Psalms 88

1TOTECO, ta tlen tinoDios huan tinotemaquixtijca. Tonali huan yohuali nimitztzajtzilijtoc para xinechpalehui. 2Xinechtlacaquili quema nimomaijtohua huan quema nimitztzajtzil'ia, 3pampa nijmati nisiyajtoc ica nochi tlen ax cuali hasta nijmati ya nechca eltoc para nimiquis. 4Miyac quiijtohuaj para ya tlantinemi noyolis huan para ayoc nijpiya chicahualistli. 5Tlacame nechtlahuelcajtoque para ma nimiqui. Niitztoc queja se tlen ya mijqui ipan tlatehuijcayotl huan nochi quiilcahuaj intla itztoya. Huan eltoc queja ta tinechilcajqui huan ayoc tinechmocuitlahu'ia. 6Ta tinechtlalijtoc ipan nopa tlacoyoctli tlen m'as huejcatla campa onca tzintlayohuilotl tlen m'as yayahuic. 7Mocualancayo nechtlaijiyohuilt'ia chicahuac huan ajachica nechtlatzintlanhuetzilt'ia m'as. 8Tijchijtoc para noteixmatcahua ma nechtlahuelcahuaca huan ma nechijiyaca. Eltoc queja niitztoc ipan se tlatzactli huan ax hueli niquisa. 9Ayoc hueli nitlachiya pampa tlahuel nimochoquilijtoc. Mojmostla nimitztlajtlan'ia motlapalehuil, huan nimomatlalana quema nimomaijtohua ica ta, TOTECO, para xinechtlasojtla. 10Pero nijmachil'ia para, quena, nimiquis nimantzi, huan ¿tlachque ipati elis para na nopa chicahualnescayotl tlen tijchihuas quema ya nimictoc? ¡Ax tleno! ¿Huelis nihuelis nimitzpaquilismacas quema ya nimictos? 11Se mijcatzi tlen ya quitlalpachojtoque ax huelis tepohuilis para tijpiya hueyi teicnelili. Ax huelis tepohuilis para titemachtli. 12Nepa campa tzintlayohua ax huelise tepohuilise nopa huejhueyi chicahualnescayotl tlen tijchihua. Mijcatzitzi itztoque ipan se tlali campa ayoc tleno quiilnamiquij, huan ax huelis mitzilnamiquise para san ta tixitlahuac. 13Pero na nimitztzajtzilijtoc ta TOTECO, huan sesen ijnaloc nochi tlen niquijtohua quema nimomaijtohua ica ta ajsi hasta moixtla. 14TOTECO, ¿para tlen tijcocol'ia noyolis? ¿Para tlen tiquijcuen'ia moxayac huan titlachiya sejcoyoc? 15Na niitztoc ipan tlaijiyohuili huan cuesoli hasta quema noja niitztoya nitelpocatl. Majmajtli huan miquistli tlen ta tinechtitlanilijtoc nechtoquilijtinemi, huan ama ayoc nihueli m'as niquijiyohu'ia. 16Miyac huelta hualajtoc nopan na mohueyi cualancayo, huan nopa majmajtli tlen tinechtitlanilijtoc tlahuel nechtlaijiyohuilt'ia. 17Quena, nochi nopa tlamantli nechyahualojtoc queja atl. 18Nochi tlen niquinicnel'ia huan tlen itztoyaj nohuampoyohua tiquinchijtoc ma nechtlahuelcahuaca, ayoc nechchihuil'iaj cuenta. Huan noteixmatcahua tiquintlalijtoc ipan tzintlayohuilotl.

will be added

X\