Psalms 97

1¡Nochi tlaltepactli ma paqui pampa TOTECO tlanahuat'ia! Huan nochi nopa pilaltepetzitzi tlen mopant'iaj tlatlajco hueyi atl, xiquinilhuica nojquiya ma paquica. 2Mixtli huan tzintlayohuilotl quiyahualojtoc Toteco. Huan itlanahuatilis pejtoc ipan tlen melahuac huan tlen xitlahuac. 3Iixpa tlayacanti se tlitl tlen quintzontlamilt'ia icualancaitacahua. 4Nopa tlapetlanilotl tlen yajaya quititlani quitlahuil'ia nochi tlaltepactli. Huan ni tlaltepactli huihuipica quema quiita. 5Nochi tepetini atiyaj queja cera iixtla TOTECO tlen iaxca nochi tlaltepactli. 6Elhuicactli tlayolmelahua para Toteco xitlahuac tetlajtolsencahua. Huan nochi tlaltepactli quiita ihueyitilis. 7Ma mopinahuaca nochi tlen quinhueyichihuaj teteyome, huan nochi tlen mohueyimatij ica inintlaixcopincayohua tlen ax tleno ininpati. Nochi sequinoc imojuanti tlen tlacame inmechtocaxt'iaj "intiotzitzi" ximotlancuaquetzaca iixtla Toteco. 8TOTECO, nopa altepetl Jerusal'en huan nochi altepetini ipan tlali Jud'a quipiyaj paquilistli ica motlamachtil. 9Pampa ta, tiTOTECO, tijnahuat'ia nochi tlaltepactli, huan m'as tihueyi que nochi sequinoc tlen quintocaxt'iaj tiotzitzi. 10TOTECO quinicnel'ia nochi tlen quicocol'iaj tlen ax cuali. Quinmocuitlahu'ia itlacajhua huan quinchololt'ia ininmaco tlaixpanoca tlacame. 11Tlen xitlahuac ininyolis nemi ipan itlahuil Toteco, huan tlen cuali ininyolo quipant'iaj paquilistli. 12Xipaquica ipan TOTECO nochi imojuanti tlen initztoque xitlahuac iixtla. Xijhueyichihuaca huan nochipa xiquilnamictoca para Toteco yajaya senquistoc tlatzejtzeloltic.

will be added

X\