya quinescayot'ia Tohueyiteco huan quipixqui itoca: Tlen Temachtli huan Melahuac. Quej nopa quitocajt'iaj pampa tetlajtolsencahua huan tetlalil'ia nopa tlatzacuiltili tlen xitlahuac, huan quintehu'ia tlen ax cuajcualme. 12Huan iixtiyol tlen tlejcotoya eltoya queja tlilelemectli huan ipan itzonteco quipixtoya miyac coronas tlen quinext'ia itequihuejcayo. Huan ipani ijcuilijtoc se tocaitl tlen axaca quimachil'ia tlaque quiijtosnequi, san ya quimati. 13Huan moquentiyaya se iyoyo huehueyac tlen quixolonijtoya ica estli huan yajaya itoca: Itlajtol Toteco. 14Huan quitoquiliyayaj nochi soldados tlen elhuicac huan tlejcotoyaj ipan cahuayojme tlen chipahuaque. Huan nopa soldados moquentiyayaj ininyoyo tlen m'as cuali, huan tlen chipahuac huan tlapajpactic. 15Huan yajaya tlen tlayacanayaya quipixtoya se huehueyac tlamintli tlen tlatequi tlen quisayaya icamaco para ica quinmaquilis tlacame ipan nochi tlaltini. Huan chicahuac yajaya quinnahuatis tlacame. Huan queja se tlacatl chicahuac ipan moquejquetza xocomecatl itlajca para quiquixtilis iayo, queja nopa yajaya ininpan moquejquetzas tlacame. Quena, Toteco Tlen Quipiya Nochi Chicahualistli tlahuel cualantoc ica tlacame huan quintlatzacuiltis ica tlen m'as fiero. 16Ipan iyoyo nopa tlayacanquetl huan ipan imetztomahuiya ijcuilijtoya itoca: "Tlanahuatijquetl tlen nochi tlanahuatiani huan ninopa Dios tlen m'as nihueyi que nochi tlen tlacame quintocajt'iaj 'dioses'." 17Huan niquitac se elhuicac ejquetl tlen moquetzayaya ipan tonati tlen quintzajtziliyaya totome huan quinilhuiyaya: "Nochi intotome tlen inpatlantinemij ipan elhuicactli, xihualaca pampa Toteco inmechsencahuilis se hueyi tlacualistli. 18Xihualaca, xijcuaquij ininnacayo tlanahuatiani. Xijcuaquij ininnacayo ininsoldados huan inintlayacancahua tlen m'as quimatque tlatehu'iaj. Xijcuaquij ininnacayo cahuayojme huan tlen ininpan tlejcotoyaj. Quena, xijcuaquij ininnacayo nochi tlamantli tlacame; sequin itztoyaj tlatequipanohuani huan sequinoc axtle. Sequin itztoyaj huejhueyi tlacame huan sequin axtle." 19Huan teipa niquitac nopa fiero tlapiyali quinsentiliyaya nochi tlanahuatiani ipan tlaltepactli ica ininsoldados para quitehuise Tohueyiteco tlen tlejcotoc ipan icahuayo chipahuac huan para quintehuise isoldados tlen quitoquiliyayaj. 20Huan tlen tlejcotoya ipan nopa cahuayo chipahuac quiitzqui nopa fiero tlapiyali huan nopa istlacatica tiocamanalojquetl, huan quincuamajcajqui ipan nopa tlitl tlen onpano hueyi. Nopa istlacatica tiocamanalojquetl elqui tlen quichijqui chicahualnescayotl iixtla nopa fiero tlapiyali huan quincajcayajtoya nochi tlacame tlen quiselijque nopa machiyotl tlen nopa fiero tlapiyali huan tlen quihueyimatque itlaixcopincayo. Huan nochi ome quincuamajcajqui noja yoltoque ipan nopa tlitl tlen onpano hueyi huan lemeni ica azufre. 21Huan tlen tlejcotoc ipan nopa cahuayo chipahuac quinmicti nochi sequinoc tlen quitehuiyayaj ica nopa huehueyac tlamintli tlen quisqui icamaco. Huan nochi totome tlamiixhuique ica ininnacayo nopa mijcatzitzi.

will be added

X\