1 TOTECO, ximohuijtzoma quentzi huan xinechtlacaquili quema nimomaijtohua. Xinechnanquili pampa niteicneltzi huan niitztoc ipan cuesoli huan tlaohuijcayotl. 2 NoTeco Dios, xinechmanahui pampa na nijchihua campeca para nijchihuas tlen quiijtohuaj motlanahuatilhua. Xinechmaquixti pampa na nimitztequipanohua huan san ipan ta nimotemach'ia para tinechmocuitlahuis. 3 TOTECO, xijpiya hueyi moyolo ica na pampa nochi se tonal nimitztzajtzilijtoc, huan ipan ta nimochiya para tinechpalehuis. 4 Toteco, xinechmaca paquilistli pampa na san ta nimitzhueyichihua. 5 Toteco, ta nel'ia ticuali huan timoquetztoc timocualtlalijtoc para titetlapojpolhuis. Tiquinicnel'ia huan nimantzi tiquintlasojtla nochi tlen mitztlajtlan'iaj motlapalehuil. 6 TOTECO, xinechtlacaquili quema nimomaijtohua. Quena, xinechtlacaquili quema nimitztzajtzil'ia. 7 Nimitztzajtzilis ipan nopa tonali quema nechajsis tlaohuijcayotl, pampa san ta tinechnanquil'ia huan tinechpalehu'ia. 8 Ipan nochi sequinoc tlen quintocaxt'iaj "dioses", ax onca seyoc queja ta, Toteco. Huan axaca hueli quichihua huejhueyi tlamantli queja ta tijchihua. 9 Elqui ta tlen tiquinchijchijqui nochi tlaltini ica inintlacajhua. Yeca hualase huan mitzhueyichihuase, Toteco. Huan mitzhueyitlalise ta tlen titlatzejtzeloltic, 10 pampa ta tlahuel tihueyi huan tijchihua huejhueyi tlamantli. ¡San ta nel'ia tiDios! 11 TOTECO, xinechnextili moojhui huan nijtoquilis pampa san ya nopa temachtli. Xijchihua para noyolo ma mitzhueyitlepanita, huan ma quiimacasis mitzixpanos nochi noyolis. 12 TOTECO Dios, nimitzpaquilismacas ica nochi noyolo huan nimitzhueyitlalis para nochipa, 13 pampa tlahuel hueyi moteicnelilis noca na, huan ax quema tlami. Ta tinechmanahuijtoc para ax niyas mictla campa tlanahuat'ia miquistli. 14 Toteco Dios, miyac tlacame tlen mohueyimatij huan tlen mosisin'iaj motlanantoque para nechtehuise. Huan miyac tlatehuijca tlacame huan tlaixpanoni quinequij nechmictise, huan ax moyolilhu'iaj tlen ta. 15 Pero ta Toteco nel'ia titetlasojtla huan hueyi moyolo. Ax nimantzi ticualani. San ta titeicnel'ia huan san ta timelahuac. 16 Xinechtlachili ica miyac teicnelijcayotl huan xinechmaca chicahualistli na nimotlatequipanojca. Huan xijmanahui icone mosihua tlatequipanojca. 17 Xijnexti se tlanextili para ta tinechcualita. Queja nopa quiitase nocualancaitacahua, huan mopinahuase pampa momacase cuenta para ta, TOTECO, tlahuel tinechpalehu'ia huan tinechyoltlal'ia.
